Lukas 5

Yesus munalu murid-murid si pemulo 5: 1-11

(Mat. 4:18-22; Mrk. 1:16-20)

I sara waktu, jema delé bedesaken muringkeli Yesus kin mumengé peceraken ni Allah, den Wé  sesuk i geniring ni danau Genesaret.

2 Ièngon-É roa perau i geniring ni danau a; tapé nelayan-nelayané nge turun ari perau a den tengah mubasuh jeleé.

3 Yesus nik ku wan sara ari perau-perau a, empu ni Simon, nye ikini-É wé munulaken peraué gipen pora ari dereten; renyel Wé kunul nye munejer jema delé ari perau a.

4 Den ketike Wé selesé becerak, iperin-É ku Simon : “Tulaken peraumu ku ton si relem, nye sempaken jelemu kin munengkam gulè.”

5 Jeweb Simon, kené : “Guru, sara kelemen kami nge bebuet, kami gere demu sanah pé; tetapé entap cerak ni Guru, aku mera munyempaken jele ni.”

6 Nge mari mubuetené, pakea mudepet olok pedéh delé gulè; sehinge jele ni pakea muloi murèbèk.

7 Den pakea munosah tene ku pong-pongé i perau si lèn kati gèh munempuhi pakea; den pakea gèh nye munisi roané perau a sehinge malé mutelnom.

8 Waktu Simon Petrus munèngoné, sujutle wé i kiding ni Yesus, kené : “Beluhle ari aku Tuhen, sebeb aku ni jema bedosa.”

9 Sebeb wé den bèwèné jema si urum wé takjub munèngon delé ni gulè si nge itengkam pakea.

10 Betapé Yakobus urum Yohanes, anak-anak ni Zebedeus, si murum urum Simon. Iperin Yesus ku Simon : “Enti terih, ari besilo ni mi ko malé mujadi penjele manusie.”

11 Den nge mari munegu perau-perau a ku dereten, pakea munaringen segeleé nye mununung Yesus.

Yesus mujegeren sara jema mubuduk 5: 12-16

(Mat. 8:1-4; Mrk. 1:40-45)

12 Ketike Yesus ara i sara kute, gèhle sara jema engkip urum buduk; waktu ièngoné Yesus, sujutle jema wa nye muniro ku Wé, kené : “Tuhen, ike Tuhen mera, Tuhen lepas mujegeren aku.”

13 Renyel Yesus mujurahen pumu-É nye munamaté, ken-É : “Aku mera, jeger mi le ko.” Seketike oya pé buduké a munaringené.

14 Den Yesus bemanat ku wé : “ Enti sederen ku sahan pé, tapé beluh renyel, turuhen dirimu ku imem, den osanenle pesemahen si iperintahen Musa sebagé bukti ku pakea.”

15 Tetapé keber tentang Yesus makin musier, den delé jema mukerumung kin mumengé Wé nye kin ijegeren ari kelemahen ni pakea.

16 Tapé Wé mungelehen diri ku ton si sengap nye bedoà.

Yesus mujegeren jema lumpuh 5: 17-26

(Mat. 9:1-8; Mrk. 2:1-2)

17 I sara waktu, ketike Yesus munejer, urang Parisi urum ahli-ahli Taurat kunul i oné, pakea gèh ari jep kampung i Galilea, Yudea den Yerusalem; den kuasa ni Tuhen ara i was ni Wé kin mujegeren jema.

18 Den èngonle, pepien jema munemah sara jema lumpuh i atan ton noméwé, den pakea berusaha mumaié ku was nye munobonené i arap ni Yesus.

19 Tetapé pakea gere mudemunen cara mumaié ku was entap ni olok delé jema, sehinge pakea nik ku supu ni umah a, den mulalui supu a pakea munurunen jema wa urum ton noméwé ku lelah pas i arap ni Yesus.

20 Ketike ièngon Yesus imen ni pakea, iperin-É : “O serinen, dosamu nge iampuni.”

21 Renyel ahli-ahli Taurat urum urang Parisi muloi bepikir wan atéwé : “Sahan ke Jema ni si mungucepen hujeten? Sahan si lepas munampuni dosa kecuali Allah we?”

22 Tetapé Yesus mubetihi pikiren ni pakea, Wé mujeweb pakea, ken-É : “Hana kati kam bepikir lagu noya i wan atému?

23 Sihen si lebih murah mumerinen : Dosamu nge iampuni, atawa mumerinen : Uet, nye remalanle?

24 Tetapé gelah ibetihi kam bahwa Anak ni Manusie bekuasa i denie ni munampuni dosa” – iperin Yesus ku jema lumpuh oya – : “Kuperinen ku ko, uetle, nye tatangen ton nomému, ulak mi renyel ku umahmu!”

25 Seketike oya pé wé uet i arap ni pakea, itatangé ton noméwé si iatasé wé pegulang, wé ulak ku umahé nye mumulienen Allah.

26 Den pakea bèwèné takjub nye mumulienen Allah, den urum perasaen terih mumerin : “Serloni kami nge munèngon hal si luer biese.”

Lewi penagih pajak mununung Yesus 5:27-32

(Mat. 9:9-13; Mrk. 2:13-17)

27 Nge mari oya Yesus tangkuh, nye ièngon-É sara penagih pajak begeral Lewi tengah kunul i kantur pajak, iperin-É ku wé : “Tunungle Aku!”

28 Den wé uet, itaringené bèwèné, renyel mununungi Yesus.

29 Renyel Lewi munaranen sara pejamuen kul kin Yesus i umahé; den i oné olok delé penagih pajak den jema-jema lèn kunul mangan urum pakea.

30 Urang Parisi urum ahli-ahli Taurat cembebèk ku murid-murid ni Yesus,

kené : “Hana kati kam mangan minum urum penagih pajak den jema bedosa?”

31 Den ijeweb Yesus, iperin-É ku pakea : “Jema sehat gere mumerlunen dokter, tapé pakea si sakiten;

32 Aku gèh nume kin munalu jema benar tapé jema bedosa kati betobat.”

Tentang bepasa 5: 33-39

(Mat. 9:14-17; Mrk. 2:18-22)

33 Renyel iperin pakea ku Yesus : “Murid-murid ni Yohanes gati bepasa urum bedoà, betapé murid-murid ni urang Parisi; tapé murid-murid-Mu mangan minum.”

34 Den iperin Yesus ku pakea : “Nguk ke kam mungini rakan sebet ni aman mayak bepasa, sewaktu aman mayak a ara ilen urum pakea?

35 Tetapé waktué malé gèh, ketike aman mayak iueten ari pakea, i waktu oyale pakea malé bepasa.”

36 Renyel Yesus pé mumerinen sara perumpamaen ku pakea : “Gere sara jema pé murèbèken sara ruje ari baju si ayu nye munampalené ku baju si nge tue; ike lagu noya, wé murèbèk baju si ayu a, den ruje si ayu a pé gere cocok urum baju si nge tue a.

37 Den gere sara jema pé munayonen anggur si ayu ku was ni kantong kulit si tue; ike lagu noya, anggur si ayu a malé mubeltaken kantong kulit a nye anggur a mamur den kantong kulit a pé cir.

38 Tetapé anggur si ayu turah iayonen ku was ni kantong kulit si ayué.

39 Den gere sara jema pé si nge minum anggur si tue ménét anggur si ayu; sebeb iperiné, anggur si tue a lebih jeroh.”