Lukas 24

Kebangkiten ni Yesus 23:56b-24:12

(Mat. 28:1-10; Mrk. 16:1-8; Yoh. 20:1-10)

56b. lo pemulo mingu a, waktu soboh renam, beluhle jema-jema banan a ku kuburen munemah rempah-rempah si nge isedienené a.

2 Den idepeti pakea atu a nge muesot ari kubur a,

3 Ketike mayo ku wasé, pakea gere mudemunen mèt ni Tuhen Yesus.

4 Waktu pakea bingung ilen tentang hal oya, èngonle, roa jema sesuk i rap ni pakea urum pekayan si mujerilep.

5 Pakea olok pedéh terih nye munungkuken salaké ku tanoh, renyel kedue jema wa mumerin ku pakea : “Hana kati kam mungenal Wé si murip i antara si benasa?

6 Wé gere ara i sien, Wé nge bangkit. Ingetle sana si nge iperinen-É ku kam sewaktu Wé i Galilea ilen,

7 bahwa Anak ni Manusie turah iserahen ku pumu ni jema bedosa nye isaliben, den bangkit i lo ketige.”

8 Den teringetle pakea kin peceraken ni Yesus a,

9 renyel pakea ulak ari kubur a nye munyederen bèwèné hal oya ku sebelas murid urum ku bèwèné murid si lèn.

10 Jema-jema banan a oyale Maria Magdalena, Yohana, Maria ine ni Yakobus, den jema-jema banan lèn; pakea munyederen hal-hal oya ku rasul-rasul.

11 Tetapé peceraken oya lagu cerak pesot we kin pakea, den pakea gere percaya ku jema-jema banan a.

12 Tetapé Petrus uet nye musangka ku kubur a; sesire mubungkuk wé munèngon ku was, den upuh linen pelin we ièngoné. Renyel wé ulak ku umah den pekekune wan atéwé sana die si nge terjadi.

Yesus munuruhen diri i dené ku Emaus  24: 13-35

(Mrk. 16:12-13)

13 I lo oya pé, roa ari murid-murid ni Yesus beluh ku sara kampung begeral Emaus, kire-kire sebelas kilometer ari Yerusalem,

14 den pakea becerak sesabé dirié tentang segele peristiwe si nge terjadi a.

15 Ketike pakea tengah becerak den betuker pikiren, Yesus kendiri-É mudekati nye remalan urum pakea.

16 Tetapé ara si muhalangi mata ni pakea sehinge pakea gere munenei Wé.

17 Renyel iperin Yesus ku pakea : “Peceraken sana si tengah iceraken kam sesire remalan?” Den pakea teduh urum rupe si sedih.

18 Sara ari pakea si begeral Kleopas mujeweb, kené : “Ko ke sara-saraé jema asing i Yerusalem si gere mubetihi sana si terjadi i oné akhir-akhir ni?”

19 Iperin Yesus ku pakea : “Tentang sana ke oya?” Renyel iperin pakea ku Wé : “Tentang Yesus urang Nazaret, Wé nabi si bekuasa wan pebueten urum peceraken-É, i arap ni Allah urum i arap ni bèwèné jema;

20 tapé imem-imem kepala urum pemimpin-pemimpin kami nge munyerahen Wé kin ihukum maté, den pakea nge munyaliben Wé.

21 Pedahal kami beharap bahwa Wéle si malé mubebasen bengsa Israel; den selèn oya, serloni nge lo ketige nge mari kejadien oya.

22 Den pepien jema banan ari antara kami nge mugintesen kami; soboh renam pakea nge beluh ku kuburen,

23 den gere mudemunen mèt-É, renyel pakea ulak nye mumerin bahwa pakea nge munèngon malèkat-malèkat si mumerinen bahwa Yesus murip.

  24 Den pepien ari kami beluh ku kubur a, den idepetié lagu si iperinen jema-jema banan a, tetapé Yesus gere ièngon pakea.”

25 Renyel iperin Yesus ku pakea : “Woi kam jema ogoh, mokot pedéh atému percaya ku bèwèné si nge iperinen nabi-nabi!

26 Gere ke Kristus turah mungalami penderiteen ni nye mayo ku wan kemulien-É?”

27 Renyel ijelasen Yesus ku pakea sana si tertulis wan bèwèné Kiteb Suci tentang Wé, muloi ari kiteb Musa urum bèwèné kiteb nabi-nabi.

28 Ketike pakea nge dekat ku kampung si ituju pakea, Yesus bebuet lagu malé mulanyuten pejelenen-É.

29 Tapé pakea mudesak Wé, kené : “Taringle urum kami, sebeb lo nge malé kelem den matanlo pé nge malé mutelnom.” Den Yesus mayo kin taring urum pakea.

30. Waktu Yesus kunul mangan urum pakea, iuet-É ruti, iberkati-É nye ipecah-pecah-É, renyel iosan-É ku pakea.

31 Renyel mukele mata ni pakea, den pakea munenei Yesus; tetapé Wé mosop ari penèngonen ni pakea.

32 Pakea becerak sara urum si lèn : “Gere ke aténte mujengkele, ketike Wé becerak ku kite i pejelenen den ketike Wé mujelasen Kiteb Suci ku kite?”

33 I waktu oya pé pakea uet nye ulak ku Yerusalem, den mudepeti kesebelas murid tengah mukamul urum pong-pong ni pakea.

34 Iperin pakea : “Sunguh, Tuhen nge bangkit den nge munuruhen diri ku Simon!”

35 Renyel kedue jema wa pé munyederen sana si nge terjadi i pejelenen den kune Wé itenei pakea waktu Wé mumecah-mecahen ruti.

Yesus munuruhen diri ku murid-murid-É  24: 36-49

(Mat. 28:16-20; Mrk. 16:14-18; Yoh. 20:19-23; Kis. 1:6-8)

36 Waktu kedue jema wa munyederen tentang kejadien a, Yesus sesuk i lelah ni pakea, ken-É : “Damé sejahtera kin kam!”

37 Pakea gintes urum keterihen, nalamé pakea munengon hantu.

38. Tetapé iperin Yesus ku pakea : “Hana kati kam terih? Hana kati timul keraguen i wan atému?

39 Èngonle pumung-Ku urum kiding-Ku, Aku kendirile ini; amatle Aku nye èngonle, sebeb hantu gere ara usi urum tulené lagu si ièngon kam ara i Aku.”

40 Waktu mumerinen oya, ituruhen Yesus pumu urum kiding-É ku pakea.

41 Den ketike pakea gere ilen percaya entap ni galak atéwé urum hèran ilen, iperin Yesus ku pakea : “Ara ke pemanganen ni kam i sien?”

42 Iosah pakea ku Wé sara kerat gulè pangang;

43 den Wé munuet-É nye ipangan-É i arap ni pakea.

44 Renyel iperin-É ku pakea : “Inile peceraken-Ku si nge Kuperinen ku kam waktu Aku urum kam ilen, bahwa bèwèné si tertulis tentang Aku wan Hukum Musa den kiteb nabi-nabi den Mazmur turah igenapi.”

45 Renyel Yesus munuke pikiren ni pakea kin mumehemi Kiteb Suci,

46 nye iperin-É ku pakea : “Ara tertulis bahwa Kristus turah muderite den i lo ketige bangkit ari antara jema benasa;

47 den wan geral-É berite tentang petobaten urum pengampunen dosa turah ikeberen ku bèwèné bengsa, muloi ari Yerusalem.

48 Kamle saksi ari bèwèné ni.

49 Den èngonle, Aku malé mungirim ku atas ni kam si ijanyinen ni Amang-Ku; tetapé taringle i kute sawah kam iperlengkapi urum kuasa si ari atas.”

Yesus nik ku serge  24: 50-53

(Mrk. 16:19-20; Kis. 1:9-11)

50 Renyel Yesus mumai pakea ku deret sawah ku Betania, den Wé munatangen pumu-É nye muberkati pakea.

51 Waktu Yesus muberkati pakea, Wé mupisah ari pakea nye mutatang ku serge.

52 Pakea sujut munyemah Wé nye ulak ku Yerusalem urum gegalakan,

53 den pakea sabé ara i wan Bait ni Allah mumulienen Allah.