Wahyu 13

Benatang si tangkuh ari wan lut 13:1-10

Renye aku munèngon sara benatang tangkuh ari wan lut, mutanuk sepuluh den ulué pitu, i atas ni tanuk-tanuké a ara sepuluh mahkota den i ulué tertulis geral-geral hujat.

2 Benatang si kuèngon oya rupeé lagu kule ilo, den kidingé lagu kiding ni telkah den awahé lagu awah ni kule. Den nege oya munosanen ku wé kekuetené den tahtaé den kekuasaené si kul.

3 Telas ku aku sara ari ulué rupeé lagu kona luke si mubahayanen muripé, tapé luke beret a nge jeger. Seluruh denie heran, renye mununungi benatang oya.

4 Den pakea munyemah nege oya, kerna wé munosanen kekuasaen ku benatang a. Den benatang oya pé isemah pakea sire mumerin: “Sahan ke si dis lagu benatang a? Den sahan ke si sangup beperang mulewen wé?”

5 Den ku benatang oya iosanen awah si engkip urum kesepuhen den hujat; wé pé iijinen mugunen kuasaé empat puluh due bulen lememé.

6 Renye wé munuke awahé kin muhujat Allah, muhujat geral-É den kemah-É den bèwèné pakea si taring i serge.

7 Den wé ienguken kin beperang mulewen jema-jema kudus den kin mungalahen pakea; den ku wé iosanen kuasa atas jep suku den umet den basa den bengsa.

8 Den bèwèné jema si taring i atas bumi malé munyemahé, kecuali jema-jema si geralé nge tertulis sebelem denie iciptanen i wan kiteb kehidupen Anak Bebiri si nge igelih.

9 Barik sahan si mukemiring, kenaké wé mumengé!

10 Barik sahan itentunen kin itengkam, we malé itengkam, barik sahan itentunen kin iunuh urum pedang, wé turah iunuh urum pedang. Si penting isien oyale ketabahen urum imen jema-jema kudus.

Benatang si tangkuh ari was bumi 13:11-18

11 Den aku munèngon sara benatang lèn tangkuh ari was bumi si mutanuk roa, lagu tanuk anak bebiri den wé becerak lagu sara nege.

12 Den wé mugunen segele kuasa benatang si pemulo a i arap mataé , renye seluruh bumi den  bèwèné si taring i wasé munyemah benatang pemulo, si luke oloké nge jeger.

13 Den wé munaranen tene-tene ajaib si kul sehinge munurunen rara ari langit ku bumi i arap mata bèwèné jema.

14 Wé munyesaten pakea si taring i bumi urum tene-tene ajaib si nge iosanen ku wé kin mubuetené i arap mata benatang oya. Den wé mungini pakea si taring i bumi kati pakea munyesuken patung kin muhormati benatang si nge luke kona pedang, tapé si tetap murip oya.

15 Den ku wé iosah kuasa kin munosanen nyawa ku patung benatang a, sehinge patung benatang a becerak, den mununuh bèwèné jema si gere mera munyemahé.

16 Den bèwèné jema, kucak atawa kul, kaya atawa miskin, merdéka atawa temuluk, ipaksa benatang oya kin munerime tene i pumu kuen ni pakea atawa i dahi ni pakea.

17 Den gere sara jema pé si lepas mubeli atawa mujuel sesanah selèn ari pakea si mumaké tene oya, den tene a oyale geral ni benatang a kendiri, atawa nomor si mugantinen geralé.

18 Si penting i sien oyale hikmat: Barik sahan bijaksana, kenaké wé munitung nomor benatang oya, sebeb nomor a oyale nomor manusie, den nomoré oyale 666.