Yakobus 1

Salam 1:1

Salam ari Yakobus hamba ni Allah den Tuhen Yesus Kristus kin kedue belas suku i ranto.

Imen urum hikmat 1:2-8

2 Sudere-suderengku, anggaple sebagé sara kebahagieen, ike kam metuh ku wan bagé-bagé penyubeen,

3 sebeb betihi kam bahwa ujien terhedep imenmu a muhasilen ketekunen.

4 Den daténle ketekunen oya mutamah-tamah sawah muuah kati kam mujadi semperne den lengkap gere kekurangen sanah pé.

5 Tetapé ike i antara ni kam ara si kekurangen hikmat, kenaké wé muniroé ku Allah - si munosanen kin bèwèné  jema urum murah até den gere munungkit -ungkit - tentué hal oya malé iosanen kin wé.

6 Kenaké wé muniro i was imen, den enti tikik pe bimang, sebeb jema si bimang dis urum gelumang ni lut si iempas-empasen kuyu ku so ku ini.

7 Jema si lagu oya entile mungire , bahwa wé malé munerime sesanah ari Tuhen.

8 Sebeb jema si mucabang atéwé gere  tenang i was ni muripé.

 Kenyanyanen urum kekayaen 1:9-11

9 Daténle sudere si  nyanya bemegah entap kedudukené si atas,

10 den jema kaya entap kedudukené si renah sebeb wé malé mosop lagu bunge ni kerpé.

11 Kerna matanlo terbit urum poraké si mencèr nye mulayunen kerpé a, sehinge metuhle bungeé nye mosople belangié. Lagu noyale jema kaya; i lelah ni bèwèné usahaé wé malé mosop.

Pengujien urum penyubeen 1:12-18

12 Mubahgie mi jema si betehen wan penyubeen, sebeb ike wé nge tehen uji, wé malé munerime mahkota kehidupen si ijanyinen Allah kin sahan pé si mungasihi Wé.

13 Ike sara jema mudepet cubeen, enti iperiné: “Cubeen ni gèh ari Allah!” Sebeb si jahat  gere nguk munosanen cubeen kin Allah, den Allah kendiri gere munuji sahan pé.

14 Tetapé jep jema kona cubeen entap kenaké kendiri, kerna wé isaran den igodaié.

15 Den ike si ikenakié mutamah kuet lahirle dosa, den ike dosa wa nge tasak wé mulahiren maut.

16 Sudere-sudere si kukasihi, enti kam sesat.

17 Setiep penosahen si jeroh den setiep anugerah si semperne gèhé ari atas, iturunen ari Ama  segele terang; i Wé gere ara perubahen atawa bayangen kerna perubahen.

18 Atas kenak-É kendiri Wé nge mujadinen kite mulalui firman kebenaran, kati i tingket tertentu kite mujadi si sulu bere i antara ni bèwèné ciptaen-É.

Si mumengé atawa si mubueten 1:19-27

19 Sudere-sudere si kukasihi, ingetle hal ni: jep jema kenaké tir mumengé tetapé lemem kin becerak,den lemem kin bengis;

20 sebeb porak ni até manusie gere mubueten kebenaran i arap ni Allah.

21 Kerna oya  tekarenle segele sesanah si kotèk urum kejahaten si lagu oya deléé den terimele urum lemah lemut firman si mutanom i was até ni kam, si bekuasa munyelamaten jiwe ni kam.

22 Tetapé kenaké kam mujadi jema si mubueten firman ni Allah den nume si mumengé pelin we;

23 sebeb ike gere lagu noya kam munyogahi dirimu kendiri. Sebeb ike sara jema mumengé firman ni Allah pelin nye gere mubuetené wé lagu jema si tengah muperatinen rupeé si sebenaré i arap ni cermin.

24 Wé ben mumanang dirié, renye beluh den wé langsung mulupen rupeé a.

25 Tetapé barik sahan si muneliti hukum si semperne, hukum si mumerdékanen  jema, den we betekun i wasé jadi wé gere mumengé pelin kin ilupen, tetapé besunguh  mubuetené wé malé mubahgie entap ni pebuetené a.

26 Ike ara jema si muanggap dirie beribedet, tetapé gere mujegei dèlahé sie-siele ibedetné a.

27 Ibedet si murni nye gere bercacat i hedepen ni Allah, Amante, oyale munentongi yatim piatu den jema balu wan kenyanyan ni pakea, den mujege  dirie ari denie ni kati gere mucela.