Lukas 15

Perumpamaen tentang bebiri si mosop 15: 1-7

(Mat. 18:12-14)

Renyel bèwèné penagih pajak urum jema-jema bedosa mudekati Yesus kin mumengénen Wé.

2 Den urang Parisi urum ahli-ahli Taurat cembebék, kené : “Jema ni munerime jema bedosa nye mangan urum pakea.”

3 Renyel iperin Yesus perumpamaen ni ku pakea, ken-É :

4 “Sahan ke ari antara ni kam si munempui seratus bebiri den sara ari bebiri a mosop, gere munaringen si sembilen puluh sembilen a i belang nye beluh mungenal si mosop a sawah wé mudemunené?

5 Ketike nge idemunené, wé mumariné i atan ni kerlangé urum galak ni atéwé.

6 Den ketike wé ulak ku umahé, italué pong-pongé urum si kuen-kirié, iperiné ku pakea : Begegalakanle urum aku, sebeb aku nge mudemunen bebiringku si mosop a.

7 Kuperinen ku kam : Beta pé kasé, kulen galak ni até i serge entap ni sara jema bedosa si betobat bidak galak ni até entap ni sembilen puluh sembilen jema benar si gere mumerlunen petobaten.”

Perumpamaen tentang dirham si mosop 15: 8-10

8 “Atawa jema banan sihen ke si munempui sepuluh dirham, ike wé kebenénen sara dirham, gere munyalanen lampu den munyapu umah nye mungenal urum cermat sawah wé mudemunené?

9 Den ketike idemunené, wé munalu pong-pong urum si kuen-kirié, kené : Begegalakanle urum aku, sebeb aku nge mudemunen dirhamku si mosop a.

10 Kuperinen ku kam : Beta pé ara galak ni até i arap malèkat-malèkat ni Allah entap ni sara jema bedosa si betobat.”

Perumpamaen tentang anak si mosop 15: 11-32

11 Renyel iperin Yesus : “Arale sara jema si munempui roa anak rawan.

12 Si bensu mumerin ku amaé : Ama, osanenle ku aku reta si mujadi bagienku. Renyel amaé mubagi retaé ku roané anaké a.

13 Gere lemem mari oya, anak bensu a mungamulen bèwèné si iempuié nye beluh ku negeri si gip, i oné wé murumponen retaé urum murip bepoya-poya.

14 Ketike nge iméné bèwèné, terjadile mulapénen si olok i wan negeri a, den wé muloi mularat.

15 Renyel wé beluh bebuet ku sara jema penduduk ni negeri a, den jema wa mungini wé ku empusé kin munosah mangan babi-babié.

16 Den wé ménét munisi tukeé urum ampas si ipangan babi-babi a, tapé gere sara jema pé munosanené ku wé.

17 Tetapé ketike wé munyadari dirié, iperiné : Dum deléwé jema tengupah ni amangku si mulimpah-limpah pemanganené, tapé aku i sien malé benasa kelapénen.

18 Aku malé uet nye beluh ku amangku, den aku malé mumerin ku wé : Ama, aku nge bedosa ku serge urum ku ama,

19 aku gere layak ne iperin anak ni ama; jadinenle aku sebagé sara ari jema tengupah ni ama.

20 Renyel wé uet nye gèh ku amaé.

Tetapé ketike wé gip ilen, amaé nge munèngoné, renyel mugerakle atéwé entap ni kasihé, den amaé musangka nye munulik urum munyium wé.

21 Iperin anak a ku amaé : Ama, aku nge bedosa ku serge urum ku ama, aku gere layak ne iperin anak ni ama.

22 Tetapé iperin ama wa ku temuluk-temuluké : Tir renyel mai jubah si paling belangi nye seluken ku wé, den pakéen sinsim ku jejarié, den sepatu ku kidingé.

23 Renyel mainen anak ni lemu si gotol a, gelihen renyel, den entah kite mangan urum begegalakan.

24 Sebeb anakku ni nge benasa den murip mien; wé nge mosop, den idemunen mien. Den pakea muloi begegalakan.

25 Tetapé anaké si sulu bere ara i empus; den ketike wé ulak nye nge rap

ku umah, ipengéé ling ni musik urum tari-tarien.

26 Renyel italué sara ari pelayan-pelayan a nye mungune, sana arti bèwèné a.

27 Den iperin pelayan a ku wé : Engimu nge ulak den amamu nge mugelih anak ni lemu si gotolé, kerna wé nge mudemunené mien urum selamat.

28 Renyel bengisle anak si sulu bere a den gere mera mayo ku wan umah a; den amaé tangkuh mulèlèhi wé.

29 Tetapé iperin anak a ku amaé : Èngonle, mutun-tun aku mulayani ama den gere pernah aku mulanggar perintah ni ama, den ama gere pernah munosah sara kaming pé kin aku kati aku lepas begegalakan urum pong-pongku.

30 Tetapé ketike anak ni ama ni ulak, si nge muneménen reta ni ama urum jema banan pelacur, ama mugelih anak ni lemu si gotolé kin wé.

31 Den iperin amaé ku wé : Anakku, ko sabé urum aku, den bèwèné si kuempui, kole si nempuié.

32 Patutle kite begegalakan urum begegure, sebeb engimu ni nge benasa, den nge murip mien; wé nge mosop, den nge idemunen mien.”