Lukas 7

Yesus mujegeren temuluk ni perwira i Kapernaum 7: 1-10

(Mat. 8:5-13)

Nge mari Yesus munyelesénen bèwèné pecerakan-É i arap ni jema delé, Wé mayo ku Kapernaum.

2 I oné ara sara perwira si munempui sara temuluk si tengah sakiten malé benasa, si olok pedéh ikasihié.

3 Ketike perwira wa mumengé tentang Yesus, ikinié ku Wé petue-petue ni urang Yahudi, muniro ku Wé kati gèh nye mujegeren temuluké a.

4 Waktu pakea gèh ku Yesus, urum sunguh itiro pakea ku Wé, kené : “Wé layak itulung Guru,

5 sebeb wé mungasihi bengsante den wé nge mubangun umah ibedet kin kite.”

6 Renyel Yesus beluh urum pakea. Waktu Wé gere gip ne ari umah ni perwira wa, ikini perwira wa rakan sebeté ku Wé, kené : “Tuhen,  gere daléh Tuhen  bekejang payah, sebeb aku gere layak munerime Tuhen i wan umahku;

7 oya kati aku pé munanggap diringku gere layak gèh ku Tuhen, tetapé perinen padéh sara cerak, temulukku a pasti jeger.

8 Sebeb aku pé jema bawahen nye i tuyuhku ara prajurit, den ike kuperinen ku sara prajurit ni : Beluh, den wé pé beluh; den ku si lèn : Gèh renyel, wé pé gèh; den ku temulukku : Bueten ini, wé pé mubuetené.”

9 Waktu Yesus mumengé pecerakan ni, hèranle Wé, nye mubalik ku jema delé si mununungi-É, ken-É : “Kuperinen ku kam, bahkan i Israel Aku gere mudemunen imen si lagu ini.”

10 Ketike jema-jema si ikini a ulak ku umah, pakea mudepeti temuluk a nge jeger.

Yesus mubangkiten anak rawan ni jema balu 7: 11-17

11 Renyel lang loé, Yesus beluh ku sara kute si begeral Nain; murid-murid-É urum bèwèné jema delé pé beluh urum Wé.

12 Den ketike Wé mudekati pintu gerbang ni kute a, ara jema-jema tengah munarang mèt ni anak bujang ku deret ni kute, anak tungel ni ineé si nge balu, den delé jema ari kute a munurumi wé.

13 Waktu Tuhen munèngon jema banan a, mugerakle até-Wé entap ni kasih ku wé, nye iperin-É ku wé : “Enti mongot.”

14 Renyel Yesus mudekati tandu a nye munamaté, den pakea si munarang a teduh den sesuk, nye iperin-É : “Win, Kuperin ku ko : Uet renyel!”

15 Den jema si benasa wa pé kunul nye muloi becerak, renyel Yesus munyerahené ku ineé.

16 Keterihenle bèwèné jema wa, den pakea mumulienen Allah, kené : “Sara nabi si kul nge timul i antara kite, den Allah nge munentongi umet-É.”

17 Den meshurle keber tentang Yesus i seluruh Yudea urum i seluruh daerah sekiteré.

Yesus urum Yohanes Pembaptis 7: 18-35

(Mat. 11:2-19)

18 Murid-murid ni Yohanes mulapuren bèwèné peristiwe a ku Yohanes. Renyel wé munalu roa jema ari murid-muridé,

19 nye ikinié pakea ku Tuhen kin mumerin : “Guru ke si malé gèh oya, atawa turah ke kami munantinen jema si lèn?”

20 Waktu roané gèh ku Yesus, iperin pakea : “Yohanes Pembaptis mungini kami ku Guru, mumerin : “Guru ke si malé gèh oya, atawa turah ke kami munantinen jema si lèn?”

21 I waktu oya Yesus mujegeren delé jema ari penyakit, ari penderiteen urum ari roh jahat, den mungarunienen penèngonen ku delé jema si mbota.

22 Den Yesus mujeweb, iperin-É ku pakea : “Beluhle nye sederen ku Yohanes sana si ièngon urum ipengé kam : Jema mbota munèngon, jema lumpuh remalan, jema mubuduk mujadi bersih, den jema mutuli mumengé, jema benasa ibangkiten, kin jema miskin ikeberen Injil.

23 Mubahgie mi jema si gere muragunen Aku.”

24 Mari utusen ni Yohanes a beluh, Yesus muloi becerak ku jema delé a tentang Yohanes : “Kin munèngon hana ke kam beluh ku padang gurun? Sara batang uluh si iiup kuyu ke?

25 Atawa kin munèngon hana ke kam beluh? Jema si munyeluk pekayan alus ke? Sesunguhé jema si bepekayan mampat nye murip wan kemewahen ara i was istana ni reje.

26 Atawa kin munèngon hana ke kam beluh? Munèngon nabi ke? Betul, Kuperinen ku kam, bahkan lebih ari nabi.

27 Tentang wé inile si ara tertulis : Èngonle, Aku mungini

utusen-Ku munuloi Ko,

si malé munyiepen

jelen-Mu i arap-Mu.

28 Kuperinen ku kam, i antara bèwèné jema si ilahiren jema banan, gere ara si lebih kul ari Yohanes; tetapé si paling kucak i wan Kerejeen ni Allah lebih kul ari wé.”

29 Bèwèné jema si mumengé-É urum penagih pajak mungakui kebenaran ni Allah, pakea ibaptis urum baptisan Yohanes.

30 Tetapé urang Parisi urum ahli-ahli Taurat gere munerime rencana ni Allah kin dirié, pakea gere mera ibaptis Yohanes.

31 Entap ni oya, urum hana ke Kuumpamanen angkatan besilo ni, den dis lagu hana ke pakea?

32 Pakea dis lagu kekanak si tengah kunul i ton kekanak dediang si mumerin sara ku si lèn :

Kami nge muniup suling kin kam, tapé kam gere betari,

kami nge besebuku,

tapé kam gere mongot.

33 Sebeb Yohanes Pembaptis nge gèh, gere mangan ruti urum gere minum anggur, den iperin kam : Wé kerasuken setan.

34 Anak ni Manusie gèh, mangan urum minum, den iperin kam : Èngonle, Wé jema pelahap urum peminum anggur, pong ni penagih pajak urum jema bedosa!

35 Bierpé lagu oya, hikmat ni Allah terbukti ari bèwèné jema si munerimeé.”

Yesus munampuni jema banan  bedosa 7: 36-50

36 Sara ari urang Parisi munajak Yesus mangan; den Wé mayo ku wan umah ni urang Parisi a nye kunul mangan.

37 I wan kute a ara sara jema banan bedosa; waktu ibetihié bahwa Yesus tengah kunul mangan i umah urang Parisi a, imahé sara botol pualam berisi minyak wangi.

38 Wé sesuk i kuduk, rap kiding ni Yesus sesire mongot, den wé muloi mubasahi kiding-É urum luh mataé nye munyapué urum wuké, renyel icumné kiding-É nye isapué urum minyak wangi.

39 Tetapé waktu urang Parisi si munangon Yesus munèngon hal oya, wé becerak wan atéwé : “Ike Jema ni nabi, tentu ibetihi-É sahan den jema banan lagu hana si munamat-É, kerna wé jema bedosa.”

40 Den iperin Yesus ku wé : “Simon, ara si malé Kuperinen ku ko.” Isuté : “Perinen Guru renyel.”

41 “Arale roa jema si mutang ku sara jema si munosah pinyemen; sara mutang lime ratus dinar, si lèné a lime puluh dinar.

42 Kerna reroané gere munempui sanah pé kin muneberié, iosopené utang ni pakea. Besilo sahan ke ari pakea si lebih mungasihi wé?”

43 Jeweb Simon, kené : “Kirengku kin sahan wé munosopen utang si lebih kul.” Iperin Yesus ku wé : “Betul kekiremu a.”

44 Renyel sesire mubalik ku jema banan a, iperin-É ku Simon : “Ièngon ko jema banan ni? Aku mayo ku wan umahmu, gere iosah ko wih kin mubasuh kiding-Ku; tetapé jema banan ni mubasahi kiding-Ku urum luh mataé nye munyapué urum wuké.

45 Ko gere munyium Aku; tetapé jema banan ni ari Aku mayo mi gere teduh munyium kiding-Ku.   

46 Ko gere munyapu ulung-Ku urum minyak, tetapé jema banan ni munyapu kiding-Ku urum minyak wangi.

47 Entap ni oya Kuperinen ku ko, dosaé si delé oya nge iampuni, sebeb wé olok mungasihi; tetapé kin wé si tikik iampuni, wé pé tikik mungasihi.”

48 Renyel iperin Yesus ku jema banan a : “Dosa-dosamu nge iampuni.”

49 Den pakea si kunul mangan urum Wé muloi becerak sesabé dirié : “Sahan ke Jema ni, sehinge lepas munampuni dosa?”

50 Tetapé iperin Yesus ku jema banan a : “Imenmu nge munyelamaten ko; beluh renyel urum damé.”