Yakobus 4

Hewe nepsu den bepong urum denie 4:1-10

Ari sihen ke gèhé dewe i antara ni kam? Gere ke gèhé ari hewe nepsu ni kam si saling bejuang i wan bedenmu?

2 Kam ménét sesanah, tetapé kam gere mudepeté, renye kam mununuh; kam iri até tapé kam gere mudepet tujuenmu, renye kam bedewe den kam pelolo. Kam gere mudepet sanah pé sebeb kam gere bedoà.

3 Atawa kam memang berdoà, tapé kam gere munerime sanah pé, kerna kam salah bedoà, sebeb si itiro kam oya malé igunen kam kin mumuesen hewe nepsu ni kam.

4 Woi kam jema si gere setie! Gere ke betih kam bahwa, ike kite bepong

urum denie ni kite bemusuhen urum Allah? Jadi barik sahan mera mujadi sebet ni denie ni wé mujadinen dirié musuh ni Allah.

5 Enti ikire kam bahwa Kiteb Suci gere mualasan mumerin: “Roh si iobonen Allah i wan dirinte, ikenaki-E urum cemburu!”

6 Tetapé kasih karunie si ianugerahen-É kin kite lebih kul ari oya. Sebeb oya iperin-É:

“Allah munentang jema

somong

tapé mengasihi jema

si renah até.”

7 Kerna oya taatle ku Allah den lewenle Belis den wé pé musangka ari kam.

8 Mudekatle ku Allah den Wé malé mudekat ku kam. Kudusenle pumumu, woi kam jema bedosa ! Den sucinenle atému , woi kam si mucabang até.

9 Sederile kesedihenmu , berues até nye besebukule; kenaké kedikmu a iganti kam urum sebuku den galak naté urum ues naté.

10 Renahenle dirimu i arap ni Tuhen den Wé malé munatasen kam.

Enti mufitnah jema 4:11-12

11 Sudere-suderengku, enti kam saling mufitnah! Barik sahan mufitnah sudereé, atawa muhakimié, wé mucela hukum, nye muhakimié, den ike ko muhakimi hukum, ko nume penunung hukum, tetapé hakimé.

12 Sara pelin we Si munos hukum den Hakim, oyale Wé si bekuasa munyelamaten den mubenasanen. Tetapé sahan ke ko sehinge ko muhakimi sesabé ko manusie?

Enti mulupen Tuhen wan perencanaen 4:13-17

13 Jadi se ni, woi kam si mumerin: “Serloni atawa lang kami berangkat ku kute anu, den i oné kami malé taring sara tun nye beniege den mudepet untung”,

14 pedahal kam gere mubetihi sana si malé terjadi lang. Hana ke arti murip mu? Muripmu a dis lagu uep si kejep we teridah renye mosop.

15 Sebenaré kam turah mumerin: “Ike kenak ni Tuhen, kami malé murip den mubueten ini, mubueten oya.”

16 Tetapé se ni kam mumegahen diri urum somong, den bèwèné kemegahen si lagu noya salah.

17 Jadi ike sara jema mubetihi kune wé turah mubueten si jeroh, tetapé wé gere mubuetené, wé bedosa .