Lukas 17

Dosa 17: 1-6

(Mat. 18:6-7; 21-22; Mrk. 9:42)

Renyel Yesus mumerin ku murid-murid-É : “Pasti ara si munos jema kin mubueten dosa, tetapé celakale jema si mulalui wé hal oya terjadi.

2 Jerohen kin wé ike sara atu penggilingen si kul igenengen ku rongoké nye wé itekaren ku wan lut, dibak wé munyebebpen sara ari kekanak kucak ni bebuet dosa.

3 Jegele dirimu! Ike serinenmu bedosa, tegorle wé; den ike wé munyesal, ampunile wé.

4 Den ike wé bedosa ku ko mupitunen wan serlo a nye mupitunen wé ulak mien ku ko mumerin : Aku munyesal, ko turah munampuni wé.”

5 Rasul-rasul mumerin ku Tuhen : “Tamahile imen ni kami!”

6 Iperin Tuhen : “Ike kam munempui imen lagu sara inih ni sesawi, kam lepas mumerin ku batang ara ni : Mujergutle nye mutanomle i lut; tentué wé taat ku kam.”

Kewajiben ni temuluk 17: 7-10

7 ”Sahan ke ari antara ni kam si munempui sara temuluk si munengel atawa mumeralai urip-uripen, den ketike temuluk a ulak ari empus, iperinené ku wé : Tir renyel gèh, kunul nye manganle?

8 Gere ke iperiné ku wé : Sedienen renyel pemanganen kin aku, ikotenle awakmu nye layanile aku mangan urum minum sawah selesé, nge mari oya barole ko pé mangan urum minum?

9 Ara ke iucepené berijin ku temuluk a entap ni wé mubueten sana si iperintahen ku wé?

10 Betapé kam, waktu kam nge mubueten bèwèné si iperintahen ku kam, perinenle : Kami ni temuluk-temuluk si gere begune, kami mubueten sana si turah kami bueten pelin we.”

Yesus mujegeren sepuluh jema mubuduk 17: 11-19

11 Wan pejelenen-É ku Yerusalem, Yesus muliweti daerah perbatasen Samaria urum Galilea.

12 Waktu munayoi sara kampung, Wé idemui sepuluh jema mubuduk, si sesuk ari gip,

13 den pakea metuk, kené : “Yesus, Tuhen, kasihenile kami!”

14 Ketike Yesus munèngon pakea, iperin-É : “Beluh renyel, turuhen diri ni kam ku imem-imem.”Den waktu pakea beluh, jegerle buduk ni pakea.

15 Renyel sara ari pakea, waktu ièngoné bahwa wé nge jeger, wé mubalik sesire mumuji Allah urum ling keras,

16 nye sujut i kiding ni Yesus mungucep sukur ku Wé; jema wa urang Samaria.

17 Iperin Yesus, ken-É : “Gere ke sepuluh jema si nge ijegeren? I sihen ke si siwah jema wa?

18 Gere ara ke ari antara ni pakea si ulak mien mumulienen Allah kecuali jema asing ni?”          

19 Renyel iperin Yesus ku wé : “Uet den beluh renyel; imenmu nge mujegeren ko.”

Gèh ni Kerejeen Allah 17: 20-37

(Mat. 24:23-28; 37-41)

20 Ketike ikunei urang Parisi, selohen Kerejeen ni Allah oya gèh, jeweb Yesus ku pakea, ken-É : “Kerejeen ni Allah gèh gere urum tene-tene si lepas ièngon mata,

21 jema pé gere mumerin : Èngon, ara i sien, atawa : ara i oné; sebeb Kerejeen ni Allah ara i antara ni kam.”

22 Renyel iperin Yesus ku murid-murid a : “Kasé malé gèh loé, waktu kam ménét munèngon sara ari lo ni Anak ni Manusie a, tapé kam gere lepas munèngoné.

23 Den pakea malé mumerin ku kam : Èngon, i oné! Èngon, i sien! Enti kam beluh atawa mununungié.

24 Sebeb lagu kilet si mumancar i langit, ari ujung langit si sara ku ujung langit si lèn, betale kasé gèh ni Anak ni Manusie i lo-É a.

25 Tetapé Wé turah muderite delé hal mulo nye itulak angkatan ni.

26 Den dis lagu si terjadi i jemen ni Nuh, betapé kasé terjadi waktu gèh ni Anak ni Manusie;

27 pakea mangan, minum, kerje, ikerjenen, sawah ku lo Nuh mayo ku wan perau kul, renyel gèhle banjir kul mubenasanen bebèwèné.

28 Betapé lagu si terjadi i jemen ni Lot; pakea mangan, minum, mubeli, mujuel, munyuen urum mubangun.

29 Tetapé i lo Lot tangkuh ari Sodom, turunle uren rara urum belerang ari langit nye mubenasanen bebèwèné.

30 Betale keadaené kasé i lo Anak ni Manusie inyatanen.

31 I lo oya, jema si tengah i peratasen ni umah den barang-barangé i wan ni umah, enti wé turun kin munueté, betapé jema si ara i empus enti wé ulak ku umahé.

32 Ingetle banan ni Lot!

33 Barik sahan berusaha mupetehenen nyawaé, wé kebenénen nyawaé; den barik sahan kebenénen nyawaé, wé munyelamatené.

34 Kuperinen ku kam, i lo kelem oya ara roa jema i atan sara penomenen, sara kasé imai den si lèné a itaringen.

35 Ara roa jema banan tengah mugiling gandum, sara kasé imai den si lèné a itaringen.”

36 [Ara roa jema i empus, sara kasé imai den si lèné a itaringen.]

37 Renyel iperin pakea ku Yesus : “I sihen ke oya kasé terjadi, Tuhen?” Iperin-É ku pakea : “I sihen ara mét, i oné manuk nasar mukamul.”