Wahyu 2

Ku jemaat i Efesus 2:1-7

”Tulisenle ku malèkat jemaat i Efesus: Inile firman ari Wé si munamat kepitu bintang oya i pumu kuen-É nye remalan i antara ni kepitu ton ni lampu ari emas oya.

2 Kubetih segele buetmu: bier kejang payahmu bier pé ketekunenmu. Kubetih bahwa ko gere lepas seber terhedep jema jahat bahwa ko nge munuji pakea si munyebut dirié rasul, tetapé sebenaré nume den nge idepeti ko pake oya pecogah. 

3 Den ko tetap seber den muderite kerna geral-Ku; den gere betih ko hek.

4 Bier pé lagu noya Aku munyalahen ko, kerna ko nge munaringen kasihmu si pemulo.

5 Sebeb oya ingetle kune relemé kam nge metuh! Betobatle den buetenle mien hana si ibueten ko pemulen. Ike gere lagu noya, Aku malé gèh ku ko renye Aku malé munuet ton ni lampumu a ari toné, kecuali ko betobat. 

6 Tetapé hal ini ara i ko, bahwa ko begeli até kin segele pebueten ni penunung Nikolaus,  den Aku pé begeli até.

7 Sahan si mukemiring, kenaké mumengénen sana si iperinen Roh kin jemaat-jemaat: Barik sahan menang, wé malé Kuosanen mangan ari batang kehidupan si ara i Taman Firdaus Allah.”

Ku jemaat i Smirna 2:8-11

8 ”Den tulisenle ku malèkat jemaat i Smirna: Inile firman ari Si Pemulo den Si Pemarin, si nge benasa den si murip mien:

9 Kubetih kenyanyanenmu den kemiskinenmu - tapé ko kaya - den fitnah ni pakea, si munyebut dirié urang Yahudi, tetapé  sebenareé gere lagu noya: sebaliké pakea oyale jemaat Belis.

10 Enti terih terhedep sana si turah iderite ko! Sesunguhé Belis malé munayonen pepien jema ari kam ku wan penjere kati kam iuji den semokot sepuluh lo kam malé murasanen kenyanyanen. Kenaké ko setie sawah maté den Aku malé mungarunienen ku kam mahkota murip.

11 Sahan si mukemiring, kenaké wé mumengénen sana si iperinen Roh ku jemaat-jemaat: Barik sahan menang, wé gere malé muderite sanah pé ari kematénen si keroa.”

Ku jemaat i Pergamus 2:12-17

12 ”Den tulisenle ku malèkat jemaat i Pergamus: Inile firman-É, si mumaké pedang si tejem den bemata roa:

13 Kubetih isihen ko taring, oyale i ton takhta Belis; den ko beramat ku 

geral-Ku, den ko gere munyangkal imenmu ku Aku, i jemen Antipas pé gere, saksi-Ku, si setie ku Aku, si iunuh i arap ni kam, isihen Belis taring.

14 Tetapé ara pepien hal si gere kenak até-Ku tentang kam: i antara ni kam ara pepien jema si munganut ejeren Bileam, si munosah nasèhat ku Balak kin munyesaten urang Israel, kati pakea mangan pesemahen berhala den bebuet jine.

15 Betapé ara i antara ni kam jema si beramat ku ejeren penunung Nikolaus.

16 Sebeb oya betobatle ! Ike gere lagu noya, Aku tir malé gèh ku ko den mumerangi pakea urum pedang si i awah-Ku ini.

17 Sahan si mukemiring, kenaké wé mumengénen sana si iperinen Roh ku jemaat-jemaat. Barik sahan menang, ku wé malé Kuosanen ari manna si mutuni; den Aku malé mungarunienen ku wé atu putih, si i atasé tertulis geral ayu, si gere ibetihi sahan pé, selèn jema si munerimeé.”

Ku jemaat i Tiatira 2:18-29

18 ”Den tulisenle ku malèkat jemaat i Tiatira: Inile firman Anak Allah, si mata-É lagu ilang ni rara den kiding-É lagu tembege:

19 Kubetih segele buetmu: bier kasihmu bier pé imenmu, bier pelayanenmu bier pé ketekunenmu. Kubetih bahwa buetmu si pemarin lebih delé bidak si pemulo.

20 Tetapé Aku mucela ko, kerna ko mudaténen banan Izebel, si munyebut dirié nabiah, munejer den munyesaten hamba-hamba-Ku kati bebuet jine den mangan pesemahen berhala.

21 Den Aku nge munosanen wé waktu kin betobat tetapé wé gere mera betobat ari jineé.

22 Èngonle, Aku malé mugeralungen wé ku atas ton nomé ni jema sakiten den pakea si bebuet jine urum wé malé kugeralungen ku wan kenyanyanen si kul, ike pakea gere betobat ari pebueten-pebueten banan oya.

23 Den anak-anak-é malé Kubenasanen den bèwèné jemaat malé mubetihi, bahwa Akule si munuji batin den até ni jema, den Aku malé mubeles ku kam masing-masing munurut pebuetené.

24 Tetapé ku kam si lèn i Tiatira, si gere mununungi ejeren oya den si gere munyelidiki hana si isebut pakea ilmu Belis, ku kam Kuperinen: Aku gere munangungen beben lèn ku kam.

25 Tetapé hana si ara i kam amatenle oya sawah Aku gèh.

26 Den barik sahan menang den mubueten buet-Ku sawah ku akhiré, ku wé malé Kukarunienen kuasa atas bengsa-bengsa;

27 den wé malé mumerintah pakea urum tikon besi; pakea malé  iciren lagu tembikar ni tukang kuren - dis lagu kuasa si nge Kuterime ari Ama-Ku.

28 Den ku wé malé Kukarunienen bintang timur.

29 Sahan si mukemiring, kenaké wé mumengénen sana si iperinen Roh ku jemaat-jemaat.”