Yakobus 3

Dosa kerna dèlah 3:1-12

Sudere-suderengku, enti delé i antara ni kam mera mujadi guru; sebeb kite betih, bahwa sebagé guru kite malé ihakimi munurut ukuren si lebih beret.

2 Sebeb kite bèwèné besalah wan delé hal; barik sahan gere besalah wan ucepené, wé jema semperne, si guk munguasai seluruh bedené.

3 Kite mumasang kelkang i awah ni kude sehinge wé munuruti kenakte, urum cara si lagu noya kite nguk mungarahen seluruh benené.

4 Den engonle perau-perau, bier pé kul pedéh den igeraken kuyu keras, tapé

nguk iarahen kemudi si kucak munurut kenak ni jurumudi.

5 Betapé dèlah, bier pé sara anggota si kucak ari tubuh, tapé lepas mumegahen hal-hal si kul. Èngonle, kune pé kucak ni rara , lepas munyiuten uten si kul.

6 Dèlah pé oyale rara ; dèlah a lagu sara kekuaten kejahaten i antara anggota-anggota ni tubuhte, lagu sesanah si nguk mungotèki seluruh tubuhte den munilang muripte, pedahal dèlahé kendiri iilangen ari neraka.

7 Bèwèné jenis benatang juah, manuk-manuk, urum benatang-benatang mujorol den benatang-benatang lut nguk ijinaken den nge ijinaken sipet ni manusie,

8 tetapé gere sara jema pé si bekuasa mujinaken dèlah ; dèlah oyale sesanah si juah , gere nguk ikuasai den engkip urum racun si mumaténen.

9 Urum dèlah kite mumuji Tuhen, Amante; den urum dèlah kite mungutuk manusie si iciptanen munurut rupe ni Allah,

10 ari awah si sara tangkuh berkat urum kutuk. Hal ini, sudere-suderengku, gere nguk lagu oya terjadi.

11 Ara ke ulu ni wih munangkuhen wih tawar urum wih pit ari ulu wih si sara?

12 Sudere-suderengku, nguk ke batang ara muhasilen uah zaitun den nguk ke batang anggur muhasilen uah ara? Beta pé ulu ni wih masin gere nguk munangkuhen wih tawar.

Hikmat si ari atas 3:13-18

13 Sahan ke i antara ni kam si bijak nye bebudi? Daténenle wé munuruhen cara murip si jeroh mulalui pebueten si jeroh urum hikmat si lahir ari lemah lemut.

14 Jadi ike i was até ni kam ara iri até si olok nye mumentingen diri kendiri we, enti kam mumegahen diri den enti kam mulewen kebenaran urum cogah!

15 Oya nume hikmat si gèh ari atas, tapé ari denie, ari nepsu ni manusie, ari setan-setan.

16 Sebeb isihen ara iri até den mumentingen diri kendirié tentu i oné ara kekaruen den segele jenis pebueten si jahat.

17 Tetapé hikmat si ari atas a pemulo murni, selanyuté pedamé, peramah, penurut, engkip belas kasihen den uah-uah si jeroh, gere mumihak den gere munapèk.

18 Uah ari kebenaran isuk wan damé mulalui pakea si munaranen damé.