Lukas 9

Yesus munutus kedue belas rasul 9: 1-6

(Mat. 10:5-15; Mrk. 6:7-13)

Renyel Yesus munalu kedue belas murid-É nye iosah-É kekueten urum kuasa ku pakea atas segele setan den kin mujegeren bebagé-bagé penyakit.

2 Den Wé munutus pakea kin mungeberen Kerejeen ni Allah urum mujegeren jema sakiten.

3 Renyel iperin-É ku pakea : “Enti kam munemah sanah pé wan pejelenen, enti munemah tikon, tas, ruti, sèn, atawa pé roa baju.

4 Den ku umah sahan pé kam mayo, taringle i oné sawah kam berangkat ari oné.

5 Den i sihen kam gere iterime, tangkuhle ari kute a nye kepuren dul ari kidingmu sebagé sara kesaksien kin pakea.”

6 Renyel tangkuhle pakea nye beluh ku seluruh kampung mungeberen Injil urum mujegeren jema sakiten ku sihen pé.

Herodes bingung 9: 7-9

(Mat. 14:1-12; Mrk. 6:14-29)

7 Herodes, reje wilayah, mumengé segele si terjadi a, den wé murasa bingung entap ara sèba jema mumerinen bahwa Yohanes nge ibangkiten ari kematénen,

8 den sèba mumerinen bahwa wé Elia, den si lèn mumerinen bahwa sara ari nabi-nabi pudaha nge bangkit.

9 Tetapé iperin Herodes : “Yohanes nge kukerat ulué; tapé sahan ke die Jema ni, si tentang Wé kupengé hal lagu oya?” Den Herodes berusaha kin munèngon Yesus.

Yesus munosah mangan lime ribu jema 9: 10-17

(Mat. 14:13-21; Mrk. 6:30-44; Yoh. 6:1-14)

10 Nge mari ulak rasul-rasul a, isederené ku Yesus bèwèné si nge ibueten pakea. Renyel Yesus mumai pakea pelin we beluh ku sara kute si begeral Betsaida.

11 Tetapé waktu ibetihi jema delé a hal oya, pakea mununungi-É; den Wé munerime pakea nye becerak ku pakea tentang Kerejeen ni Allah, den Wé mujegeren jema-jema si mumerlunené.

12 Waktu lo muloi kelem, gèhle kedue belas murid-É ku Wé, kené : “Kinile jema delé a beluh, kati pakea beluh ku kampung-kampung urum desa-desa sekiter ni mungenal ton pesingahen urum pemanganan, kerna kite i sien i ton si sengap.”

13 Den Wé mumerin ku pakea : “Kamle si munosah pakea mangan.” Tetapé iperin pakea : “Kami munempui gere lebih ari lime ruti urum roa gulè, kecuali kami beluh mubeli pemanganan kin bèwèné jema ni.”

14 Sebeb i oné ara kire-kire lime ribu jema rawan. Renyel iperin Yesus ku murid-murid-É : “Kinile pakea kunul mutetamun, sara tamun kire-kire lime puluh jema.”

15 Den murid-murid mubuetené, nye mungini pakea bèwèné kunul.

16 Renyel Yesus pé munuet lime ruti urum roa gulè a, den munangak ku langit nye mungucep sukur, mari oya Wé mumecah-mecahen ruti a nye munosanené ku murid-murid kati ibagi-baginen ku jema delé a.

17 Den pakea bèwèné mangan sawah korong den pues. Renyel kekerus-kekerus ni ruti a pé ikamulen pakea, due belas keranyang.

Pengakuen ni Petrus tentang Yesus 9; 18-21

(Mat. 16:13-19; Mrk. 8:27-29)

18 I sara waktu, ketike Yesus bedoà seseréng-É, murid-murid urum Wé; renyel Yesus mungune ku pakea, ken-É : “Sahan ke Aku iperin jema delé?”

19 Den pakea mujeweb, kené : “Yohanes Pembaptis, tetapé si lèn mumerin : Elia, den si lèn a mien mumerin : Sara ari nabi-nabi pudaha si nge bangkit.”

20 Renyel iperin Yesus ku pakea : “Tapé munurut kam sahan ke Aku ni?” Den Petrus mujeweb, kené : “Kristus ari Allah.” 

Penyederen pemulo tentang penderiteen urum kebangkiten ni Yesus 9: 22-27

(Mat. 16:20-28; Mrk. 8:30-9:1)

21 Renyel urum keras Yesus mungoai pakea kati enti munyederen hal oya ku sahan pé,

22 ken-É : “Anak ni Manusie turah munangung delé penderiteen nye itulak petue-petue, imem-imem kepala urum ahli-ahli Taurat, renyel iunuh, den i lo ketige ibangkiten.”

23 Nge mari oya iperin Yesus ku bèwèné pakea : “Setiep jema si ménét mununung Aku, wé turah munyangkal dirié nye munarang salibé jep lo, den mununung Aku.

24 Kerna barik sahan ménét munyelamaten nyawaé, wé malé kebenénen nyawaé; tetapé barik sahan kebenénen nyawaé entap ni Aku, wé malé munyelamatené.

25 Sebeb sana guneé jema mudepeten seluruh denie tapé wé benasa atawa kebenénen nyawaé?

26 Sebeb barik sahan kemél entap ni Aku urum pecerakan-Ku, Anak ni Manusie pé kasé puren kemél entap ni jema wa, waktu Wé gèh wan kemulien-É den wan kemulien ni Ama den wan kemulieen malèkat-malèkat si kudus.

27 Tetapé sesunguhé Kuperinen ku kam, ara pepien jema si sesuk i sien si gere mungalami kematénen sawah pakea munèngon Kerejeen ni Allah.”

Yesus ipermulien i atan ni bur 9: 28-36

(Mat. 17:1-8; Mrk. 9:2-8)

28 Kire-kire onom lo mari pecerakan oya, Yesus mumai Petrus, Yohanes urum Yakobus, nye nik ku atan ni bur kin bedoà.

29 Waktu Wé tengah bedoà, salak-É berubah den pekayan-É mujadi putih mukekilet.

30 Den èngonle, roa jema becerak urum Wé, Musa urum Élia,

31 pakea teridah wan kemulien den becerak tentang kematén-É si malé igenapi-É i Yerusalem.

32 Arapé Petrus urum pong-pongé mis nomé; tetapé waktu pakea tejege, pakea munèngon kemulien-É den kedue jema si sesuk urum Wé.

33 Den ketike kedue jema wa mupisah ari Wé, iperin Petrus ku Yesus : “Guru, jeroh pedéh i sien, daténen kami tos tulu tenda, sara kin Guru, sara kin Musa, den sara kin Élia.” Tetapé gere ibetihi Petrus sana si iperiné a.

34 Waktu Petrus mumerinen hal oya, gèhle emun mulongohi pakea; den pakea terih waktu mayo ku wan emun a.

35 Den tenengé ling ari was ni emun a : “Inile Anak-Ku si Kupilih, pengén kamle Wé!”

36 Nge mari ling a teduh, seseréng ni Yesus we teridah i oné. Den pakea tetap ongot, gere munyederen ku sahan pé i waktu oya tentang hal si nge ièngon pakea.

Yesus mujegeren anak rawan si kerasuken roh jahat 9: 37-43a

(Mat. 17:14-21; Mrk. 9:14-29)

37 Renyel lang loné a, waktu pakea turun ari bur a, olok pedéh delé jema mudemui Yesus.

38 Den sara ari jema delé a metuk, kené : “Guru, urum sunguh kutiro kati Guru munèngon anak rawanku, sebeb wé anakku si sara-saraé we. wé anakku sara tungel.

39 Èngonle, roh jahat murasukié, tibe-tibe wé musarik nye iempas-empas roh a dirié sehinge awahé mukoboh; roh jahat a munyikseé den jarang  munaringené.

40 Den nge kutiro ku murid-murid ni Guru gelah munusiré, tapé pakea gere sangup.

41 Jeweb Yesus, ken-É : “Woi angkatan si gere percaya, sidah lemem mi Aku urum kam den seber kin kam? Mai anakmu a ku ini.”

42 Tetapé waktu anak a mudekati Yesus, roh jahat a olok pedéh muempas-empasené ku tanoh; tetapé Yesus mugerantang roh a, nye mujegeren win a, den munyerahené ku amaé.

43a Den takjuble bèwèné jema atas kemulien ni Allah oya.

Penyederen kedue tentang kematénen ni Yesus 9: 43b-45

(Mat. 17:22-23; Mrk. 9:30-32)

43b Ketike bèwèné jema wa heran ilen atas bèwèné si iperbuet-É, iperin Yesus ku murid-murid-É :

44 “Pengénle nye perhatinenle peceraken ni : Anak ni manusie malé iserahen ku wan pumu ni manusie.”

45 Tetapé pakea gere mungerti peceraken a, sebeb hal oya mutuni ari pakea, kati pakea enti mumehemié. Den pakea terih kin mungunei arti peceraken a ku Wé.

Sahan si paling kul 9: 46-48

(Mat. 18:1-5; Mrk. 9:33-37)

46 Renyel timulle peselisihen i antara murid-murid ni Yesus tentang sahan ari pakea si paling kul.

47 Yesus mubetihi peselisihen ni pakea, entap ni oya iuet-É sara kekanak den ibobonené isemelah-É,

48 nye mumerin ku pakea : “Barik sahan si munerime anak ni wan geral-Ku, munerime Aku; den barik sahan si munerime Aku, munerime Wé si munutus Aku. Kerna si paling kucak i antara ni kam wéle si paling kul.”

Sahan si gere mulewen kam wé pong ni kam 9: 49-50

(Mrk. 9:38-40)

49 Den isut Yohanes : “Guru, kami èngon ara jema munusir setan wan geral ni Guru, den kami koai wé entap wé gere mununungi kite.”

50 Iperin Yesus ku wé : “Enti koai wé; sebeb sahan si gere mulewen kam, wé pong ni kam.”

Sara kampung i Samaria munulak Yesus 9: 51-56

51 Ketike nge malé genap waktué Yesus itatang ku serge, Wé mungarahen salak-É kin beluh ku Yerusalem,

52 renyel Wé mungini utusen munuloi-É. Den pakea beluh nye mayo ku sara kampung i Samaria munyiepen segele sesanah kin Wé.

53 Den jema i kampung a gere munerime Wé sebeb pejelenen-É munuju ku Yerusalem.

54 Waktu murid-murid-É, Yakobus urum Yohanes munèngoné, iperin pakea : “Tuhen, mera ke Tuhen kami mungini rara turun ari langit nye munèlongen pakea?”

55 Tetapé Yesus mubalik nye munegor pakea.

56 Renyel pakea beluh ku kampung si lèn.

Tentang mununung Yesus

9: 57-62

(Mat. 8:19-22)

57 Waktu Yesus urum murid-murid-É mulanyuten pejelenen, sara jema mumerin ku Wé : “Aku malé mununungi Guru ku sihen pé Guru beluh.”

58 Iperin Yesus ku wé : “Serigala munempui luang den manuk i langit munempui umah, tetapé Anak ni Manusie gere munempui ton kin mumarinen ulu-É.”

59 Renyel iperin Yesus ku sara jema si lèn : “Tunungle Aku.” Tapé iperiné : “Ijinen aku beluh mulo kin munguburen amangku.”

60 Tetapé iperin Yesus ku wé : “Daténen jema benasa mungubur

jema benasa ni pakea, tapé ko, beluh renyel mungeberen Kerejeen ni Allah.”

61 Den sara jema si lèn  mien mumerin : “Tuhen, Aku malé mununungi Tuhen; tetapé ijinen mulo aku mungucepen selamat tinggal ku seisi ni umahku.”

62 Tetapé iperin Yesus ku wé : “Gere sara jema pé si mumarinen pumué ku atan ni penengelen nye munèngon ku kuduk layak kin Kerejeen ni Allah.”