Lukas 16

Perumpamaen tentang bendahara si cerdik 16: 1-18

Den Yesus pé mumerin ku murid-murid-É : “Ara sara jema kaya si munempui sara bendahara, den ikadunen jema ku wé bahwa bendaharaé a nge munyie-nyienen retaé.

2 Renyel italué bendahara wa, iperiné ku wé : Sana ini si kupengé tentang ko? Osanen petangung-jewepen atas buetmu; sebeb ko gere nguk ne mujadi bendahara.

3 Iperin bandahara wa wan atéwé : Sana si malé kubueten, sebeb rejengku mumecat aku ari jebetenku? Mujelbang aku gere sangup, muniro-niro aku kemél.

4 Nge kubetih sana si malé kubueten, kati ketike aku ipecat ari jebetenku sebagé bendahara, pakea mera munerime aku i umah ni pakea.

5 Renyel italué setiep jema si mutang ku rejeé, iperiné ku si pemulo : Sidah utangmu ku rejengku?

6 Jeweb jema wa : Seratus tung minyak. Renyel iperiné : Ini suret ni utangmu, tir renyel kunul den tulisen lime puluh.

7 Renyel iperiné ku si lèn : Den ko, sidah utangmu? Den iperiné : Seratus pikul gandum. Iperiné ku wé : Ini suret ni utangmu, den tulisen lapan puluh.

8 Den reje a mumuji bendahara si gere jujur a entap wé nge bebuet urum cerdik; sebeb anak-anak ni denie lebih cerdik wan urusen sesabé ni pakea dibak anak-anak ni terang.

9 Kuperinen ku kam, kenalle pong kin dirimu kendiri urum mumaké Mamon si gere jujur, kati ketike Mamon a gere lepas ne munulung, kam iterime i wan kemah abadi.

10 Jema si setie wan perkara si kucak, wé pé setie wan perkara si kul; den jema si gere jujur wan perkara si kucak, wé pé gere jujur wan perkara si kul.

11 Entap ni oya ike kam gere setie wan hal Mamon si gere jujur, sahan si mera mupercayanen ku kam reta si sesunguhé?

12 Den ike kam gere setie wan reta ni jema lèn, sahan si malé munosah ku kam retamu kendiri?

13 Gere ara temuluk si lepas mungabdi ku roa reje; sebeb wé malé begeli até ku si sara nye mungasihi si lèn, atawa wé malé setie ku si sara nye mumanang renah si lèné a. Kam gere nguk mungabdi ku Allah urum ku Mamon.”

14 Urang Parisi, si jekopen kin sèn, mumengé bèwèné hal oya den pakea munejek Yesus.

15 Renyel iperin-É ku pakea : “Kamle jema si mubenaran dirimu i arap ni jema, tetapé Allah mubetihi atému; sebeb sana si imulienen ni jema, kekejien i arap ni Allah.

16 Hukum Taurat urum kiteb nabi-nabi tetap berlaku sawah ku jemen Yohanes; den ari waktu oya mi Kerejeen ni Allah iberitenen den setiep jema berebuten mayo ku wasé.

17 Tetapé lebih murah langit urum bumi bené dibak sara titik ari hukum Taurat batal.

18 Setiep jema si munyerénen banané den mungerjei jema banan lèn, wé bebuet jine, den sahan si mungerjei jema banan si icerénen rawané a, wé pé bebuet jine.”

Jema kaya urum Lazarus 16: 19-31

19 “Arale sara jema kaya, pekayané jubah ungu urum upuh alus, den jep lo wé begegalakan wan kemewahen.

20 Den ara sara jema miskin begeral Lazarus pegulang i pintu gerbang ni jema kaya wa, bedené engkip urum ugah;

21 den wé ménét munisi tukeé urum sana si metuh ari meja ni jema kaya wa. Bahkan asu-asu pé gèh mudelapi ugahé.

22 Renyel benasale jema miskin a den wé imai malèkat-malèkat ku tenumpiten ni Abraham. Jema kaya wa pé benasa nye ikuburen,

23 tengah wé wan sikseen i alam maut, wé munatangen mataé, ièngoné Abraham ari gip urum Lazarus i tenumpitené.

24 Renyel wé metuk, kené : Ama Abraham, kasihenile aku, den kininenle Lazarus kati wé munyelomen ujung ni jejarié ku wan wih den munyejuken délahku, sebeb aku olok muderite wan nyala ni rara ni.

25 Tetapé iperin Abraham : O anak, ingetle bahwa ko nge munerime hal si jeroh sewaktu muripmu, sedangken Lazarus munerime hal si kotek; tetapé besilo wé ihibur den ko muderite.

26 Selèn ari oya, antara kami urum ko ara sara jurang si relem, kati pakea si ménét ari sien ku ko gere lepas, den jema ari oné pé gere lepas munyeberang ku kami.

27 Renyel iperin jema wa : Ike beta, urum sunguh kutiro, kati ama mungini wé ku umah ni amangku;

28 sebeb aku munempui lime serinen; kati wé muperingeten pakea, kati enti pakea pé mayo ku ton sikseen ni.

29 Tetapé iperin Abraham : Pakea munempui kiteb Musa urum kiteb nabi-nabi; sebaiké pakea mumengénené.

30 Den iperiné : Enggih, ama Abraham, tetapé ike ara jema ari antara jema benasa beluh ku pakea, tentué pakea betobat.

31 Tetapé iperin Abraham ku wé : Ike pakea gere mera mumengénen Musa urum nabi-nabi, pakea pé gere mera iyakinen bierpé ara jema si bangkit ari kematénen.“