Lukas 4

Penyubeen i padang gurun 4: 1-13

(Mat. 4:1-11; Mrk. 1:12-13)

Den Yesus engkip urum Roh Kudus ulak ari wih Yordan, renyel imai Roh Kudus a Wé ku padang gurun,

2 i oné Wé empat puluh lo icubei Belis. Wé gere mangan sanah pé selama waktu oya, den ketike waktu oya berakhir, Yesus pé mulapé.

3 Renyel iperin Belis a ku Yesus : “Ike Ko Anak ni Allah, perintahen renyel atu ni mujadi ruti.”

4 Jeweb Yesus ku wé : “Ara tertulis : Manusie murip nume ari ruti pelin we.”

5 Renyel Belis mumai Yesus ku ton si atas nye munuruhen ku Wé seluruh kerejeen denie wan sekejeb mata.

6 Iperin Belis a ku Wé : “Ku Ko malé kuosanen bèwèné kuasa ni urum kemuliené, sebeb bèwèné oya nge iosanen kin naku, den aku munosanené ku sahan pé si kukenaki;

7 entap ni oya, ike Ko sujut munyemah aku, bèwèné ni Kole si munempuié.”

8 Jeweb Yesus, iperin-É ku wé : “Ara tertulis : Ko turah munyemah Tuhen Allahmu den ku Wé pelin we ko beribadah!”

9 Renyel Belis mumai Yesus ku Yerusalem den munobonen-É i atas bubung Bait ni Allah, nye iperiné ku Wé : “Ike Ko Anak ni Allah, tuhen renyel diri-Mu ku tuyuh.

10 Sebeb ara tertulis : Tentang Ko, Wé malé mumerintahen malèkat-malèkat-É kin mulinungi Ko,

11 den pakea munengkam Ko i atan ni pumué, kati kiding-Mu enti muantuk ku atu.”

12 Jeweb Yesus nye iperin-É ku wé : “Ara tertulis : Enti ko munyubei Tuhen Allahmu!”

13 Nge mari Belis munyelesénen setiep penyubeen oya, beluhle wé ari Yesus sawah ara kesempaten si lèn.

Yesus ulak ku Galilea 4: 14-15

(Mat. 4:12-17; Mrk. 1:14-15)

14 Renyel Yesus ulak urum kuasa Roh ku Galilea; den musierle keber tentang Wé i seluruh daerah a.

15 Den Wé munejer i umah-umah ibedet ni pakea, nye bèwèné jema mumuji Wé.

Yesus itulak i Nazaret 4: 16-30

(Mat. 13:53-58; Mrk. 6:1-6)

16 Renyel sawahle Yesus i Nazaret, ton Wé ikulen; den munurut kebiasaen-É, Wé mayo ku umah ibedet tar lo Sabat, nye sesuk kin mubaca Kiteb Suci.

17 Den kiteb nabi Yesaya iosanen ku Wé. Mari iuke-É gulungen kiteb a, Wé mudemunen ayat si tertulis :

18 “Roh Tuhen ara i Aku,

entap ni Wé nge mungurapi

Aku kin mungeberen

Injil ku jema

miskin;

den Wé nge munutus Aku

19 kin mungeberen

pembebasen kin

jema tawanen,

den penèngonen kin

jema mbota,

kin mubebasen

jema si tertindes,

kin mungeberen tun

kasih karunie ni Tuhen nge gèh.”

20 Renyel itutup-É kiteb a nye iulaken-É ku petuges, nye kunul; den mata ni bèwèné jema wan umah ibedet a mutuju ku Wé.

21 Den muloile Wé mumerin ku pakea : “Serloni ayat Kiteb Suci ni nge igenapi sewaktu ipengé kam.”

22 Bèwèné jema wa mubenaren Wé den hèran kin peceraken si jeroh si tangkuh ari awah-É, nye iperin pakea : “Gere ke Wé ni Anak ni Yusup?“

23 Iperin Yesus ku pakea : “Pasti kam mumerinen perumpamaen ni ku Aku : Dokter, jegerenle diri-Mu ken diri; sana si kami pengé si ibueten Ko i Kapernaum, bueten renyel i sien pé, i ton asal-Mu.”

24 Den iperin-É : “Sesunguhé Kuperinen ku kam bahwa gere ara nabi ihormati i ton asalé.

25 Tetapé benar si Kuperinen ni ku kam, waktu jemen ni Elia ara delé jema balu i Israel, ketike langit mututup selama tulu tun onom bulen den terjadi bencana kelapenen si olok i seluruh negeri a,

26 den Elia gere ikini ku sara ari pakea, tapé ku sara jema balu i Sarpat i tanoh Sidon.

27 Den waktu jemen ni nabi Elisa ara delé jema si sakit buduk i Israel, den gere sara jema pé ari pakea ijegeren, kecuali Naaman urang Siria wa.”

28 Ketike mumengé peceraken oya, bèwèné jema si ara i umah ibedet a olok pedéh bengis.

29 Pakea uet den munusir Yesus ku deret ni kute, nye mumai-É ku geniring ni bur, ton kute ni pakea ibangun, kin munetuhen-É ku tuyuh ni arul;

30 tapé Yesus remalan ari lelah ni pakea, nye beluh.

Yesus munusir roh jahat i umah ibedet 4: 31-37

(Mrk. 1:21-28)

31 Renyel Yesus beluh ku Kapernaum, sara kute i Galilea. I oné Wé munejer pakea tar lo Sabat;

32 den pakea takjub kin penejeren-É, sebeb Wé munejer urum kuasa.

33 I wan umah ibedet a, ara sara jema si kerasuken roh jahat, den wé musarik urum ling keras, kené :

34 “Hana urusen-Mu urum kami, Yesus urang Nazaret? Ko gèh kin mubenasanen kami ke? Kubetih sahan Ko, si Kudus ari Allah.”

35 Den Yesus mugerantang wé, ken-É : “Ongot, tangkuh renyel ari jema ni!” Renyel iempas-empas ni setan a jema wa ku lelah ni pakea, den tangkuhle wé ari jema wa urum gere munyakitié.

36 Pakea bèwèné takjub nye becerak sara urum si lèn, kené : “Pecerakan hana ke ini? Sebeb urum wibawa den kuasa Wé mumerintahen roh-roh jahat, den pakea tangkuh!”

37 Den meshurle keber tentang Yesus ku seluruh daerah sekiteré.

Yesus mujegeren inen tue ni Simon Petrus urum delé jema 4: 38-41

(Mat. 8:14-17; Mrk. 1:29-34)

38 Renyel Yesus tangkuh ari umah ibedet a nye mayo ku wan umah ni Simon. Inen tue ni Simon tengah sakit segé, den pakea muniro ku Yesus kati munulung wé.

39 Den Wé sesuk i rapé nye mugerantang segé a, den segéé a munaringené; seketike oya pé wé uet nye mulayani pakea.             

40 Ketike matanlo mutelnom, bèwèné jema mumai ku Yesus jema  sakiten urum berbagé-bagé penyakit; den Wé mumarinen pumu-É ku atas ni pakea masing-masing, nye mujegeren pakea.

41. Den setan-setan pé tangkuh ari delé jema sesire metuk, kené : “Kole Anak ni Allah.” Tetapé Yesus mugerantang pakea den gere munijinen pakea becerak, sebeb ibetihi pakea bahwa Wé le Kristus.

Yesus munejer i umah-umah ibedet 4: 42-44

(Mrk. 1:35-39)

42 Ketike malé ruhul, tangkuhle Yesus nye beluh ku ton si sengap; den jema delé a mungenal Wé, nye gèh ku Wé, den munehen kati enti munaringen pakea.

43 Tetapé iperin Yesus ku pakea : “Aku turah mungeberen Injil Kerejeen ni Allah ku kute-kute si lèn pé, entap kin oyale Aku iutus.”

44 Den Wé pé munejer i wan umah-umah ibedet i Yudea.