Lukas 2

Kelahiren ni Yesus 2: 1-7

(Mat. 1:18-25)

I waktu oya tangkuhle sara perintah ari Kaisar Agustus, mungini bèwèné jema i seluruh denie mudaptaren diri.

2 Inile pendaptaren si pemulo waktu Kirenius mujadi gubernur i Siria.

3 Den bèwèné jema beluh kin idaptaren, masing-masing ulak ku kute dirié.

4 Betapé Yusup beluh ari Galilea, ari kute Nazaret ku Yudea, ku kute Betlehem, kerna wé berasal ari keluarga urum keturunen ni Daud,

5 kati idaptaren urum Maria, biaké si tengah benemah.

6 Den ketike pakea i oné, tibele waktu ni Maria kin besalin;

7 den wé mulahiren anak rawan, anak si sulu bereé, renyel iriling urum lamping nye igulangené i wan palungen, entap gere ara ton kin pakea i umah ton pesingahen.

Gembala urum malèkat 2: 8-21

8 I daerah oyane pé ara gembala-gembala si taring i belang mujege urip-uripen ni pakea kekelem ho.

9 Den sara malèkat ni Tuhen gèh ku pakea, nye kemulien ni Tuhen mucaya i sekiter ni pakea; den pakea keterihen.

10 Iperin malèkat a ku pakea : “Enti terih, sebeb sesunguhé aku munemah keber jeroh ku kam tentang galak ni até si kul kin bèwèné jema.

11 Kerna serloni nge lahir kin kam Juruselamat, oyale Kristus Tuhen, i kute Daud.

12 Den inile teneé kin kam : Kam malé mudemunen sara anak bayi iriling urum lamping nye pegulang i wan palungen.”

13 Minter-minter urum malèkat a teridah delé pedéh tentara serge mumuji Allah nye kené :

14 “Kemulien kin Allah

i ton si paling atas

den damé sejahtera i bumi

i antara ni jema

si ikenaki-É.”

15 Ketike malèkat-malèkat a munaringen pakea nye ulak ku serge, gembala-gembala wa becerak sesabé dirié : “Entah mi kite beluh ku Betlehem den munèngon si nge terjadi oya, si nge isederen Tuhen ku kite.”

16 Renyel tir-tir pakea berangkat nye mudemunen Maria urum Yusup, den bayi si tengah pegulang i wan palungen.

17 Waktu pakea munèngoné, isederen pakeale sana si nge iperinen ku pakea tentang Anak oya.

18. Den hèranle bèwèné jema si mumengé tentang sana si nge iperinen gembala-gembala wa ku pakea;

19 tetapé Maria mungemas bèwèné ni, nye murenungené i wan atéwé.

20 Renyel gembala-gembala wa ulak sesire mumulienen den mumuji Allah atas bèwèné si nge ipengé urum ièngon pakea, dis lagu si nge isederen ku pakea.

21 Den nge mari umur waluh lo, waktu Anak a isunet, Wé igerali Yesus, geral si iosah malèkat sebelem Wé dikanung i was rahim.

Yesus iserahen ku Tuhen i Bait ni Allah 2: 22-38

22 Den ketike nge munge masa pembersihen ni pakea munurut hukum Taurat Musa, imai pakeale Anak a ku Yerusalem kin munyerahen Wé ku Tuhen,

23 lagu si nge tertulis wan hukum Tuhen : “Jep-jep anak rawan sulu bere turah iserahen ku Tuhen”,

24 den mupesemahen kerben sesué urum sana si iperinen wan hukum Tuhen, sepasang manuk kukur atawa roa anak manuk birahpati.

25 Arale sara jema rawan i Yerusalem si begeral Simeon, wé jema benar urum saleh, den munantinen penghiburen kin Israel. Roh Kudus ara iatasé;

26 den nge isederen Roh Kudus ku wé bahwa wé gere benasa sebelem wé munèngon Kristus Tuhen oya.

27 Urum pimpinen Roh Kudus wé gèh ku was Bait ni Allah; den waktu Yesus, Anak oya imai jema tue-É ku was, malé mubueten kin Wé munurut resam ni hukum Taurat,

28 Simeon munerime Wé, menatang-É, nye mumuji Allah, kené :

29. “O Tuhen, besilo daténenle

hamba-Mu beluh

urum damé lagu

si iperinen Tuhen;

30 sebeb matangku nge munèngon keselamaten si ari Tuhen,

31 si nge isedienen Tuhen

i hedepen ni segele bengsa,

32 oyale terang si

munerangi bengsa lèn,

den kemulien

kin umet-Mu Israel.”

33 Den ama urum ine-É pé hèran atas hal-hal si iperinen tentang Wé.

34 Renyel Simeon muberkati pakea nye mumerin ku Maria, ine-É : “Sesunguhé Anak ni itentunen kin munetuhen urum mubangkiten delé jema i Israel den kin sara tene si malé itentang;

35 – den kasé pedang munemus jiwemu pé –, sehinge pikiren até ni delé jema mujadi terang.”

36 Den ara sara nabiah begeral Hana, anak banan ni Panuel, ari suku Asher; Wé nge lanyut umuré, nge mari kerje wé murip urum rawané pitu tun,

37 den wé nge balu sawah umuré lapan puluh empat tun, gere pernah itaringené Bait ni Allah, porak lo kelem wé beribadah urum bepasa den bedoà.

38 I waktu oya pé, gèhle wé mumuji Allah nye becerak tentang Anak oya ku bèwèné jema si munantinen pembebasen Yerusalem.

Ulak ku Nazaret 2: 39-40

39 Ketike pakea nge munyelesénen segele sesanah munurut hukum Tuhen, ulakle pakea ku Galilea, ku Nazaret, kute dirié.

40. Den Anak oya makin mutamah kul den mujadi kuet, engkip urum hikmat, den kasih karunie ni Allah ara i atas ni Wé.

Yesus umur due belas tun wan Bait ni Allah 2: 41-52

41 Jep-jep tun jema tue ni Yesus beluh ku Yerusalem i waktu reraya Paskah.

42 Den waktu Yesus umur due belas tun, lagu resamé pakea beluh ku perayaen oya.

43 Ketike perayaen oya nge selesé pakea ulak, Yesus si kucak ilen taring i Yerusalem, den jema tue-É gere mubetihié.

44 Sebeb nalam ni pakea Wé ara wan rombongen, mari remalan serlo pejelenen barole pakea mungenal Wé i antara ni biak sudere urum kenalen-kenalen ni pakea,

45 tapé pakea gere mudemunen-É, renyel pakea ulak ku Yerusalem kin mungenali Wé.

46 Nge mari tulu lo pakea mudemunen Wé i wan Bait ni Allah tengah kunul i lelah ni guru-guru, mumengén pakea urum mungunei pakea;

47 den bèwèné jema si mumengé Wé hèran kin pemetihen urum jewebpen-É.

48 Den jema tue-É pé hèran waktu munèngon Wé, nye iperin ine-É ku Wé : “O Anakku, hana kati Ko mubueten ini ku kami? Èngonle, ama-Mu urum aku nge macik mungenali Ko.”

49 Renyel iperin-É ku pakea : “Hana kati kam mungenali Aku? Gere ke ibetihi kam bahwa Aku turah ara i wan umah ni Amang-Ku?”

50 Tetapé ama urum ine-É gere mungerti pecerakan si iperin-É ku pakea.

51 Renyel Wé ulak urum pakea nye sawah i Nazaret, den taat ku pakea. Den ine-É mungemas bèwèné hal oya i wan atéwé.

52 Den Yesus makin mutamah hikmat urum kul-É, den makin ikasihi Allah urum manusie.