Lukas 18

Perumpamaen tentang jema balu urum hakim 18: 1-8

Renyel Yesus mumerinen sara perumpamaen ku pakea kati pakea turah dor bedoà urum gere beputus asa,

2 ken-É : “Wan sara kute ara sara hakim si gere terih kin Allah urum gere muhormati jema.

3 Den i kute a ara sara jema balu, den wé dor gèh ku hakim a mumerin : Benarenle perkaraku ari lewenku.

4 Nge pepien lememé hakim a munulaké; tetapé mari oya iperiné wan atéwé : Bierpé aku gere terih kin Allah atawa gere muhormati jema,

5 tetapé kerna jema balu ni dor mugangu aku, aku mera mubenaren wé, kati enti wé dor gèh den akhiré munyerang aku.”

6 Renyel iperin Tuhen : “Pengénle sana si iperinen hakim si gere adil oya.

7 Gere ke Allah kasé mubenaren jema-jema pilihen-É si munyeru ku Wé porak lo kelem? Gere ke tir-tir itulung-É pakea?

8 Kuperinen ku kam, urum tir Wé mubenaren pakea. Tetapé ketike Anak ni Manusie oya kasé gèh, idemunen-É ke imen i bumi?”

Perumpamaen tentang urang Parisi urum penagih pajak 18: 9-14

9 Renyel Yesus pé mumerinen perumpamaen ni ku pepien ni jema si munanggap bahwa diri ni pakea benar nye mumanang renah jema lèn :

10 “Ara roa jema beluh ku Bait ni Allah kin bedoà, sara urang Parisi den si lèné a penagih pajak.

11 Urang Parisi a sesuk nye bedoà wan atéwé, kené : O Allah, aku mungucep sukur ku Allah kerna aku gere dis lagu jema lèn : Perusuh, jema okeng, pejine, atawa pé lagu penagih pajak ni.

12 Aku bepasa muroanen semingu, aku munosah pesepuluhen ari bèwèné penghasilenku.

13 Tetapé penagih pajak a gip-gip sesuk, bahkan gere berani munatangen mataé ku langit, melènen wé munepoken dedeé, kené : O Allah, kasihenile aku, jema bedosa ni.

14 Kuperinen ku kam, penagih pajak ni ulak ku umahé sebagé jema si ibenaren Allah den jema si lèné a gere; kerna jep jema si munatasan dirié malé irenahen, den jema si murenahen dirié malé iatasen.”

Yesus muberkati kekanak 18: 15-17

(Mat. 19:13-15; Mrk. 10:13-16)

15 Renyel pepien ni jema mumai anak kucak ku Yesus kati Wé muberkati pakea; tapé ketike munèngon hal oya, murid-murid mubengisi pakea.

16 Tetapé Yesus munalu kekanak a sesire mumerin : “Daténen kekanak a gèh ku Aku den enti muhalang-halangi pakea; sebeb jema si lagu noyale si nempu Kerejeen ni Allah.

17 Sesunguhé Kuperinen ku kam, barik sahan gere munyamut Kerejeen ni Allah lagu sara kekanak, wé gere lepas mayo ku wasé.”

Jema kaya 18: 18-30

(Mat. 19:16-26; Mrk. 10:17-27)

18 Ara sara pemimpin urang Yahudi mungune ku Yesus, kené : “Guru si jeroh, sana si turah kubueten kati mudepet murip si kekal?”

19 Den iperin Yesus ku wé : “Hana kati iperin ko Aku ni jeroh? Gere ara sara jema pé si jeroh kecuali sara, Allah.

20 Tentué nge ibetihi ko perintah ni : Enti bejine, enti mununuh, enti munusuh, enti besaksi cogah, hormatile ama urum inemu.”

21 Iperiné : “Bèwèné ni nge kuturuti ari mudengku mi.”

22 Mumengé oya, iperin Yesus ku wé : “Ara ilen sara hal mi kekurangenmu; juel renyel bèwèné si iempui ko nye baginen ku jema miskin, kasé ko malé munempui reta i serge, mari oya gèh nye tunung mi le Aku.”

23 Tetapé ketike ipengéé hal oya, atéwé mujadi ues pedéh, sebeb wé olok kaya.

24 Ketike Yesus munèngon wé, iperin-É : “Dum nyanyaé jema kaya mayo ku wan Kerejeen ni Allah.

25 Sebeb murahen sara unte mayo muliweti luang ni jarum bidak sara jema kaya mayo ku wan Kerejeen ni Allah.”

26 Den pakea si mumengé a mumerin : “Ike beta sahan ke si lepas iselamaten?”

27 Iperin Yesus : “Kin manusie hal oya mustahil, tetapé kin Allah gere ara hal si mustahil.”

28 Renyel iperin Petrus : “Èngon, kami nge munaringen bèwèné si kami empui nye mununung Guru.”

29 Iperin Yesus ku pakea : “Sesunguhé Kuperinen ku kam, gere ara sara jema pé si munaringen umah, atawa banan, atawa serinen, atawa jema tue, atawa anak-anaké entap ni Kerejeen ni Allah,

30 si gere munerime mulipet ganda i wan masa ni den kasé puren munerime murip si kekal.”    

Penyederen ketige tentang kematénen urum kebangkiten

ni Yesus 18: 31-34

(Mat. 20:17-19; Mrk. 10:32-34)

31 Renyel Yesus mumai kedue belas murid a, iperin-É ku pakea : “Èngon, kite malé beluh ku Yerusalem, den bèwèné si nge itulis nabi-nabi tentang Anak ni Manusie malé igenapi.

32 Sebeb Wé malé iserahen ku bengsa-bengsa si gere mubetihi Allah, den iololi, ihine den iilihi,

33 den pakea munyamuk nye mununuh Wé, den kasé i lo ketulué Wé bangkit.”

34 Tetapé tikik pé gere ipehemi pakea, pecerakan a mutuni ari pakea, den pakea gere mubetihi sana si iperin-É a.

Yesus mujegeren sara jema petetiro si mbota 18: 35-43

(Mat. 20:29-34; Mrk. 10:46-52)

35 Ketike Yesus malé sawah i Yerikho, ara sara jema mbota kunul i geniring ni dené muniro-niro.

36 Waktu ipengéé jema delé liwet, wé mungune sana si tengah terjadi.

37 Den pakea munyederen ku wé bahwa Yesus urang Nazaret tengah liwet.

38 Renyel wé metuk, kené : “Yesus, anak ni Daud, kasihenile aku!”

39 Jema-jema si remalan i arap munegoré kati wé ongot; tetapé wé makin olok metuk : “Anak ni Daud, kasihenile aku!”

40 Den Yesus teduh nye ikini-É jema mumai jema mbota wa ku Wé. Ketike wé nge dekat, Yesus mungune ku wé :

41 “Sana si ikenaki ko kati Kubueten kin ni ko?” Iperiné : “Tuhen, kati aku lepas munèngon.”

42 Renyel iperin Yesus ku wé : “Munèngonle! Imenmu nge mujegeren ko.”

43 Seketike oya pé jema mbota wa lepas munèngon, den wé mununungi Yesus sesire mumulienen Allah. Den bèwèné jema si munèngoné a mumuji-muji Allah.