Yakobus 5

Peringeten kin jema kaya 5:1-6

Jadi se ni , woi kam jema kaya, mongotle nye besebuku atas kesengsaraen si malé munimpe kam!

2 Kekayaen ni kam nge mujadi kotèk den pekayan ni kam nge ipangan ngengét.

3 Emas urum pirakmu nge mukarat , den karaté malé mujadi kesaksien kin kam den malé mumangan bedenmu lagu rara. Kam nge mungamulen reta i waktu-waktu si tengah berakhir.

4 Sesunguhé nge ipengé sarik si kul, entap ni upah si itehen kam ari jema ongkosen si nge munuling i umemu, den nge sawah ku kemiring ni Tuhen semesta alam keluhen ni jema si munuling umemu.

5 Kam nge murip was ni kemewahen den befoya-foya i bumi, kam nge mumuesen até ni kam dis lagu lo waktu jema mugelih .

6 Kam nge muhukum, bahkan mununuh jema si benar den wé gere sangup mulewen kam.

Beseber wan penderiteen 5:7-11

7 Kerna oya, sudere-sudere, beseberle sawah kukegèhen ni Tuhen! Sesunguhé petani munantinen hasil si murege ari tanohé den wé seber sawah nge turun uren musim gugur urum uren musim bebunge.

8 Kam pé turah beseber nye turah munetapen atému, kerna kegèhen Tuhen nge rap!

9 Sudere-sudere, enti kam cebebék den saling munyalahen, kati kam enti ihukum. Sesunguhé hakim nge sesuk i arap ni pintu.

10 Sudere-sudere, turutile teleden penderiteen urum keseberen ni nabi-nabi si nge becerak wan geral ni Tuhen.

11 Sesunguhé kami munalu pakea mubahgie, pakea si nge betekun; kam nge mumengé tentang ketekunen ni Ayub den kam mubetihi sana si akhiré isedienen Tuhen kin wé, sebeb Tuhen maha penyayang den engkip urum belas kasihen.

Tentang sumpah den doà kin jema sakiten 5:12-20

12 Tetapé si pentingé sudere-sudere, enti kam besumpah demi serge atawa demi bumi atawa demi sesanah si lèn. Ike o, kenaké iperin kam o, ike gere kenaké iperin kam gere , kati kam enti kona hukumen.

13 Ike ara sara i antara ni kam si muderite, kenake wé bedoà! Ike ara jema si begegure kenaké wé munyanyi!

14 Ike ara sara i antara ni kam si sakiten, kenaké wé munalu penetue-penetue jemaat, kati pakea mudoànen wé nye munyapunen minyak wan geral ni Tuhen.

15 Doà si tangkuh ari imen malé munyelamaten jema sakiten oya den Tuhen malé mujegeren wé; den ike wé nge mubueten dosa, dosaé a malé iampuni.

16 Kerna oya kenaké kam saling mungaku dosa den saling mudoànen, kati kam jeger.Doà jema si benar, ike urum yakin idoànen olok pedeh kuasaé.

17 Elia oyale manusie biese dis lagu kite, den wé nge besunguh bedoà, kati enti turun uren, den uren pé gere turun i bumi selama tulu tun den onom bulen.

18 Renye wé bedoà mien den langit munurunen uren nye bumi pé munangkuhen uahé.

19 Sudere-sudereku, ike ara i antara ni kam si munyimpang ari kebenaran nye ara si munegu wé ulak

20 betihile, bahwa barik sahan si munos jema bedosa ulak ari jelené si seruk, wé malé munyelamaten jiwe ni jema wa ari maut nye munutupi delé dosa.