Lukas 20

Pengunenen tentang kuasa ni Yesus  20 : 1-8

(Mat. 21:23-27; Mrk. 11:27-33)

I wan sara lo, ketike Yesus tengah munejer jema delé i Bait ni Allah den mungeberen Injil, gèhle imem-imem kepala, ahli-ahli Taurat urum petue-petue ni urang Yahudi,

2 den pakea mumerin ku Wé, kené : “Perinenle ku kami urum kuasa hana Ko mubueten hal-hal ni, atawa sahan si munosah kuasa ni ku Ko?”

3 Jeweb Yesus ku pakea, ken-É : “Aku pé malé mungune ku kam sara pengunenen, perinenle ku Aku :

4 Baptisan ni Yohanes a ari serge atawa ari manusie?”

5 Den pakea munyerakené sesabé ni pakea, kené : “Ike kite perin : Ari serge, kasé iperin-É : Hana kati kam gere percaya ku wé?

6 Den ike kite perin : Ari manusie, tentué bèwèné jema mugeralungi kite urum atu; sebeb pakea yakin bahwa Yohanes a sara nabi.”

7 Renyel ijeweb pakea : “Gere kami betih ari sihen asalé.”

8 Den iperin Yesus ku pakea : “Ike beta, Aku pé gere mumerinen ku kam urum kuasa sana Aku mubueten hal-hal ni.”

Perumpamaen tentang penyiwe empus ni anggur 20: 9-18

(Mat. 21:33-46; Mrk. 12:1-12)

9 Renyel muloile Yesus munyederen perumpamaen ni ku jema delé a : “Arale sara jema munyuen anggur i empusé, renyel isiwenné empusé a ku penyiwe-penyiwe nye beluh ku negeri si lèn kin waktu si lemem.

10 Ketike nge sawah musimé, ikinié sara temuluk ku penyiwe-penyiwe a, kati pakea munyerahen uah anggur si mujadi bagiené; tetapé penyiwe-penyiwe a muderei wé nye mungini ulak urum gere munemah sanah pé.

11 Renyel ikinié mien sara temuluk si lèn; tetapé temuluk a pé iderei urum ipekemél pakea, renyel ikini ulak urum gere munemah sanah pé.

12 Selanjuté ikinié temuluké si ketige; tetapé temuluk a pé ilukei pakea nye itekaren ku deret ni empus a.

13. Renyel iperin penempu empus a : Sana si turah kubueten? Aku malé mungini anak rawanku si kukasihi; kedang pakea muhormati wé.

14 Tetapé ketike penyiwe-penyiwe empus a munèngon anaké a, pakea becerak sesabé dirié : Inile ahli warisé, entah kite unuhen wé, kati warisen a kite empué.

15 Renyel pakea munekaren wé ku deret ni empus anggur a nye mununuhé. Besilo hana si malé ibueten penempu ni empus a ku penyiwe-penyiwe a?

16 Tentué wé gèh nye mununuh penyiwe-penyiwe a, den munosanen empus anggur a ku jema lèn.”Mumengé a, iperin  pakea : “Hal oya enti terjadi!”

17 Yesus mumanang pakea, ken-É : “Ike beta, sana ke arti si tertulis ni :

Atu si itekar

tukang bangunen

nge mujadi atu pendasi si utama?

18 Jep jema si metuh ku atan ni atu a, tentué cir; den sahan si itinih atu a, tentu wé remuk.”

Pengunenen tentang munebir pajak 20: 19-26

(Mat. 22:15-22; Mrk. 12:13-17)

19 I waktu oya pé ahli-ahli Taurat urum imem-imem kepala berusaha munengkam Yesus, sebeb ibetihi pakea bahwa kin pakeale perumpamaen a isederen-É, tetapé pakea terih ku jema delé.

20 Oya kati pakea munèngoni-É nye mungini mata-mata si belagak sebagé jema jeroh, kati pakea lepas mujebak Wé wan pecerakan-É nye munyerahen-É ku pemerintah urum kuasa ni gubernur.

21 Jema-jema wa mungune ku Yesus, kené : “Guru, kami betih bahwa peceraken urum penejeren ni Guru a benar, den Guru gere mumandang rupe, tapé munejeren jelen ni Allah urum sebenaré.

22 Ienguken ke kami munebir pajak ku Kaisar atawa gere?”

23 Tetapé Yesus mubetihi keileten ni pakea, renyel iperin-É ku pakea :

24 “Turuhen ku Aku sara dinar; gamar urum tulisen sahan ke ini?” Iperin pakea : “Kaisar.”

25 Renyel iperin Yesus ku pakea : “Ike beta, osanen ku Kaisar sana si iempui Kaisar den ku Allah sana si iempui Allah.”

26 Den pakea gere lepas mujebak Wé wan peceraken-É i arap ni jema delé; pakea hèran atas jeweben-É den pakea ongot.

Pengunenen ni urang Saduki tentang kebangkiten 20: 27-40

(Mat. 22:23-33; Mrk. 12:18-27)

27 Renyel gèhle ku Yesus pepien ni urang Saduki, si munyangkal ara kebangkiten, pakea mungune ku Wé,

28 kené : “Guru, Musa munulisen hukum ni kin kite bahwa ike sara jema rawan benasa, wé munempui banan tapé gere munempui anak, serinené turah kerje urum banané a kati mubangkiten keturunen kin serinené a.

29 Arale pitu berserinenen; si pemulo kerje urum sara jema banan nye benasa urum gere munempui anak.             

30 Renyel si kedue kerje urum jema banan a,

31 den si ketige pé kerje urum jema banan a, betale sawah ku si kepitu, pakea bèwèné benasa urum gere munaringen anak.

32 Akhiré jema banan a pé benasa.

33 I lo kebangkiten kasé puren, mujadi banan ni sahan ke jema banan a?  Sebeb kepitué nge kerje urum wé.”

34 Iperin Yesus ku pakea : “Anak-anak denie ni kerje urum ikerjenen,

35 tetapé pakea si ianggap layak kin mudepet bagien i denie si malé gèh puren, si ibangkiten ari antara jema benasa, gere kerje urum gere ikerjenen.

36 Sebeb pakea gere lepas ne benasa, kerna pakea dis lagu malèkat, den pake oyale anak-anak ni Allah entap ni pakea nge ibangkiten.

37 Tetapé tentang kebangkiten ni jema si nge benasa, nge ituruhen Musa wan cerite tentang tamas murui, i oné iperinené bahwa Tuhen oyale Allah ni Abraham den Allah ni Ishak den Allah ni Yakup.

38 Wé nume Allah ni jema si benasa, tapé Allah ni jema si murip; sebeb i arap ni Allah bèwèné jema murip.”

39 Renyel isut pepien ahli Taurat, kené : “Guru, pas pedéh jeweb ni Guru a.”

40 Den pakea gere berani ne mungune sanah pé ku Yesus.

Hubungen antara Yesus urum Daud 20: 41-44

(Mat. 22:41-46; Mrk. 12:35-37)

41 Renyel iperin Yesus ku pakea : “Kune lepas iperinen jema bahwa Kristus oya anak ni Daud?

42 Kerna Daud kendiri mumerinen wan kiteb Mazmur :

Iperin Tuhen ku

Tuhenku:

kunulle i semelah kuen-Ku,

43 sawah Kutos

lewen-Mu i tuyuh ni kiding-Mu.

44 Jadi Daud munalu Wé Tuhen, kune Wé pé anaké?”

Yesus munasèhati kati inget-inget kin ahli-ahli Taurat 20: 45-47

(Mat. 23:1-36; Mrk. 12:38-40)

45 Ketike bèwèné jema mumengénen, iperin Yesus ku murid-murid-É :

46 “Inget-inget kin ahli-ahli Taurat si rejen remalan munyeluk jubah naru, den kenak natewé ihormati i kedé den kunul i ton si mulie wan kenduri nye tar uken i wan umah ibedet,

47 si munileti jema balu kin murebut umahé den si mungelabui mata ni jema urum doà si naru-naru; pake ni kasé puren munerime hukumen si lebih beret.“