Lukas 10

Yesus munutus tujuh puluh murid 10: 1-12

Nge mari oya Tuhen mumilih tujuh puluh murid si lèn, den munutus pakea roa-roa munuloi Wé ku setiep kute den ton si malé ientongi-É.

2 Den iperin-É ku pakea : “Penulingen olok delé, tetapé jema si munuling tikik; entap ni oya tirole ku Tuhen si empu penulingen a kati Wé munutus jema-jema si munuling ku ton penulingen-É oya.

3 Beluh renyel; èngonle Aku munutus kam lagu bebiri ku lelah ni serigala.

4 Enti munemah dompet atawa tas atawa sepatu; den enti munosah salam ku sahan pé i dené.

5 Waktu kam mayo ku wan sara umah, perinen mulo : Damé sejahtera kin umah ni.

6 Ike i oné ara jema si layak munerime damé sejahtera, damé sejahteramu a taring i atas ni wé; ike gere, damé sejahteramu a ulak ku kam.

7 Den taringle i umah a, pangan urum minumle sana si isedienen pakea; sebeb jema si bebuet patut mudepet upahé. Enti minah ari sara umah ku umah si lèn.

8 Setiep kam mayo ku kute den pakea munerime kam, panganle sana si iédangen i arapmu,

9 den jegerenle jema sakiten si ara i oné, nye perinen ku pakea : Kerejeen ni Allah nge rap ku kam.

10 Tetapé setiep kam mayo ku kute den pakea gere munerime kam, beluhle ku jelen-jelen ni kute a nye perinenle :

11 Dul ni kutemu si mulekat i kiding kami ni pé, kami kepuren ku kam; tetapé betihi kamle ini, bahwa Kerejeen ni Allah nge rap.

12 Kuperinen ku kam bahwa i lo oya, ukumen kin Sodom lebih ringen bidak sikseen kin kute a.”

Kute-kute si gere betobat 10: 13-16

(Mat. 11:20-24)

13 “Celakale ko Khorazim! Celakale ko Betsaida! Kerna ike i Tirus urum Sidon terjadi tene mukjizet si nge terjadi i kam, nge mokot pakea betobat kunul berupuh guni nye munobonen dul i atan ni ulué.

14 Tetapé i wan lo penghakimen, ukumen kin Tirus urum Sidon lebih ringen bidak ukumen kin kam.

15 Den ko Kapernaum, ko itatang ku langit ke? Gere, ko malé ituhen ku neraka.

16 Jema si mumengé kam, mumengé Aku, den jema si munulak kam, munulak Aku; den jema si munulak Aku, munulak Wé si munutus Aku.”

Murid si tujuh puluh ulak 10: 17-20

17 Renyel ketujuh puluh murid a ulak urum galak ni atéwé, kené : “Tuhen, setan-setan pé tunuk ku kami wan geral ni Tuhen.”

18 Den iperin Yesus ku pakea : “Aku munèngon Belis metuh lagu kilet ari langit.

19 Ingetle, Aku nge munosanen kuasa kin mumerjak lipé urum kala, den kuasa atas segele kekueten musuh, den gere ara si malé munyakiti kam.

20 Bierpé lagu oya, enti begalak até entap ni roh-roh a tunuk ku kam, tetapé begalak atéle entap ni geralmu nge tertulis i serge.”

Galak naté ni Yesus 10: 21-24

(Mat. 11:25-27; 13:16-17)

21 I waktu oya pé Yesus begalak até wan Roh Kudus, nye mumerin : “Aku besukur ku Ko Ama, Tuhen si bekuasa i serge urum i denie, kerna hal-hal ni ituninen Ama ari jema bijaksana urum jema pané, den nge inyatanen Ama ku kekanak kucak; e, Ama, entap si lagu noyale si munyenangen até ni Ama.

22 Segele sesanah nge iserahen Amang-Ku ku Aku, den gere sara jema pé si mubetihi sahan Anak oya kecuali Ama, den sahan Ama kecuali Anak urum jema si kin wé Anak oya munyatanené.”

23 Renyel mubalikle Yesus ku murid-murid-É nye mumerin ku pakea pelin we : “Mubahgie mi mata si munèngon sana si ièngon kam.

24 Sebeb Kuperinen ku kam, bahwa delé nabi urum reje ménét munèngon sana si ièngon kam, tapé gere munèngoné; den ménét mumengé sana si ipengé kam, tapé gere mumengéé.”

Perumpamaen urang Samaria si jeroh atéwé  10: 25-37

25 Den èngonle, sara ahli Taurat sesuk kin munyubei Yesus, kené : “Guru, sana si turah kupebuet kati muwarisi murip si kekal?”

26 Iperin Yesus ku wé : “Sana si tertulis wan kiteb Taurat? Sana si ibaca ko i oné?”

27 Jeweb jema wa, kené : “Kasihile Tuhen Allahmu urum segenap atému den urum segenap jiwemu den urum segenap kekuetenmu den urum segenap akal budimu, den kasihile sesabému manusie lagu dirimu kendiri.”

28 Iperin Yesus ku wé : “Pas pedéh jewebmu a; buetenle oya den ko kasé munempui murip si kekal.”

29 Tetapé jema wa malé mubenaren dirié, iperiné ku Yesus : “Den sahan ke sesabéku manusie?”

30 Jeweb Yesus : “Arale sara jema turun ari Yerusalem ku Yerikho, den wé metuh ku wan pumu ni perampok, si murampas bèwèné empué, mudereié nye beluh munaringené setengah maté.

31 Kebetulen sara imem turun lepas tar jelen oya, ketike munèngon jema wa, wé muliwetié nye munaringené.

32 Betapé sara jema ari suku Lewi, ketike wé gèh ku ton a nye munèngon jema wa, wé muliwetié nye munaringené.

33 Renyel sara urang Samaria si tengah wan pejelenen gèh ku ton oya, ketike munèngon jema wa, atéwé iengkipi belas kasihen.

34 Wé munerapi jema wa nye mubalut lukeé sesire munuang minyak urum anggur, renyel wé muniken jema

wa ku atan ni keledéé, mumaié ku ton pesingahen nye munetahié.

35 Den lang loé a wé munangkuhen roa dinar nye munosanené ku si penempu ton pesingahen a, kené : Tetahile wé, den sanah pé si ibelenyen ko lebih ari ini, kasé kubiren waktu aku ulak mien.

36 Nalammu sahan ke ari ketige jema ni si mujadi sesabé manusie ni jema si metuh ku wan pumu ni perampok a?”

37 Jeweb ahli Taurat a : “Jema si nge munuruhen belas kasihen ku wé.” Renyel iperin Yesus ku wé : “Beluhle den buetenle lagu oya!”

Marta urum Maria 10: 38-42

38 Ketike Yesus urum murid-murid-É mulanyuten pejelenen, Wé mayo ku wan sara kampung; den sara jema banan begeral Marta munerime Wé i wan umahé.

39 Marta munempui dengan begeral Maria, si kunul rap kiding ni Tuhen mumengén peceraken-É.

40 Tetapé Marta sibuk pedéh mulayani; den wé mudekati Yesus, kené : “Tuhen, gere peduli ke Tuhen bahwa denganku nge mudaténen seseréngku mulayani? Entap ni oya perinenle ku wé kin munempuhi aku.”

41 Jeweb Tuhen, iperin-É ku wé : “Marta, Marta, macik urum gabuk pedéh ko tentang delé hal,

42 tetapé sara we si perlu. Maria nge mumilih bagien si jeroh, si gere lepas iueten ari wé.”