Yakobus 2

Enti mumanang rupe 2:1-13

Sudere-suderengku, sebagé jema si berimen ku Yesus Kristus, Tuhen te si mulie, amal oya enti ibueten kam urum mumanang rupe.

2 Sebeb, ike ara sara jema mayo ku was perkumpulen ni kam mumaké simsim emas urum baju si belangi den jema si miskin pé mayo ku oné mumaké baju si murebek

3 den kam muhormati jema si mumaké baju belangi a nye mumerin ku wé: “Entah mi kunul tar uken!” , sedangken ku jema si miskin a iperin kam: “Sesukle i oné!” atawa: “ Kunul mi i lante rap kidingku “,

4 gere ke kam nge munos pebèdaen wan até ni kam den bebuet sebagé hakim wan ni pikirenmu si jahat?

5 Pengénle sudere-sudere si kukasihi! Gere ke Allah mumilih jema-jema si ianggap denie ni miskin kin mujadi kaya nye mujadi ahli waris ni Kerejeen si nge ijanyinen-É kin sahan pé si mungasihi Wé?

6 Tetapé kam nge muhine jema-jema miskin. Gere ke sebetulé jema kayale si munganiaya kam den munyaran kam ku pengadilen?

7 Gere ke pakeale si muhujat geral si mulie, si kerna Wé kam mujadi empu ni Allah?

8 Tetapé, ike kam munuruti hukum si pemulo si tertulis wan Kiteb Suci: “Kasihile sesabému manusie lagu dirimu kendiri”, kam mubueten si jeroh.

9 Tetapé ike kam mumanang rupe kam bebuet dosa, den mulalui hukum oya mujadi nyata bahwa kam mubueten pelanggaran.

10 Sebeb barik sahan si munuruti seluruh hukum oya, tetapé gere munuruti sara bagien arié, wé besalah tehedep seluruhé.

11 Sebeb Wé si mumerinen: “Enti bejine”, Wé pé mumerin : “Enti mununuh”, Jadi ike kam gere bejine

tetapé mununuh, kam mulanggar hukum.

12 Becerakle urum betingkah laku lagu jema-jema si malé ihakimi urum hukum si mumerdékanen jema.

13 Sebeb penghakimen si gere bebelas kasihen malé iosahen atas jema si gere bebelas kasihen. Tetapé belas kasihen malé menang atas penghakimen.

Imen tanpa pebueten

sebenaré maté 2:14-26

14 Hanake guneé sudere-sudereku, ike sara jema mumerin bahwa wé munempui imen pedahal wé gere munempui perbueten? Nguk ke imené a munyelamaten wé?

15 Ike ara sara sudere rawan atawa banan gere munempui pekayan den kekurangen pemanganan jep lo,

16 renye sara ari kam mumerin: “Selamat jelen, buge ko pesam den mangan sawah korong!”, tetapé gere iosahé sana si iperlunen sudere a kin bedené hana ke guneé oya?

17 Lagu noyale imen: Ike imen oya gere iurumi pebueten sebenaré imen si lagu oya maté.

18 Tapé kedang ara jema si mumerin: “I ko ara imen, i aku ara pebueten ”, aku malé mujeweb wé: “Turuhen nye ku aku imenmu a tanpa pebueten, den aku malé munuruhen ku ko imenku ari pebueten-pebueten .”

19 Ko percaya sara pelin we Allah? Oya jeroh. Tetapé setan-setan pé percaya oya den pakea mugegir .

20 Woi manusie udel, mera ke ko mungakui se ni, bahwa imen tanpa pebueten oyale imen si soh?

21 Gere ke Abraham, amante, ibenaran kerna pebuetené, ketike wé mupesemahen Isak, anaké i atas ni mesbah?

22 Ièngon kam , bahwa imen bebuet murum urum pebueten den kerna pebueten oya imen mujadi semperne.

23 urum lagu noya genaple Kiteb Suci si mumerin: “Renyel percayale Abraham kin Allah, kerna oya Allah munitungen hal oya kin wé sebagé kebenaran.” Entap oya Abraham iperin : “Sebet ni Allah.”

24 Jadi nge nyata kin kam bahwa manusie ibenaran entap pebueten-pebuetené nume entap imen pelin we.

25 Den gere ke lagu noya Rahab beberu pelacur oya ? Wé ibenaran entap ni pebueten-pebuetené, waktu ituninené jema-jema si iutus oya i wan ni umahé, renyel munulung pakea luah tar jelen si lén?

26 Sebeb lagu beden tanpa roh, maté,betapé imen tanpa pebueten, maté.