Lukas 8

Jema-jema banan si mulayani Yesus 8: 1-3

Gere lemem mari oya Yesus muralani jep kute urum kampung kin mungeberen kerejeen ni Allah; den kedue belas murid urum Wé,

2 betapé pepien jema banan si nge ijegeren-É ari roh-roh jahat urum bagé-bagé penyakit, Maria si igerali Magdalena, si nge tangkuh pitu setan ari wasé,

3 Yohana banan ni Kuza, bendahara ni Herodes, Susana urum delé jema banan lèn, si mulayani rombongen a urum kekayaen ni pakea.

Perumpamaen tentang jema penyuk 8: 4-15

(Mat. 13:1-23; Mrk. 4:1-20)

4 Ketike jema delé tengah mukamul den jema-jema ari jep kute gèh ku Yesus, Wé munejer wan sara perumpamaen :

5 “Arale sara jema penyuk tangkuh kin munyuk inihé. Waktu wé munyuk ara inih si metuh i dené nye iperjak-perjak, den manuk-manuk i langit mumangané.

6 Den sèba metuh i atan tanoh si muatu-atu, nge mari murip, wé layu entap tanohé gere bengem.

7 Sèba mi metuh i lah ni tamas murui, den tamas a pé murip urum inih a, nye munyepité.

8 Den sèba metuh i tanoh si jeroh, renyel murip den muhasilen uah seratus kali lipet.” Nge mari iperin Yesus hal ni, muserukle Wé : “Sahan si munempui kemiring kenakné wé mumengé!”

9 Renyel murid-murid-É mungune ku Wé sana arti ni perumpamaen ni.

10 Iperin Yesus : “Kin kam nge iosah karunie kin mubetihi resie Kerejeen ni Allah, tetapé kin jema lèn a wan perumpamaen kati pakea munèngon, tapé gere ièngoné den pakea mumengé, tapé gere ipehemié.

11 Inile arti ni perumpamaen a : Inih a oyale kata ni Allah.

12 Si metuh i dené a oyale pakea si mumengé, renyel gèhle Belis nye munuet kata ni Allah oya ari até ni pakea, kati enti pakea percaya nye iselamaten.

13 Den si metuh i atan tanoh si muatu-atu, oyale pakea si waktu mumengé kata ni Allah oya munerimeé urum galak ni atéwé; tapé gere muuyet, pakea percaya sekejeb we den waktu cubeen gèh, pakea pé munur.

14 Den si metuh i lah ni tamas murui, oyale pakea si mumengé, tapé wan murip ku arapé pakea isepit ni pekekit naté, kekayaen urum kesenangen ni murip, den gere muhasilen uah si semperne.

15 Tetapé si metuh i tanoh si jeroh, oyale pakea si mumengé kata ni Allah oya nye mungemasé wan atéwé si jeroh, renyel beseber sawah muhasilen uah.”

Perumpamaen tentang lampu   8:16-18

(Mrk. 4:21-25)

16 “Gere sara jema pé mumasang lampu nye munutupié urum gantang atawa munobonené i tuyuh ni penomen, tetapé munobonené ku ton si atas, kati jema si mayo ku was lepas munèngon cayaé.

17 Sebeb gere ara si mutuni si gere malé ituruhen puren, atawa gere ara si resie si gere malé ibetihi den ituruhen puren.

18 Entap ni oya, perhatinenle kune kam mumengé, sebeb sahan si munempui, ku wé malé iosanen; den sahan si gere munempui, bahkan sana si inalamé empué malé iueten ari wé.”

Ine urum serinen-serinen ni Yesus 8:19-21

(Mat. 12:46-50; Mrk. 3:31-35)

19 Renyel ine urum serinen-serinen ni Yesus gèh ku Wé, tetapé pakea gere lepas mudemui Wé entap ni jema delé.

20 Den ara jema si munyederen ku Wé : “Ine urum serinen-serinen ni Guru tengah sesuk i deret ménét mudemui Guru.”

21 Tetapé Yesus mujeweb, iperin-É ku pakea : “Ineng-Ku urum serinen-serinen-Ku oyale pakea si mumengé nye mubueten kata ni Allah.”

Yesus muredenen kuyu badé 9: 22-25

(Mat. 8:23-27; Mrk. 4:35-41)

22 I sara lo Yesus urum murid-murid-É nik ku wan perau, nye iperin-É ku pakea : “Entah mi kite beluh ku serap ho.”

23 Waktu pakea tengah belayar, Yesus nome. Renyel turunle kuyu badé ku danau a sehinge perau a iengkipi wih den pakea wan bele.

24 Den gèhle pakea murungunen Yesus, kené : “Guru, Guru, kite benasa!” Wé  pé uet nye mugerantang kuyu urum gelumang si mengas a; den kuyu urum gelumang a pé teduh nye danau mujadi tenang pedéh.

25 Renyel iperin-É ku pakea : “Isihen ke imenmu?” Den pakea terih den murasa hèran, renyel becerak sara urum si lèn : “Sahan ke Jema ni, si mumerintahen kuyu urum wih, den pakea patuh ku Wé?“

Yesus mujegeren jema si kerasuken setan 8: 26-39

(Mat. 8:28-34; Mrk. 5:1-20)

26 Renyel pakea belayar ku tanoh urang Gerasa si i semelah ni Galilea.

27 Mari Yesus turun ku dereten, Wé mudemu urum sara jema ari kute a si irasuk setan, nge mokot wé gere berupuh, den gere taring i umah tapé i pekuburen.

28 Waktu ièngoné Yesus, wé metuk nye sujut i arap-É den mumerin urum ling keras : “Hana urusen-Mu urum aku, woi Yesus, Anak ni Allah Si Mahaatas?  Kutiro ku Ko, enti sikse aku.”

29 Iperiné lagu oya kerna Yesus nge mumerintahen roh jahat a tangkuh ari jema wa. Sebeb nge mupepieni wé irasuki roh jahat a, den wé iranté urum igari kin mujegeé, tapé ranté urum gari a mèh itusenné, renyel imai setan a wé ku ton-ton si sengap.

30 Den Yesus mungune ku wé : “Sahan geralmu?” iperiné : “Legion,”entap delé setan si mayo ku wan wé.

31 Renyel setan-setan a muniro ku Yesus kati enti ikini-É pakea beluh ku jurang maut.

32 Arapé i oné ara sara kawanan babi si olok pedéh delé tengah mungenal pakan i geniring ni bur, den pakea muniro ku Wé kati munijinen pakea mayo ku wan ni babi-babi a; den Yesus munijinené.

33 Renyel tangkuhle setan-setan a ari jema wa nye mayo ku wan ni babi-babi a, den kawanan babi a terjun ari geniring ni arul ku was ni danau nye maté lemas.

34 Waktu penjege-penjege babi a munèngon sana si nge terjadi, pakea musangka nye munyederen hal oya i kute urum i kampung-kampung.

35 Den tangkuhle jema-jema kin munèngon sana si nge terjadi, den pakea gèh ku Yesus nye idemui pakea jema si nge itaringen setan-setan a kunul i kiding ni Yesus, nge berupuh den nge seder; den terihle pakea.

36 Jema-jema si nge munèngoné munyederen ku pakea kune jema si kerasuken setan a nge ijegeren.

37 Renyel seluruh penduduk daerah Gerasa muniro ku Yesus kati beluh ari pakea, sebeb pakea olok pedéh itimpe keterihen; oya kati Yesus nik ku wan perau, nye ulak.

38 Jema si nge itaringen setan-setan a muniro kati ienguken mununung Wé; tapé Yesus munginié beluh, ken-É :

39 “Ulak mi ku umahmu, nye sederen sana si nge iperbuet Allah kin ni ko.” Den wé pé beluh mungeberen ku seluruh kute sana si nge iperbuet Yesus ku dirié.

Yesus mubangkiten anak banan ni Yairus urum mujegeren sara jema banan 8: 40-56

(Mat. 9:18-26; Mrk. 5:21-43)

40 Ketike Yesus ulak, Wé isamut jema delé; sebeb pakea bèwèné nge munantinen Wé.

41 Den gèhle sara jema si begeral Yairus, kepala umah ibedet; wé sujut i kiding ni Yesus sesire muniro ku Yesus kati gèh ku umahé,

42 entap anak berué si tungel, si berumur kire-kire due belas tun malé benasa. Waktu Yesus remalan, jema delé pé munimpit-nimpit Wé.

43 Den arale sara jema banan si nge due belas tun lememé muderite sakit pendarahen, den bierpé nge imèhené si ara i wé kin munuakié, tapé gere sara jema pé lepas mujegerené.

44 Gèhle jema banan a ari kuduk nye mujontok reramu jubah ni Yesus, den seketike oya pé teduhle pendarahené a.

45 Renyel iperin Yesus : “Sahan ke si mujontok Aku?” Ketike bèwèné munyangkalé, iperin Petrus : “Guru, jema delé mungerumungi urum munimpit Guru.”

46 Tetapé iperin Yesus : “Ara jema si mujontok Aku; sebeb Aku murasa ara kuasa si nge tangkuh ari diring-Ku.”

47 Waktu ièngon jema banan a bahwa wé gere lepas temuni, gèhle wé urum mugegir nye sujut i arap ni Yesus sesire munyederen i arap ni bèwèné jema hana sebebpé wé mujontok-É den kune wé nge ijegeren seketike oya pé.

48 Renyel iperin Yesus ku wé : “O anak-Ku, imenmu nge mujegeren ko; beluhle urum damé.”

49 Tengah Yesus becerak ilen, gèhle jema ari umah ni kepala umah ibedet a, kené : “Anak berumu nge benasa; enti ne munyanyanen Guru.”

50 Tetapé Yesus mumengéé, nye mumerin ku Yairus : “Enti terih; percaya padéh, anakmu jeger kasé!”

51 Den ketike nge sawah i umah ni Yairus, gere iijinen-É sahan pé mayo urum Wé kecuali Petrus, Yohanes, Yakobus, den ama urum ine ni anak a.

52 Bèwèné jema besebuku mumongoti anak a. Tetapé iperin Yesus : “Enti mongot; wé gere benasa tapé nomé.”

53 Den pakea mungediki Wé, kerna ibetihi pakea bahwa anak a nge benasa.

54 Tetapé Yesus munamat pumu ni anak banan a nye mumerin : “Woi ipak, uet renyel!”

55 Roh ni anak a ulak mien den seketike oya pé wé uet, renyel Yesus mungini pakea munosah ipak a mangan.

56 Den takjuble jema tueé; tetapé Yesus mungoai pakea munyederen ku sahan pé sana si nge terjadi.