Lukas 14

Yesus mujegeren sara jema tar lo Sabat 14: 1-6

Sara lo tar lo Sabat, ketike Yesus beluh mangan ku umah ni sara ari pemimpin urang Parisi, pakea muperhatinen Wé urum teliti.

2 Den èngonle, i arap-É ara sara jema si sakit basuren.

3 Renyel Yesus mungune ku ahli-ahli Taurat urum urang Parisi, kené : “Ienguken ke mujegeren jema tar lo Sabat atawa gere?”

4 Tetapé pakea ongot we. Renyel Yesus munamat jema sakiten a nye mujegerené, den munginié ulak.

5 Renyel iperin-É ku pakea : “Sahan ke i antara ni kam si munempui anak rawan atawa lemu si metuh ku wan telege tar lo Sabat, gere tir munegué kin munangkuhené?”

6 Den pakea gere sangup mubantah-É.

Ton kunul si paling atas  urum si paling renah 14: 7-11

7 Renyel Yesus mumerinen sara perumpamaen ku pakea si iangon, ketike ièngon-É kune pakea mumilih ton tar uken, iperin-É ku pakea :

8 “Ketike ko iangon jema ku pesta pengerjenen, enti kunul i ton tar uken, sebeb kedang jema wa nge munangon jema si lebih penting ari ko,

9 den wé si munangon reroan kam gèh nye mumerin ku ko : Osanenle tonmu kin jema ni, renyel urum murasa kemél ko kunul i ton tar paling duru.

10 Tetapé ketike ko iangon, beluhle nye kunul i ton tar paling duru, sehinge waktu penempu ni umah gèh, wé mumerin ku ko : Sebet, nik renyel ku ton tar uken a; renyel ko malé ihormati i arap ni bèwèné jema si kunul mangan urum ko.

11 Kerna setiep jema si munatasan dirié malé irenahen, den si murenahen dirié malé iatasen.”

Sahan si turah iangon 14: 12-14

12 Den Yesus pé mumerin ku jema si munangon Wé : “Waktu ko munaranen  pejamuen mangan ruhul atawa kelem, enti angon pong-pongmu, serinen-serinenmu, biak suderemu atawa si kuen kirimu si kaya, kati enti pakea pé munangon ko mien sehinge ko mudepet belesené.

13 Tetapé waktu ko munaranen kenduri, angonenle jema miskin, jema cacat, jema mudèngkoh, jema mbota;

14 den ko kasé iberkati, kerna pakea gere lepas mubelesé ku ko. Sebeb hal oya kasé ibelesen ku ko i lo kebangkiten ni jema benar.”

Perumpamaen tentang pejamuen mangan si kul 14: 15-24

(Mat. 22:1-10)

15 Ketike sara ari si kunul mangan urum Yesus mumengé peceraken oya, wé mumerin ku Yesus : “Mubahgie mi jema si mangan ruti wan Kerejeen ni Allah.”

16 Iperin-É ku wé : “Arale sara jema munaranen pejamuen si kul den wé munangon delé jema,

17  den ketike nge sawah waktu perjamuen a, wé mungini temuluké kin mumerinen ku jema-jema si nge iangoné : Gèh renyel, sebeb bèwèné nge isiepen.

18 Tetapé pakea bèwèné muloi munos alasen. Si pemulo mumerin ku wé : Aku nge mubeli empus, den aku turah beluh munèngoné; kutiro tabi ku ko.

19 Si lèn mumerin : Aku nge mubeli lime pasang lemu, den aku malé beluh kin mumerikseé; kutiro tabi ku ko.

20 Den si lèné a mien mumerin : Aku nge mungerjei sara jema banan, entap ni oya aku gere lepas gèh; kutiro tabi ku ko.

21 Temuluk a ulak nye mulapuren hal oya ku rejeé. Renyel bengisle penempu ni umah a nye iperiné ku temuluké : Tir

renyel beluh ku jelen-jelen urum lorong-lorong ni kute, den maile ku ini jema miskin, jema cacat, jema mbota den jema mudèngkoh.

22 Den iperin temuluk a : Reje, sana si iperintahen reje a nge ibueten, den ara ilen ton si gere muisi.

23 Renyel iperin reje a ku temuluké : Beluh renyel ku jelen-jelen kul urum ku simpang jelen, den paksale jema mayo kati umahku engkip.

24 Sebeb kuperinen ku kam, gere sara jema pé ari jema-jema si iangon a malé murasanen édangenku.”

Sarat kin mujadi murid ni Yesus 14: 25-35

(Mat. 10:37-38)

25 I sara waktu delé jema remalan mununungi Yesus, den Wé mubalik nye mumerin ku pakea :

26 “Ike ara jema gèh ku Aku den gere begeli até ku ama urum ineé, den banané, den anak-anaké, den serinen urum dengané, bahkan nyawa kendirié pé, wé gere lepas mujadi murid-Ku.

27 Sahan si gere munarang salibé ken diri nye mununung Aku, wé gere lepas mujadi murid-Ku.

28 Sebeb sahan ke i antara ni kam si ménét mubangun sara menara gere kunul mulo muhitung biayaé, genap ke sèné kin munyelesénené?      

29 Kati enti nge mari ipariné pendasié den gere lepas munyelesénené, bèwèné jema si munèngoné muloi munololié,

30 kené : Jema ni muloi mubangun, tapé gere lepas munyelesénené.

31 Atawa reje sihen ke si beluh beperang mulewen reje lèn gere kunul mulo mupetimangen, sangup ke wé urum sepuluh ribu jema muhedepi due puluh ribu jema si gèh mulewené?

32 Ike gere, sewaktu musuhé gip ilen, wé mungirim utusené kin mungunei sarat-sarat pedaménen.

33 Oya kati, jep jema i antara ni kam si gere munaringen bèwèné si iempuié, wé gere lepas mujadi murid-Ku.”

34 “Poa asa jeroh; tetapé ike poa wa gere ne masin, urum sana ke wé malé imasinen?

35 Gere ara ne guneé kin tanoh atawa pé kin pupuk; pakea munekarné ku deret. Sahan si munempui kemiring, kenaké wé mumengé.”