Lukas 22

Rencana kin mununuh Yesus 22: 1-2

(Mat. 26:1-5; Mrk. 14:1-2; Yoh. 11:45-53)

Reraya Ruti Gere Muragi si iperin Paskah nge rap.

2 Imem-imem kepala urum ahli-ahli Taurat mungenal jelen kune pakea lepas mununuh Yesus; sebeb pakea terih kin jema delé.

Yudas muhianati Yesus 22: 3-6

(Mat. 26:14-16; Mrk. 14:10-11)

3 Renyel mayole Belis ku was ni Yudas, si begeral Iskariot, sara ari kedue belas murid a.

4 Wé beluh ku imem-imem kepala urum kepala pengawal Bait ni Allah nye beruning urum pakea kune wé lepas munyerahen Yesus ku pakea.

5 Den pakea kegalakan, nye sepakat kin munosanen sèn ku wé.

6 Yudas pé setuju nye mungenal kesempaten kin munyerahen Yesus ku pakea urum gere ibetihi jema delé.

Persiepen kin mangan Paskah 22:7-13

(Mat. 26:17-25; Mrk. 14:12-21; Yoh. 13:21-30)

7 Den tibele reraya Ruti Gere Muragi, i lo oya bebiri Paskah turah igelih.

8 Renyel Yesus mungini Petrus urum Yohanes, ken-É : “Beluhle kam, sedienen pejamuen Paskah kin kite, kati mangan kite.”

9 Iperin pakea ku Wé : “I sihen ke ikenaki Guru kami munyedienené?”

10 Den iperin Yesus ku pakea : “Waktu kam mayo ku wan kute, kasé kam mudemu urum sara jema rawan si munemah keni berisi wih; tunungi wé ku wan ni umah si iayoié;

11 nye perinen ku penempu ni umah a : Guru mumerin ku ko : I sihen ke ruangen ton-Ku lepas mangan Paskah urum murid-murid-Ku?

12 Den jema wa kasé munuruhen ku kam sara ruangen kul i atas si nge tersedie; i onéle kam munyedienené.”

13 Renyel beluhle pakea nye mudepeti lagu si nge iperinen Yesus ku pakea, den pakea pé munyiepen Paskah.

Perjamuen Kelem 22: 14-23

(Mat. 26:26-30; Mrk. 14:22-26; I Kor. 11:23-25)

14 Ketike tibe waktué, Yesus kunul mangan, den rasul-rasul urum Wé.

15 Den iperin-É ku pakea : “Aku ménét pedéh mangan Paskah ni urum kam sebelem Aku muderite;

16 sebeb Kuperinen ku kam bahwa Aku gere ne mumangané sawah oya igenapi i wan Kerejeen ni Allah.”

17 Renyel iuet-É sara cawan, mari mungucep sukur iperin-É : “Ueten renyel ini nye baginen i antara ni kam.

18 Sebeb Kuperinen ku kam, muloi ari besilo ni mi Aku gere ne minum uah batang ni anggur sawah Kerejeen ni Allah oya gèh.”

19 Renyel iuet-É ruti, mari mungucep sukur ipecah-pecah-É, nye iosan-É ku pakea, ken-É : “Inile beden-Ku si iserahen kin kam; buetenle ini kin muninget Aku.”

20 Betapé cawan a, nge mari mangan, ken-É : “Cawan inile pejanyinen si ayu i wan rayoh-Ku, si ituangen kin kam.

21 Tetapé èngonle, pumu ni jema si muhianati Aku ara urum Aku i meja ni.

22 Sebeb Anak ni Manusie turah beluh sesué urum sana si nge itentunen, tapé celakale si mulalui wé Anak ni Manusie iserahen.”

23 Den pakea muloi pekekune sesabé dirié, sahan ke die ari antara ni pakea si malé mubueten hal oya.

Sahan si paling kul 22: 24-30

24 I antara ni murid-murid a pé terjadi dewe, sahan ari pakea si ianggap paling kul.

25 Den iperin Yesus ku pakea : “Reje-reje denie ni bekuasa atas rayaté, den penguasa-penguasaé iperin pelinung rayat.

26 Tetapé kam gere lagu noya, melènen si paling kul i antara ni kam kenaké wé mujadi si paling mude, den pemimpin mujadi lagu pelayan.

27 Sebeb sahan ke si paling kul, jema si kunul mangan atawa jema si mulayani? Gere ke jema si kunul mangan a? Tetapé aku ara i lelah ni kam sebagé pelayan.

28 Kamle  si tetap taring urum Aku wan segele penyubeen-Ku.

29 Lagu Amang-Ku nge munentunen kerejeen a kin Aku, Aku pé munentunené kin kam,

30 kati kam nguk mangan urum minum i mejang-Ku i wan Kerejeen-Ku, den kam kasé kunul i atas takhta kin muhakimi kedue belas suku Israel.”

Yesus benubuat tentang penyangkalen Petrus 22:31-34

(Mat. 26:31-35; Mrk. 14:27-31; Yoh. 13:36-38)

31 “Simon, Simon, èngonle, Belis nge mununtut kin munapi kam lagu gandum;

32 tetapé Aku nge bedoà kin ko gelah imenmu gere ruluh. Den ketike ko nge bebalik, kuetenle serinen-serinenmu.”

33 Iperin Petrus ku Yesus : “Tuhen, aku besedie mayo ku wan penjere den benasa urum Tuhen.”

34 Tetapé iperin Yesus : “Kuperinen ku ko, Petrus, gere metuk kurik serloni sebelem mutulunen ko munyangkal bahwa ko ramah urum Aku.”

Dompet urum pedang 22: 35-38

35 Mari oya iperin Yesus ku pakea : “Waktu Aku munutus kam urum gere munemah dompet, tas atawa sepatu, ara ke kam kekurangen sanah pé?” Iperin pakea : “Gere ara.”

36 Renyel iperin-É ku pakea : “Tetapé besilo sahan si munempui dompet kenaké munemahé, betapé si munempui tas; den sahan si gere munempui pedang kenaké wé mujuel jubahé kin mubeli pedang.

37 Sebeb Kuperinen ku kam bahwa sana si nge tertulis ni turah igenapi wan diring-Ku : Wé idisen urum jema-jema jahat. Kerna sana si tertulis tentang Aku tengah igenapi.”

38 Den iperin pakea : “Tuhen, èngonle, i sien ara roa pedang.” Jeweb Yesus : “Oya nge genap.”

Yesus berdoà i Getsemani 22:39-46

(Mat. 26:36-46; Mrk. 14:32-42)

39 Renyel tangkuhle Yesus nye beluh lagu bieseé ku Bur Zaitun; den murid-murid-É pé mununungi-É.

40 Ketike sawah i ton oya, iperin-É ku pakea : “Bedoàle kati kam gere mayo ku wan penyubeen.”

 41 Den Yesus mugipen diri-É ari pakea kire-kire sara geralungen atu gipé, renyel Wé sujut bedoà,

42 ken-É : “Ama, ike ikenaki Ama, uetenle cawan ni ari Aku; tapé nume kenak-Ku, melènen kenak ni Amale si terjadi.”

43 Sara malèkat ari serge munuruhen diri ku Yesus kin mungueten Wé.

44 Den i wan penderiteen si olok, Wé makin sunguh bedoà; den alak-É mujadi lagu titisen rayoh si metuh ku tanoh.

45 Nge mari uet ari doà-É, Wé gèh ku murid-murid-É, den idepeti-É pakea tengah nomé entap ni ues atéwé,

46 nye iperin-É ku pakea : “Hana kati kam nomé? Uet renyel den bedoàle, kati kam enti mayo ku wan penyubeen.”

Yesus itengkam 22: 47-53

(Mat. 26:47-56; Mrk. 14:43-50; Yoh. 18:3-11)

47 Waktu Yesus becerak ilen gèhle sara rombongen jema, den jema si begeral Yudas, sara ari kedue belas murid a remalan i arap ni pakea; wé mudekati Yesus nye munyium-É.

48 Tetapé iperin Yesus ku wé : “Woi Yudas, urum ciumen ke ko muhieneti Anak ni Manusie?”

49 Ketike si murum urum Wé munèngon sana si malé terjadi, iperin pakea : “Tuhen, kami serang ke urum pedang ni?”

50 Den sara ari pakea munyerang temuluk ni Imem Kul nye munengkah kemiring kuené.

51 Den iperin Yesus, ken-É : “Nge genaple oya!” Renyel iamat-É kemiring ni jema wa nye ijegeren-É.

52 Mari oya iperin Yesus ku imem-imem kepala, kepala-kepala pengawal Bait ni Allah, urum petue-petue si gèh kin munengkam Wé : “Lagu mulewen perampok ke kam tangkuh urum pedang den kayu pendere?

53 Ketike Aku ara urum kam jep lo i wan Bait ni Allah, kam gere munengkam Aku; tapé inile waktu ni kam den kuasa kegelepen a.”

Petrus munyangkal Yesus 22: 54-62

(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)

54 Nge mari munengkam Yesus, pakea mumai Wé ku umah ni Imem Kul; den Petrus mununungi ari gip.

55 Ketike pakea nge munyalanen rara i lelah ni alamen umah a den kunul murum-murum, Petrus pé kunul i antara ni pakea.

56 Renyel sara pelayan banan, waktu munèngon Petrus kunul i rap ni rara wa nye munèngonié, iperiné : “Jema ni pé murum urum Wé.”

57 Tetapé Petrus munyangkalé, kené : “Aku gere ramah urum Wé.”

58 Gere lemem mari oya sara jema si lèn munèngon wé, iperiné : “Ko pé sara ari pakea.” Tetapé iperin Petrus : “Nume aku.”

59 Den kire-kire sara jem mari oya, sara jema si lèné a mien urum tegas mumerin : “Pasti jema ni pé murum urum Wé, kerna jema ni pé urang Galilea.”

60 Tetapé iperin Petrus : “Gere kubetih sana si iceraken ko a.” Den seketike oya pé, tengah wé becerak ilen metukle kurik.

61 Renyel Yesus mubalik nye mumanang Petrus, den teringetle Petrus kin peceraken ni Tuhen si nge iperin-É ku wé bahwa sebelem metuk kurik serloni, ko nge munyangkal Aku mutulunen.

62 Mari oya wé tangkuh den mongot urum uesé.

Yesus iololi urum iderei 22: 63-65

(Mat. 26:67-68; Mrk. 14:65)

63 Den jema-jema si munehen Yesus munololi-É urum muderei-É.

64 Pakea munutup mata-É nye mungune, kené : “Cube tebak, sahan si muderei Ko?”

65 Den delé hujeten si lèn si iperinen pakea kin Wé.

Yesus i arap ni Mahkamah Agama  22:66-71

(Mat. 26:59-66; Mrk. 14:55-64; Yoh. 18:19-24)

66 Ketike lo nge terang, mukamulle petue-petue ni bengsa Yahudi, imem-imem kepala urum ahli-ahli Taurat, renyel pakea mumai Yesus ku Mahkamah Agama ni pakea,

67 kené : “Ike Ko Kristus oya, perinenle ku kami.”  Iperin Yesus ku pakea : “Ike Kusederen pé ku kam, kam pasti gere percaya;         

68 den ike Aku mungune ku kam, pasti gere ijeweb kam.

69 Tetapé ari besilo ni mi Anak ni Manusie kunul i semelah kuen ni Allah Si Mahakuasa.”

70 Bèwèné pakea mumerin : “Ike beta Ko ke Anak ni Allah?” Den iperin Yesus ku pakea : “Kam kendiri mumerinen bahwa Akule Anak ni Allah.”

71 Renyel iperin pakea : “Hana kati kite perlu saksi ilen? Sebeb kite kendiri nge mumengéé ari awah-É.”