Lukas 21

Persemahen jema balu si miskin   21: 1-4

(Mrk. 12:41-44)

Ketike Yesus munatangen mata-É, Wé munèngon jema-jema kaya munayonen pesemahené ku wan peti pesemahen.

2 Den Wé pé munèngon sara jema balu si miskin munayonen roa peser ku wan peti a.

3 Renyel iperin-É : “Sesunguhé Kuperinen ku kam bahwa jema balu si miskin ni munosah lebih delé ari bèwèné jema wa.

4 Sebeb pakea bèwèné munosah pesemahené ari kelimpahené, tapé jema balu ni nge munosah ari kekurangené, bèwèné si ara i wé, bèwèné nepekahé.”

Bait ni Allah malé iruntuhen 21: 5-6

(Mat. 24:1-2; Mrk. 13:1-2)

5 Ketike pepien ni jema becerak tentang Bait ni Allah, kune bangunen a ihiesi urum atu si belangi den urum bagé-bagé barang pesemahen, iperin Yesus :

6 “Sana si ièngon kam ni, kasé malé gèh loé gere ara sara atu pé idaténen taring i atan ni atu si lèn, bèwèné malé iruntuhen.”

Pemulo ni penderiteen 21:7-19

(Mat. 24:3-14; Mrk. 13:3-13)

7 Den murid-murid mungune ku Yesus, kené : “Guru, selohen ke hal oya terjadi? Den hana ke teneé ketike hal oya malé terjadi?”

8 Iperin Yesus : “Bejege-jegele, kati kam enti iseruken jema; sebeb kasé delé jema gèh atas geral-Ku, kené : Akule Wé, den : Waktué nge rap. Enti kam mununungi pakea.

9 Ketike kam mumengé tentang peperangen urum kekarunen, enti kam terih; sebeb hal-hal oya turah terjadi mulo, tetapé oya gere ilen pemariné.”

10 Renyel iperin Yesus ku pakea : “Bengsa malé uet mulewen bengsa den kerejeen mulewen kerejeen,

11 kasé terjadi gempa bumi si olok den i bebagé ton kelapenen urum penyakit sampar, den terjadi hal si mugerlenen urum tene-tene si kul ari langit.

12 Tetapé sebelem bèwèné oya kam kasé itengkam urum ianiaya, iserahen ku umah-umah ibedet urum ku penjere, den kam kasé imai ku arap ni reje urum pemerintah entap ni geral-Ku.

13 Hal oya mujadi kesempatenmu kin besaksi.

14 Entap ni oya, tetapenle wan atému, enti ipikiri kam mulo sana si malé iperinen kam kin mubela diri;

15 sebeb Aku kasé munosah dèlah ku kam urum hikmat, sehinge lewen-lewenmu gere lepas munentang urum mulewen kam.

16 Den kasé kam pé ihianati jema tuemu, serinen-serinenmu, biak suderemu urum rakan sebetmu, den pepien ari kam kasé iunuh pakea,

17 den bèwèné jema begeli até ku kam entap ni geral-Ku.

18 Tetapé gere sara wuk pé ari ulumu mosop.

19 Urum tetap betehen, kam munyelamaten muripmu.”

Yesus munyederen keruntuhen Yerusalem 21: 20-24

(Mat. 24:15-21; Mrk. 13:14-19)

20 “Tetapé ketike kam munèngon Yerusalem iringkeli tentara-tentara, betihile bahwa keruntuhené nge rap.

21 I waktu oya jema-jema si ara i Yudea kenakné munyangkanen diri ku bur, den pakea si ara i wan kute kenakné tangkuh, den pakea si ara i deret ni kute enti ne mayo ku wan kute,

22 sebeb oyale lo pembelesen kin mugenapi bèwèné si nge tertulis.

23 Celakale ine si tengah benemah urum si tengah munusunen bayié i waktu oya! Sebeb kasé terjadi penderiteen si olok i atan ni bumi den murke kin bengsa ni,

24 den pakea iunuh urum pedang nye imai sebagé tawanan ku bèwèné bengsa, den Yerusalem iperjak-perjak bengsa-bengsa si gere mubetihi Allah, sawah genaple masa ni bengsa-bengsa wa.”

Gèh ni Anak ni Manusie 21: 25-28

(Mat. 24:29-31; Mrk. 13:24-27)

25 “Kasé ara tene-tene i matanlo, ulen urum bintang, den bengsa-bengsa i bumi macik urum bingung entap ni deru urum gelumang ni lut.

26 Kasé jema pengsan entap ni keterihen urum entap ni munantinen sana si malé terjadi ku atas ni bumi ni, sebeb kuasa-kuasa ni langit muguncang.

27 I waktu oya pakea munèngon Anak ni Manusie gèh wan emun urum kuasa den kemulieen si kul. 

28 Ketike hal-hal oya muloi terjadi, sesuk renyel den tatangen ulumu, sebeb penyelamatenmu nge rap.”

Pelejeren ari perumpamaen tentang batang ara 21: 29-33

(Mat. 24:32-35; Mrk. 13:28-31)

29 Renyel iperin Yesus sara perumpamaen ku pakea : “Èngonle batang ara urum bèwèné batang si lèn.

30 Sentan batang kayu a muceding, kam mubetihi bahwa musim porak nge rap.

31 Betapé, ketike ièngon kam hal-hal ni terjadi, betihile bahwa Kerejeen ni Allah nge rap.

32 Sesunguhé Kuperinen ku kam bahwa angkatan ni gere belalu sawah bèwèné ni terjadi.

33 Langit urum bumi malé belalu, tetapé peceraken-Ku  tetap selamaé.”

Bejege-jegele 21: 34-38

34 “Jegele dirimu kati atému enti ibebeni urum pesta pora den mabuk-mabukan den sabé bemacik kin murip ni, kati lo oya enti minter-minter gèh ku atas ni kam lagu sara jaro.

35 Sebeb lo oya malé gèh ku atas ni bèwèné jema si taring i atan ni bumi.

36 Tetapé bejege-jegele setiep saat, den bedoàle kati kam kuet kin muluahen diri ari bèwèné si malé terjadi a, den lepas sesuk i arap Anak ni Manusie.”

37 I waktu terang lo Yesus munejer i wan Bait ni Allah, i waktu lo kelem Wé tangkuh nye beringi i bur si begeral Bur Zaitun.

38 Den soboh-soboh bèwèné jema gèh ku Wé i wan Bait ni Allah kin mumengénen Wé.