Wahyu 17

Penghakimen atas Babel 17:1-18

Renye gèhle sara ari kepitu malèkat, si munemah kepitu cawan oya den mumerin ku aku: “Entah kuini, aku malé munuruhen ku ko putusen atas pelacur kul, si kunul i ton si delé wihé.

2 Urum wé reje-reje i bumi nge bebuet cabul den jema si taring i bumi nge mabuk kerna amer pencabulené.”

3 Wan roh aku imaié ku padang gurun. Den aku munèngon sara banan kunul i atas benatang si ilang ungu, si engkip tertulis urum geral hujat. Benatang oya munempui pitu ulu den sepuluh tanuk.

4 Den banan oya mumaké ruje ungu den ruje si olok ilang den mutiara, den i pumué ara sara cawan emas engkip urum segele kekejien den kenajisen pencabulené.

5 I dahié tertulis sara geral resie oyale: “Babel si kul, ine ni banan-banan pelacur den kekejien bumi.”

6 Den aku munèngon banan oya mabuk kerna rayoh jema-jema kudus den rayoh saksi Yesus. Den ketike aku munèngoné, aku sunguh olok hèran.

7 Renye malèkat a mumerin ku aku: “Hana kati ko hèran?” Aku malé mumerinen ku ko resie banan oya den resie ni benatang si munarangé, benatang si ulué pitu den mutanuk sepuluh a.

8 Arapé benatang si ièngon ko a oyale, tengaha ara, se ni gere ara, den wé malé tangkuh ari jurang maut si gere teduge relemé, den mayo ku wan kebenasanen. Pakea si taring i bumi, si gere tertulis geralé i wan kiteb kehidupen ari muloi denie ijadinen mujadi hèran waktu munèngon benatang oya,sebeb benatang a tengaha pernah murip, se ni wé gere ne murip, tetapé wé malé murip mien.

9 Si penting isien oyale hikmat urum pengertien! Arapé kepitu ulu a oyale pitu bur, si i atasé banan a kunul,

10 den oyale pitu reje: lime i antaraé nge metuh, sara ara ilen den si lén gere ilen gèh, den ike wé gèh, wé malé mumerintah sekejep we.

11 Den benatang si pernah ara den si se ni gere ara oya, wé kendiri oyale reje si kewaluh. Wé asalé ari reje si pitu a, den wé pé mayo ku kebenasanen.

12 Den sepuluh tanuk si ièngon ko a oyale sepuluh reje si gere ilen muloi mumerintah, tapé pakea malé munerime kuasa sebagé reje sara jem lememé, murum urum benatang oya.

13 Pakea sara cerak, kekueten den kekuasaen pakea iosan pakea ku benatang oya.

14 Pakea malé beperang mulewen Anak Bebiri, tapé Anak Bebiri malé mungalahen pakea, kerna Wé le Penguasa atas segele Penguasa den Reje atas segele reje. Pakea si murum urum Wé pé malé menang, oyale jema si italu-É, si nge ipilih-É den si setie.”

15 Renye iperiné ku aku: “Bèwèné wih si ièngon ko isihen banan pelacur oya kunul oyale bengsa-bengsa, den negeri-negeri den kaum-kaum den basa.

16 Den kesepuluh tanuk si ièngon ko a den benatang oya malé begeli até ku pelacur a den pakea malé munos wé mujadi sengap den telanjang den pakea malé mumangan usié den munyiutené urum rara.

17 Sebeb Allah nge mugeraken até pakea kin mubueten kenak-É urum  sara cerak den kin munosanen pemerintahen pakea ku benatang oya, sawah segele firman Allah nge igenapi.

18 Den banan si ièngon ko a oyale kute kul, si mumerintah reje-reje i bumi.”