Wahyu 18

Runtuhé Babel 18:1-20

Mari oya aku munèngon sara malèkat lèn turun ari serge. Wé munempui kuasa si kul den bumi mujadi terang kerna kemulieené.

2 Den wé mumerin urum ling keras, kené:

“Nge runtuh, nge runtuh Babel, kute kul oya,

den wé nge mujadi ton taring roh-roh jahat

den ton temuni segele roh najis

den ton temuni segele manuk si najis den si gere kite kenaki,

3 kerna bèwèné bengsa nge minum ari amer hewe nepsu cabulé den reje i bumi nge bebuet cabul urum wé,

den jema si beniege

i bumi nge mujadi kaya

kerna kelimpahen hewe nepsué.”

4 Renye aku mumengé ling si lèn ari serge, kené:

“Beluhle ko, hei umet-Ku,

beluhle ari wé

kati ko enti

munuet bagien wan

dosa-dosaé,

den kati ko

enti turut kona malapetakaé.

5 Sebeb dosa-dosaé nge mutimun sawah ku langit,

den Allah nge

muninget segele kejahatené.

6 Belesenle ku wé, dis

lagu si ibuetené,

den osanenle ku wé

ukumen roa kali lipet

munurut pebuetené;

den isinenle ku cawané

roa kali lipet kerasé bidak si iosané.

7 Osanenle ku wé sikseen urum kesedihen,

sedelé kemulieen den

kemewahen si nge irasaié.

Sebeb wé dor becerak wan atéwé: Aku betahta lagu ratu,

aku nume balu,

den aku gere malé pernah besedih.

8 Sebeb oya malapetakaé malé geh wan sara lo,

oyale sampar den kesedihen

den kelapénen;

den wé malé isiut urum rara,

sebeb Tuhen Allah,

si muhakimi wé, kuet.”

9 Den reje-reje i bumi, si nge bebuet cabul den murip wan kelimpahen urum wé malé mumongoti den muratapié, waktu pakea munèngon asap rara si munyiuté.

10 Pakea malé sesuk ari gip kerna terih kona sikseené den pakea malé mumerin: “Celaka, celaka ko,

woi kute kul,

Babel woi kute si kuet,

sebeb wan sara jem pelin

nge isawahen hukumenmu!”

11 Den jema si beniege i bumi mongot den besedih kerna wé, sebeb gere ara né jema si mubeli barang juelen ni pakea.

12 Gere ara si mubeli emas, pirak, permata den mutiara ni pakea; lenan halus, ruje ungu, sutra, den ruje kermiji, bebagé jenis barang ari kayu si wangi baué, bebagé jenis barang ari kayu si mal, ari tembege, besi den pualam,

13 kayu manis urum awas-awas, wangi-wangien, mur urum kemenyén, angur, minyak, tepung halus urum gandum, lemu, bebiri, kude urum kereta, temuluk den bahkan nyawa manusie.

14 Den pakea malé mumerin:

“Nge mosop uah-uah

si ikenaki etému,

den segele si mewah, si den indah nge mosop ari ko,

den gere malé idemunen mien.

15 Pakea si mujuel barang-barang oya, si nge mujadi kaya kerna wé, malé sesuk ari gip kerna terih kin sikseené, sire mongot den muratap.

16 Pakea mumerin:

“Celaka, celaka, kute kul,

si mumaké pekayan lenan halus

den ruje ungu, ruje kirmiji,

den si ihiesi urum emas,

permata den mutiara,

sebeb wan sara jem pelin

kekayaen sedelé oya nge benasa.”

17 Den jep nakhoda urum pelayar den anak anak kapal den bèwèné jema si penghasilené ari lut sesuk gip-gip,

18 den musarikle pakea ketike munèngon asap rara si munyiuté, kené: “Kute sihen ke si dis urum kute kul ini?”

19 Den pakea munyempaken dul ku atan ulu ni pakea den musarik sire mongot den muratap kené:

“Celaka, celaka, kute si kul,

si entap wé bèwèné jema,

si munempui kapal i lut,

nge mujadi kaya kerna

barangé si mal,

tetapé wan sara jem pelin wé

nge benasa.

20 Bersukacitele atas wé,

hei serge,

den kam hei jema-jema kudus,

rasul den nabi-nabi,

sebeb Allah nge muhukum wé

sebagé pembelesen atas hana

si ibuetené ku kam bèwèné.”

Babel gere malé bangkit mien 18:21-24

21 Renye sara malèkat si olok beb munatang sara atu penggilingen si kul nye mugeralungené ku wan lut, kené: “Betale Babel, kute si kul oya,

malé igeralungen urum

keras ku tuyuh,

den wé gere malé idemunen mien.

22 Den ling pemain kecapi urum penyanyi,

den peniup suling

urum sangkakala,

gere malé tepengé né

i wasmu,

den sara ahli kesenien

gere malé idemunen mien

i wasmu,

den ling kilangen pé gere malé tepengé né i wasmu.

23 Den caya lampu

gere malé musiner né

i wasmu,

den ling aman mayak

urum inen mayak

gere malé tepengé mien

i wasmu,

kerna tukang-tukang niegemu

oyale jema penting

i bumi,

den urum ilmu sihirmu bèwèné bengsa isesaten.”

24 Babel iukum sebeb i wasé idepeti rayoh nabi-nabi den jema kudus

den rayoh bèwèné jema,

si iunuh i bumi.