Lukas 13

Betobat atawa maté 13: 1-5

I waktu oya pé ara pepien ni jema si munyederen ku Yesus tentang urang Galilea si rayohé icampuren Pilatus urum rayoh ni kerben si ipesemahen pakea.

2 Jeweb Yesus, iperin-É ku pakea : “Nalammu bahwa urang Galilea wa lebih kul dosaé ari bèwèné urang Galilea si lèné a, sebeb pakea muderite si lagu noya?

3 Gere, Kuperinen ku kam, ike kam gere betobat, kam bèwèné pé malé benasa lagu oya.

4 Atawa lapan belas jema si benasa itimpe menara i Siloam, nalammu bahwa pakea lebih kul kesalahené ari bèwèné jema si taring i Yerusalem?

5 Gere, Kuperinen ku kam, ike kam gere betobat, kam bèwèné pé malé benasa dis lagu oya.”

Perumpamaen tentang batang ara si gere muuah 13: 6-9

6 Renyel Yesus mumerinen perumpamaen ini : “Ara sara jema munempui batang ara si isuen i empus angguré, den wé gèh kin mungenal uah ku batang a, tapé gere mudemunené.

7 Renyel iperiné ku si munurus empus a : Èngonle, nge tulu tun aku gèh kin mungenal uah ni batang ara ni tapé gere mudemunené; tebangen renyel batang a; hana kati wé munyie-nyienenen tanoh ni?

8 Tetapé wé mujeweb, kené: reje, daténen wé murip tun ni, aku malé mujelbang tanoh i seringkelé nye mumupukié.

9 Ike wé muhasilen uah tun arap ho, jeroh; ike gere, ngukle reje munebangé.”

Yesus mujegeren jema sakiten tar lo Sabat 13: 10-17

10 Renyel Yesus munejer wan sara umah ibedet tar lo Sabat.

11 Den èngonle, ara sara jema banan si nge lapan belas tun irasuk setan sehinge wé sakiten sawah mubungkuk kuduké den gere lepas ne sesuk urum lurus.

12 Waktu ièngon Yesus jema banan a, Wé munalué nye iperin-É : “Jema banan, ko nge muluah ari penyakitmu a.”

13 Renyel Wé mumarinen pumu-É ku atasé, den seketike oya pé lurusle kuduké nye wé mumulienen Allah.

14 Tetapé kepala umah ibedet a bengis kerna Yesus mujegeren jema tar lo Sabat, renyel iperiné ku jema delé : “Ara onom lo kin bebuet; entap ni oya gèhle i lo oya kin ijegeren den enti tar lo Sabat!”

15 Tetapé Tuhen mujewebpé, ken-É : “Woi jema munapèk, gere ke tar lo Sabat masing-masing kam muluahen lemu atau keledéé ari uer, renyel mumaié beluh kin munosahé minum?

16 Jema banan ni keturunen ni Abraham, si nge lapan belas tun iikot Belis, gere ke wé patut iluahen ari ikotené a tar lo Sabat?”

17 Waktu Yesus mumerinen hal oya, kemélle bèwèné lewen-É, den bèwèné jema delé a begalak até atas segele hal mulie si iperbuet-É.

Perumpamaen tentang inih ni sesawi urum ragi 13: 18-21

(Mat. 13:31-33; Mrk. 4:30-32)

18 Renyel iperin Yesus : “Seumpama hana ke Kerejeen Allah oya, den urum hana ke Aku mubaningené?

19 Oya seumpama sara inih ni sesawi, si iuet ni jema nye isuken i empusé; renyel inih a murip den mujadi sara batang, den manuk-manuk i langit munos umah i cabang-cabangé.”

20 Den iperin-É mien : “Urum hana ke lepas Kuumpamanen Kerejeen Allah oya?

21 Oya seumpama ragi si iuet ni sara jema banan nye icampurné ku wan tepung tulu sukaten sawah mungemang bèwèné.”

Pintu si impit 13: 22-30

(Mat. 7:13-14; 21-23)

22 Renyel Yesus mulanyuten pejelenen-É munuju Yerusalem mulalui kute-kute urum kampung-kampung sesire munejer.

23 Den sara jema mumerin ku Wé : “Tuhen, tikik ke kasé jema si iselamaten? Jeweb Yesus ku pakea :

24 “Bejuangle kin mayo tar pintu si impit, sebeb Kuperinen ku kam, delé jema berusaha kin mayo, tapé gere lepas.

25 I waktu penempu ni umah nge uet nye munutup pintu, den kam muloi sesuk i deret nye munetok pintu mumerin : Tuhen, ukenen pé pintu kin kami! Den wé kasé mujeweb kam, kené : Gere kubetih ari sihen kam gèh!

26 Renyel kam muloi mumerin : Kami nge mangan urum minum i arap ni Tuhen den Tuhen nge munejer i jelen-jelen kute ni kami.

27 Tetapé wé malé mumerin ku kam : Gere kubetih ari sihen kam gèh; beluh renyel ari aku, kam bèwèné si mubueten kejahaten!

28 I onéle kasé ara mongot urum kertaken ni ipon, ketike kam munèngon Abraham, Isak, Yakup den bèwèné nabi i wan Kerejeen ni Allah, tetapé ko kendiri malé itekaren ku deret.

29 Den jema-jema malé gèh ari timur urum barat, den ari utara urum selatan, den malé kunul mangan i wan Kerejeen ni Allah.

30 Sesunguhé ara jema si pemarin mujadi si pemulo, den ara jema si pemulo mujadi si pemarin.”

Sebuku ni Yesus kin Yerusalem 13: 31-35

31 I waktu oya pé gèhle pepien ni urang Parisi mumerin ku Yesus : “Tangkuhle nye beluh ari sien, kerna Herodes malé mununuh Ko.”

32 Jeweb Yesus ku pakea : “Beluh renyel perinen ku serigele a : Èngonle, Aku munusir setan den mujegeren jema serloni urum lang, den lo ketige Aku munyelesénen buet-Ku.

33 Bierpé lagu oya Aku turah mulanyuten pejelenen-Ku serloni den lang den lang-langné a, sebeb gere mungkin sara nabi benasa i deret ni Yerusalem.

34 Yerusalem, Yerusalem, si mununuh nabi-nabi den si mugeralungi urum atu jema-jema si iutus ku ko! Nge mupepienen kenak-Ku mungamulen anak-anakmu, lagu ine ni kurik mungamulen anak-anaké i tuyuh ni kepèké den kam gere mera.

35 Èngonle, umahmu kasé itaringen. Den Kuperinen ku kam : Kasé kam gere ne munèngon Aku sawah tibe waktué iperin kam : Iberkatile Wé si gèh wan geral ni Tuhen!”