Wahyu 15

Nyanyien jema si menang 15:1-4

Renye aku munèngon sara tene lèn i langit, kul den ajaib: pitu malèkat urum pitu malapetaka pemarin, kerna urum oya berakhirle murke Allah.

2 Den aku munèngon sesanah lagu lut kaca mucampur rara, den jema-jema si nge mungalahen benatang oya den patungé den nomor ni geralé sesuk i geniring ni lut kaca wa munamat kecapi Allah.

3 Den pakea munyanyinen nyanyien Musa, hamba Allah, den nyanyien Anak Bebiri, kené:

“Kul urum ajaib segele buet-Mu,

o Tuhen, Allah

Si Mahakuasa!

Adil urum benar segele jelen-Mu,

o Reje segele bengsa.

4 Sahan ke si gere terih,

o Tuhen,

den si gere mumulienen geral-Mu? Sebeb Ko pelin si kudus,

kerna bèwèné bengsa malé

gèh den sujut munyemah Ko,

sebeb nge nyata kebenaran

segele penghakimen-Mu.”

Pitu malèkat urum pitu cawan murke Tuhen 15:5-8

5 Nge mari oya aku munèngon Bait Suci, oyale kemah kesaksien si i serge oya, muke,   

6 den tangkuhle ari Bait Suci a pitu malèkat urum pitu malapetaka oya, bepekayan lenan si putih bersih mukekilet den dedeé mulilit genit ari emas.

7 Den sara ari keopat makhluk a munosanen ku ke pitu malèkat oya pitu cawan ari emas si engkip muisi murke Allah, oyale Allah si murip sawah selama-lamaé.

8 Den Bait Suci oya engkip urum asap ari kemulieen Allah den kuasa-É, den sara jema pé gere lepas mayo ku Bait Suci oya, sebelem berakhir kepitu malapetaka ari kepitu malèkat oya.