Lukas 19

Yesus urum Zakeus 19: 1-10

Renyel Yesus mayo ku kute Yeriko den remalan mulintesi kute a.

2 I oné ara sara jema si begeral Zakeus, kepala penagih pajak, den wé jema kaya.

3 Wé berusaha kin munèngon sahan ke Yesus oya, tetapi wé gere lepas entap ni jema delé, sebeb bedené konot.

4 Renyel wé musangka munuloi jema delé a nye nik ku atan batang ara kin munèngon Yesus si malé liwet tar jelen oya.

5 Ketike Yesus sawah ku ton a, Wé munèngon ku atas nye mumerin : “Zakeus, tir renyel turun; kerna serloni aku turah taring i umahmu.”

6 Renyel tir-tir Zakeus turun, den munyamut Yesus urum galak ni atéwé.

7 Bèwèné jema si munèngon hal oya cembebék, kené : “Wé munumpang i umah ni jema si bedosa.”

8 Den Zakeus sesuk nye iperiné ku Tuhen : “Tuhen, setengah ari retangku kuosanen ku jema miskin, den ike aku nge munileti jema, aku munulaké opat kali lipet.”

9 Renyel iperin Yesus ku wé : “Serloni keselamaten nge gèh ku umah ni, kerna wé ni pé anak ni Abraham.

10 Sebeb Anak ni Manusie gèh kin mungenal urum munyelamaten si mosop.”

Perumpamaen tentang sèn mina 19: 11-27

(Mat. 25:14-30)

11 Waktu pakea mumengé hal oya, Yesus mulanyuten peceraken-É urum sara perumpamaen, kerna Wé nge rap ku Yerusalem den nalam ni pakea bahwa Kerejeen ni Allah malé teridah i waktu oya pé.

12 Oya kati iperin-É : “Ara sara bengsawan beluh ku negeri si gip kin iangkat mujadi reje, mari oya wé ulak mien.

13 Wé munalu sepuluh jema temuluké, den iosané ku pakea sepuluh sèn mina, nye iperiné ku pakea : Berniegele kam sawah aku ulak mien.

14 Tetapé rayaté begeli até kin wé, renyel mungirim utusen i kuduk ni wé kin mumerinen : Kami gere mera jema ni mujadi reje ni kami.

15 Den terjadile, ketike wé ulak, mari iangkat mujadi reje, wé mungini jema kin munalu temuluk-temuluk si nge iosahé sèn mina wa kin mubetihi sidah keuntungen si nge idepet pakea.

16 Jema si pemulo gèh, kené : Reje, sèn mina ni rejé a nge muhasilen sepuluh sèn mina.

17 Iperin reje a ku wé : Jeroh pedéh pebuetenmu a, temuluk si jeroh! Kerna ko nge setie wan hal si kucak, terimele kuasa kin mumerintah atas sepuluh kute.

18 Den si kedue gèh, kené : Reje, sèn mina ni reje a nge muhasilen lime sèn mina.

19 Reje a pé mumerin ku wé : Den ko kuasaile lime kute.

20 Renyel gèhle si lèn, kené : Reje, inile sèn mina ni reje a, si kukemas wan lap ni pumu;

21 sebeb aku terih kin reje, entap ni reje jema okeng, reje munuet sana si gere iobon reje, den reje munuling sana si gere isuken reje.

22 Iperin reje a ku wé : Aku malé munukum ko sesué pecerakenmu a, woi temuluk si jahat! Nge ibetihi ko ke bahwa aku ni jema okeng, si munuet sana si gere kuobon, den munuling sana si gere kusuk?

23 Hana kati sèn minangku a gere iobon ko i bank? Kati ike aku ulak, aku lepas munuetné urum bungeé.

24 Renyel iperiné ku pakea si sesuk i oné : Ueten renyel sèn mina wa ari wé nye osanen ku jema si munempui sepuluh sèn mina wa.

25 Iperin pakea ku reje a : Reje, wé nge munempui sepuluh sèn mina.

26 Jeweb reje a : Kuperinen ku kam, ku jep jema si munempui, malé iosanen mien, tetapé jema si gere munempui, bahkan sana si ara i wé pé malé iueten ari wé.

27 Tetapé lewen-lewenku a, si gere mera aku mujadi reje ni pakea, mai renyel pakea ku ini nye unuhen pakea i arapku.”

Yesus isurak-surak urum meriah i Yerusalem 19: 28-40

(Mat. 21:1-9; Mrk. 11:1-11; Yoh. 12:12-19)

28 Nge mari mumerinen hal-hal oya, Yesus remalan i arap ni pakea munuju Yerusalem.

29 Ketike Wé nge rap ku Betpage urum Betania, ku arah bur si begeral bur Zaitun, ikini Yesus roa murid-É, ken-É :

30 “Beluh renyel ku kampung si i arap ni kam a, waktu kam mayo, kasé idemunen kam sara keledé mude itemet, si gere ilen pernah itiki jema, luahen keledé a nye mai ku ini.

31 Den ike ara jema mungune ku kam : Hana kati kam muluahené? Perinen kamle : Tuhen mumerlunené.”

32 Renyel pakea si ikini a beluh den mudepeti bèwèné lagu si nge iperinen Yesus ku pakea.

33 Waktu iluahen pakea keledé a, penempué mumerin ku pakea : “Hana kati iluahen kam keledé a?”

34 Iperin pakea : “Tuhen mumerlunené.”

35 Den pakea mumaié ku Yesus, nye mumarinen pekayan ni pakea i atan ni keledé a, renyel pakea muniken Yesus ku atasé.

36 Waktu Wé mugenéi keledé a, jema-jema mudènangen pekayané i dené.

37 Ketike Wé nge dekat ku Yerusalem, i ton jelen mungilih ari bur Zaitun, bèwèné murid-murid si delé a muloi begegalakan den mumuji Allah urum ling keras kerna bèwèné mukjizet si nge ièngon pakea,

38 kené :

“Iberkatile Reje si gèh

wan geral ni Tuhen!

Damé sejahtera i serge

den kemulieen i ton

si paling atas!”

39 Pepien ni urang Parisi ari antara ni jema delé a mumerin ku Yesus : “Guru, tegorle murid-murid ni Guru a.”

40 Jeweb Yesus : “Kuperinen ku kam, ike pake ni ongot, atu-atu a kasé besurak.”

Yesus mumongoti Yerusalem 19: 41-44

41 Den ketike Yesus semakin rap ku Yerusalem nye munèngon kute a, Wé mumongotié,

42 ken-É : “Dum jerohé ike serloni ibetihi ko sana si perlu kin damé

sejahteramu; tapé besilo hal oya mutuni ari matamu.

43 Sebeb kasé malé gèh loé, lewenmu munos kubu i seringkelmu, renyel pakea mungepung den munimpit ko ari segele arah,

44 den pakea malé muruntuhen ko urum pendudukmu, den gere itaringené sara atu pé mususun i atan ni atu si lèn wan negerimu, entap ni gere ibetihi ko waktu Allah munentongi ko.”

Yesus munyucinen Bait ni Allah 19: 45-48

(Mat. 21:12-17; Mrk. 11:15-19; Yoh. 2:13-22)

45 Renyel Yesus mayo ku was Bait ni Allah den muloi munusir jema-jema si bejuelen i oné,

46 iperin-É ku pakea : “Ara tertulis : Umah-Ku oyale umah doà; tapé kam mujadinené gue ni perusuh.”

47 Jep-jep lo Yesus munejer i wan Bait ni Allah. Imem-imem kepala, ahli-ahli Taurat urum pemimpin-pemimpin ni urang Yahudi berusaha kin mununuh Wé,

48 tetapé pakea gere mudemunen cara kune mubuetené; sebeb bèwèné jema nge kenak atéwé mumengénen penejeren-É.