Lukas 3

Yohanes Pembaptis 3: 1-20

(Mat. 3:1-12; Mrk. 1:1-8; Yoh. 1:19-28)

I tun kelime belas masa pemerintahen Kaisar Tiberius, waktu Pontius Pilatus mujadi gubernur Yudea, den Herodes mujadi reje wilayah Galilea, den Pilipus, serinen ni Herodes reje wilayah Iturea urum Trakhonitis, den Lisanias reje wilayah Abilene,

2 den waktu Hanas urum Kayapas mujadi Imem Kul, gèhle peceraken ni Allah ku Yohanes, anak ni Zakaria i padang gurun.

3 Renyel Yohanes gèh ku seluruh daerah sungai Yordan den mungeberen baptisan petobaten kin pengampunen dosa,

4 lagu si tertulis i wan kiteb ni nabi Yesaya :

“Ara ling ni sara jema si metuk

i padang gurun :

Siepen renyel jelen ni Tuhen,

tosen lurus jelen-É.

5 Setiep geldok malé itimun,

den setiep bur urum buntul

malé iratanen,

den si mugegedok malé ilurusen,

den si muluang mujadi

jelen si rata;

6 den kasé bèwèné jema munèngon keselamaten si ari Allah.”

7 Den iperin Yohanes ku jema delé si gèh ku wé kin ibaptis, kené : “Woi, keturunen ni lipé, sahan si muperingeten kam kin munyangkanen diri ari hukumen si malé gèh puren?

8 Entap ni oya, hasilenle uah si sesué urum petobaten; den enti muloi becerak  sesabé diri ni kam : Abraham oya ama ni kami; sebeb kuperinen ku kam bahwa Allah sangup mujadinen anak-anak kin Abraham ari atu-atu ni!

9 Besilo pé galang nge sedie i uyet ni batang kayu; entap ni oya jep batang kayu si gere muhasilen uah si jeroh kasé itebang nye itekaren ku wan rara.”

10 Renyel jema delé a mungune ku wé, kené : “Ike beta, sana si turah kami bueten?”

11 Jeweb Yohanes, iperiné ku pakea : “Jema si munempui roa baju turah munosah sara ku si gere munempui, den jema si munempui pemanganan turah mubueten lagu oya pé.”

12 Den penagih pajak pé gèh kin ibaptis, nye iperin pakea ku wé : “Guru, sana si turah kami bueten?”

13 Iperin Yohanes ku pakea : “Enti munagih lebih ari sana si nge iperintahen kin ibueten kam.”

14 Prajurit-prajurit pé mungune ku wé, kené : “Den kami, sana si turah kami pebuet?” Iperin Yohanes ku pakea : “Enti mumeras urum ancaman atawa tuduhen pelsu, den puesle urum gajimu.”

15 Waktu oya jema-jema tengah munantinen den bèwèné pekekune i wan atéwé tentang Yohanes, kedang wé nile Kristus oya.

16 Jeweb Yohanes, iperiné ku bèwèné jema wa : “Aku ni mubaptis kam urum wih; tetapé Wé si lebih bekuasa ari aku malé gèh, muluahen tali ni sepatu-É pé aku gere layak; Wé malé mubaptis kam urum Roh Kudus den rara.”

17 Niu-É ara i pumu-É kin mubersihen ton penanginen-É nye kin mungamulen gandum-É ku wan keben, tapé sekam a malé itèlong-É wan rara si gere terempoten.

18 Urum delé nasèhat si lèn Yohanes mungeberen Injil ku jema delé a;

19 tetapé Herodes reje wilayah, itegor Yohanes entap ni Herodias, banan ni serinené; den entap ni bèwèné kejahaten si nge ipebuet Herodes,

20 reje a pé munamah kejahatené urum munayonen Yohanes ku wan penjere.

Yesus ibaptis 3: 21-22

(Mat. 3:13-17; Mrk. 1:9-11; Yoh. 1:32-34)

21 Den terjadile, ketike bèwèné jema delé a nge ibaptis, den ketike Yesus pé ibaptis nye tengah bedoà, langit muke

22 den Roh Kudus turun ku atas-É wan ujut jasmani lagu manuk birahpati, nye tenengéle ling ari serge : “Kole Anak-Ku si Kukasihi, kin Kole Aku bekenak.”

Silsilah ni Yesus 3: 23-38 (Mat. 1:1-17)

23 Yesus berumur kire-kire tige puluh tun waktu mumuloi buet-É. Nalam ni jema, Wé anak ni Yusup, anak ni Éli,

24 anak ni Mattat, anak ni Lewi, anak ni Melki, anak ni Yanai, anak ni Yusup,

25 anak ni Matatias, anak ni Amos, anak ni Nahum, anak ni Esli, anak ni Nagai,

26 anak ni Maat, anak ni Matatias, anak ni Simei, anak ni Yosek, anak ni Yoda,

27 anak ni Yohanan, anak ni Resa, anak ni Zerubabel, anak ni Sealtiel, anak ni Neri,

28 anak ni Melki, anak ni Adi, anak ni Kosam, anak ni Elmadam, anak ni Er,

29 anak ni Yesua, anak ni Eliezer, anak ni Yorim, anak ni Marat, anak ni Lewi,

30 anak ni Simeon, anak ni Yehuda, anak ni Yusup, anak ni Yonam, anak ni Eliakim,

31 anak ni Malia, anak ni Mina, anak ni Matata, anak ni Natan, anak ni Daud,

32 anak ni Isai, anak ni Obed, anak ni Boas, anak ni Salmon, anak ni Nahason,

33 anak ni Aminadap, anak ni Admin, anak ni Arni, anak ni Hesron, anak ni Peres, anak ni Yehuda,

34 anak ni Yakup, anak ni Ishak, anak ni Abraham, anak ni Terah, anak ni Nahor,

35 anak ni Seruh, anak ni Rehu, anak ni Peleh, anak ni Heber, anak ni Selah,

36 anak ni Kenan, anak ni Arpaksad, anak ni Sem, anak ni Nuh, anak ni Lamek,

37 anak ni Metusalah, anak ni Henok, anak ni Yaret, anak ni Mahalalel, anak ni Kenan,

38 anak ni Enos, anak ni Set, anak ni Adam, anak ni Allah.