Lukas 11

Penejeren ni Yesus tentang bedoà  11: 1-13

(Mat. 6:9-13; 7:7-11)

I sara waktu Yesus tengah bedoà i sara ton; den ketike nge selesé bedoà, sara ari murid-É mumerin ku Wé : “Tuhen, ejerle kami berdoà lagu si iejeren Yohanes ku murid-muridé.“

2 Iperin Yesus ku pakea :

“Waktu kam bedoà, perinenle :

Ama, ikudusenle geral-Mu;

gèhle Kerejeen-Mu.

3 Osanenle ku kami setiep lo pemanganen si kami perlunen;

4 den ampunile dosa-dosa

ni kami,

sebeb kami pé munampuni

setiep jema si besalah

ku kami;

den enti mumai kami

ku wan cubeen.“

5 Renyel iperin Yesus ku pakea : “Sahan ke i antara ni kam si munempui pong, den gèh ku wé i lo kelem nye mumerin ku wé : Sebet, pinyemen pé aku tulu ruti,

6 sebeb pongku singah ari pejelenené ku umahku den aku gere munempui sanah pé si lepas kuèdangen kin wé;

7 masaén wé mesut ari was : Enti gangu aku, pintu nge itutup, anak-anakku urum aku nge i penoménen; aku gere lepas uet kin munosanené ku ko.

8 Kuperin ku kam, bierpé wé gere mera uet kin munosanené kerna jema wa pongé, tapé entap ni pongé a ne gere kemél dor muniro, akhiré wé uet nye munosanené sekune deléwé si iperlunené.

9 Jadi Kuperinen ku kam : Tirole, den malé iosanen ku kam; kenalle, den kam malé mudemunené; tetokle, den pintu malé iukenen kin kam.

10 Sebeb jep jema si muniro, munerime; den jema si mungenal, mudepet; den jema si munetok, kin wé pintu malé iukenen.

11 Ama sihen ke i antara ni kam, ike anaké muniro gulè, munosah lipé ku anaké a ganti ni gulè?

12 Atawa ike wé muniro tenaruh, iosahé ku wé kala?

13 Jadi ike kam si jahat mubetihi munosah penosahen si jeroh ku kekanakmu, lebih-lebih miené Ama si i serge malé munosanen Roh Kudus ku pakea si muniro ku Wé.”

Yesus den Beelzebul  11: 14-23

(Mat. 12:22-30; Mrk. 3:20-30)

14 Renyel Yesus munusir setan ari sara jema bisu. Ketike setan a tangkuh, jema bisu a lepas becerak; den takjuble jema delé.

15 Tetapé pepien ari pakea mumerin : “Urum Beelzebul reje ni setan Wé munusir setan-setan.”

16 Ara mien jema si lèn munyubei Yesus, muniro ku Wé sara tene ari serge.

17 Tetapé Yesus mubetihi pikiren ni pakea nye mumerin ku pakea : “Setiep kerejeen si mupecah-pecah, saling mulewen sara urum si lèn tentué runtuh; den sara umah tenge si mupecah-pecah gere lepas betehen.

18 Betapé ike Belis mupecah-pecah, saling mulewen sesabé dirié, kune kerejeené lepas betehen? Kerna iperin kam, urum Beelzebul Aku munusir setan.

19 Den ike Aku munusir setan urum kuasa Beelzebul, urum kuasa sahan ke anak-anakmu munusiré? Entap ni oya pakeale si malé mujadi hakimmu.

20 Tetapé ike Aku munusir setan urum kuasa ni Allah, sesunguhé Kerejeen ni Allah nge gèh ku atas ni kam.

  21 Ketike jema si kuet, besenjata lengkap mujege istanaé kendiri, amanle barang-barangé.

22 Tetapé ketike jema si lebih kuet ari wé gèh munyerang nye mungalahené, jema si lebih kuet a tentu murampas segele senjata si iandalené nye mubagi-baginen si irampasé a.

23 Sahan si gere urum Aku, wé mulewen Aku; den sahan si gere mungamulen urum Aku, wé munyeré-berénen.”

Ulak ni roh jahat 11: 24-26

(Mat. 12:43-45)

24 “Ketike roh jahat nge tangkuh ari sara jema, wé muralani ton-ton si kering mungenal ton teduh, den gere idepetié, kené : Aku malé ulak ku umahku si nge kutaringen a;

25 den waktu wé gèh, idepetié umah a nge isapu den rapi mususun.

26 Renyel wé beluh nye imaié pitu roh si lèn si lebih jahat ari wé, den pakea mayo nye taring i oné; den keadaen pemarin ni jema wa lebih olok ari keadaené si pemulo.”

Kebahagien si sebenaré 11: 27-28

27 Waktu Yesus mumerinen hal oya, metukle sara jema banan ari antara jema delé a ku Wé : “Mubahgie mi jema banan si mulahiren urum si munusui-Mu.”

28 Tetapé iperin Yesus : “Sesunguhé mubahgie mi pakea si mumengé kata ni Allah nye munaatié!”

Tene mukjizet Yunus 11: 29-32

(Mat. 12:38-42)

29 Ketike jema delé mungerumungi Yesus, muloile Wé mumerin : “Angkatan ini, angkatan si jahat; pakea muniro sara tene mukjizet, tapé tene mukjizet gere malé iosanen ku pakea kecuali tene mukjizet ni Yunus.

30 Sebeb dis lagu Yunus mujadi tene mukjizet kin urang Niniwé, betapé Anak ni Manusie malé mujadi tene mukjizet kin angkatan ini.

31 I lo penghakimen, ratu ari Selatan malé bangkit urum angkatan ini den munukum pakea; sebeb wé gèh ari ujung ni bumi kin mumengé hikmat ni Salomo, den èngonle si lebih kul ari Salomo ara isien!

32 I lo penghakimen, urang Niniwe malé bangkit urum angkatan ini den munukumé; sebeb pakea betobat waktu mumengé peceraken ni Yunus, den èngonle si lebih kul ari Yunus ara isien!”

Lampu ni tubuh 11: 33-36

33 “Gere sara jema pé munyalanen lampu nye munobonené i ton si mutuni atawa i tuyuh ni gantang, melènen i ton si atas kati jema si mayo lepas munèngon cayaé.

34 Matamu oyale lampu ni tubuh. Ike matamu jeroh, bèwèné tubuhmu pé terang; tetapé ike matamu jahat, tubuhmu pé gelep.

35 Entap ni oya perhatinenle, enti sawah terang si ara i wasmu a mujadi gelep.

36 Ike seluruh tubuhmu terang, gere ara bagien si gelep, tentué seluruh tubuhmu a terang dis lagu waktu lampu munerangi ko urum cayaé.”

Yesus mungecam ahli-ahli Taurat urum urang Parisi 11: 37-54

(Mat. 23:1-36; Mrk. 12:38-40)

37 Waktu Yesus tengah becerak, gèhle sara urang Parisi muniro Wé kin mangan urum wé; renyel Yesus pé mayo ku umahé, nye kunul mangan.

38 Urang Parisi a hèran munèngon bahwa Yesus gere mubasuh pumu mulo sebelem mangan.

39 Tetapé iperin Tuhen ku wé : “Kam urang Parisi, kam mubersihen bagien deret ni cawan urum pingen, tapé i was ni kam engkip rampasen urum  kejahaten.

40 Woi jema ogoh, gere ke Wé si mujadinen bagien deret mujadinen bagien was pé?

41 Tetapé osanenle sana si ara i wasé a ku jema miskin, den èngonle, bèwèné mujadi bersih kin kam.

42 Celakale kam urang Parisi, sebeb kam munebir pesepuluhen ari selasih, inggu urum segele jenis jantar, tetapé gere munironen keadilen urum kasih ni Allah; hal ni turah ibueten den si lèné a enti itaringen.

43 Celakale kam urang Parisi, sebeb kenak até ni kam kunul i ton si mulie wan umah ibedet den ihormati i kedé-kedé.

44 Celakale kam, sebeb kam lagu kuburen si gere benisen, den jema-jema si remalan i atasé gere mubetihié.”

45 Sara ari antara ahli-ahli Taurat a mujeweb, iperiné ku Wé : “Guru, urum mumerinen hal-hal ni Guru pé muhine kami.”

46 Iperin Yesus : “Celakale kam pé, woi ahli-ahli Taurat, sebeb kam mubebeni jema urum beben si nyanya itangung, den kam kendirié urum jejarimu pé gere mujontok beben a.

47 Celakale kam, sebeb kam mubangun kuburen ni nabi-nabi, den muyang datumu si mununuh pakea.

48 Urum lagu noya kam besaksi bahwa kam munyetujui pebueten ni muyang datumu, sebeb pakea si mununuh nabi-nabi a den kam si mubangun kuburené.

49 Oyale sebebpé hikmat ni Allah mumerin : Aku malé munutus nabi-nabi urum rasul-rasul ku pakea, den sèba i antaraé malé iunuh urum ianiaya pakea,

50 kati ari angkatan ni ituntut rayoh ni bèwèné nabi si mamur mutuang ari denie ijadinen mi,

51 muloi ari rayoh ni Habel sawah ku rayoh ni Zakaria si nge iunuh i antara ton ni kerben urum Umah ni Allah. Sesunguhé Kuperinen ku kam, oya malé ituntut ari angkatan ni.

52 Celakale kam ahli-ahli Taurat, sebeb kam nge munuet kunci pemetihen; kam kendiri gere mayo, den kam muhalangi jema si malé mayo.”

53 Waktu Yesus beluh ari oné, ahli-ahli Taurat urum urang Parisi muloi mumusuhi-É den mudesak kati Wé becerak tentang delé hal,

54 pakea munantinen Wé kin munengkam sesanah si salah si tangkuh ari awah-É.