Yesus munosah mangan lime ribu jema 6:1-15

(Mat. 14:13-21; Mrk. 6:32-44; Luk. 9:10-17)

Nge mari oya Yesus beluh ku serap ni danau Galilea ho, geralé pé iperin danau Tiberias.

2 Jema delé bererun mununungi Wé, kerna pakéa munèngon tene-tene mukjizet si iperbuet-Né ku jema-jema sakiten.

3 Den Yesus nik ku atas ni bur nye kunul i oné urum murid-murid-É.

4 Den Paskah, reraya ni urang Yahudi, nge rap.

5 Ketike Yesus mumanang seringkel-Né nye munèngon jema delé bererun gèh ku Wé, iperin-Né ku Pilipus : “I sihen ke kite nguk mubeli ruti kati pake ni  mangan?”

6 Hal ni iperin-Né kin munujié; sebeb Wé kendiri mubetihi sana si malé iperbuet-Né.

7 Jeweb Pilipus ku Wé : “Ruti si berege due ratus dinar gere genap kin pake ni, bierpé jep-jep jema mudemu sara nèlès kucak.”

8 Sara ari murid-murid-É, Andreas, serinen ni Simon Petrus, mumerin ku Wé :

9 “I sien ara sara anak si munempui lime ruti gandum urum gulè roa; tapé ara ke guneé kin jema delé lagu ini?”

Iperin Yesus ku pakéa : “Akule ruti murip; barik sahan gèh ku Aku, wé gere né mulapé, den barik sahan percaya ku Aku, wé gere né gerahen.  Hana ke artié : Yesus munosah ruti gune  murip i denie ni urum munosah ruti gune murip i serge oya le tubuh-É maté i kayu salib kin munampuni dosa denie.

10 Iperin Yesus : “Kininen renyel jema delé a kunul.” Arapé i ton oya delé kerpé. Renyel kunulle jema delé a kire-kire lime ribu jema rawan deléwé.

11 Renyel Yesus munuet ruti a, mungucep sukur nye mubaginenné ku jema si kunul i oné, betapé urum gulè-gulè a sedelé si ikenaki pakéa.

12 Nge mari pakéa korong, iperin Yesus ku murid-murid-É : “Kamulen renyel kekerus-kekerus si lebih a kati gere ara si mutekar.”

13 Renyel pakéa pé mungamulen kekerus-kekerus ari kelime ruti gandum si lebih nge mari jema delé a mangan, ara due belas keranyang engkip.

14 Ketike jema-jema wa munèngon tene mukjizet si nge ibueten Yesus, iperin pakéa : “Sesunguhé Wé inile Nabi oya, si gèh ku wan denie.”

15 Kerna ibetihi Yesus bahwa pakéa malé gèh nye mumaksa Wé kin mujadinen-Né reje, Wé pé beluh ku bur seserèng-É.

Yesus remalan i atan ni wih 6:16-21

16 Den Ketike lo nge muloi gelep, murid-murid ni Yesus beluh ku danau,

17 nye nik ku wan perau, renyel munyeberang ku Kapernaum. Ketike lo nge gelep Yesus gere ilen gèh mudemui pakéa,

18 den gèhle kuyu keras beremus ku danau a.

19 Nge mari mungayuh kire-kire tulu atawa opat kilometer gipé, pakéa munèngon Yesus remalan i atan ni wih nye gèh mudekati perau a, den keterihenle pakéa.

20 Tetapé iperin Yesus ku pakéa : “Aku ini, enti kam terih!”

21 Renyel urum galak ni até pakéa muniken Wé ku wan ni perau, den seketike oya pé sawahle perau a ku panté si ituju pakéa.

Jema delé mungenal Yesus 6:22-24

22 Lang loné a jema delé si sesuk i serap ni danau ho munèngon bahwa i oné gere ara perau selèn ari si sara wa ne, den bahwa Yesus gere nik ku perau a murum urum murid-murid-É, tapé murid-murid-Té pelin si beluh.

23 Waktu oya, gèhle pepien ni perau ari Tiberias ku rap ton ni pakéa mangan ruti, mari Tuhen mungucep sukur.

24 Ketike ièngon jema delé a bahwa Yesus gere ara i oné den murid-murid-É  pé gere ara, pakéa nik ku perau-perau a nye beluh ku Kapernaum kin mungenal Yesus.

Yesusle ruti murip 6:25-59

25 Ketike pakéa mudemunen Yesus i serap ni danau ho, iperin pakéa ku Wé : “Rabi, selohen Rabi sawah i sien?”

26 Yesus mujeweb pakéa, ken-É : “Sesunguh-sunguhé Kuperinen ku kam, kam mungenal Aku nume kerna kam nge munèngon tene mukjizet, melènen entap ni kam nge mangan ruti a nye nge korong.

27 Bebuetle nume kin pemanganan si lepas benasa, melènen kin pemanganan si bertehen sawah ku murip si kekal, si malé iosahen Anak ni Manusie ku kam; sebeb Wé inile si isahen Ama, Allah, urum meteré-É.”

28 Renyel iperin pakéa ku Wé : “Hana ke si turah kami bueten kati kami mubueten pebueten ni Allah?”

29 Jeweb Yesus ku pakéa, ken-É : “Inile pebueten ni Allah, kati kam percaya ku Wé si nge iutus Allah.”

30 Renyel iperin pakéa ku Wé : “Ike beta tene sana ke si ibuet Ko, kati kami èngon nye percaya ku Ko? Pebueten sana si ibuet Ko?

31 Muyang datu ni kami nge mangan manna i padang gurun, lagu ara tertulis : Wé munosah pakéa ruti ari serge kin ipangan.”

32 Renyel iperin Yesus ku pakéa : “Sesunguh-sunguhé Kuperinen ku kam, nume Musa si munosah kam ruti ari serge, melènen Amang-Ku si munosah kam ruti si benar ari serge.

33 Sebeb ruti ari Allah, oyale Wé si turun ari serge den si munosah murip kin denie.”

34 Entap ni oya iperin pakéa ku Wé : “Tuhen, osanen pé kami sabé ruti oya.”

35 Iperin Yesus ku pakéa : “Akule ruti murip; barik sahan gèh ku Aku, wé gere né mulapé, den barik sahan percaya ku Aku, wé gere né gerahen.

36 Nge Kuperinen ku kam bahwa kam nge munèngon Aku, tapé kam gere percaya.

37 Bèwèné si iosanen Ama ku Aku malé gèh ku Aku, den barik sahan gèh ku Aku, gere Kutekaren.

38 Sebeb Aku nge turun ari serge nume kin mubueten kenak-Ku, tapé kenak ni Wé si nge munutus Aku.

39 Den inile kenak ni Wé si nge munutus Aku, kati ari bèwèné si nge iosanen-Né ku Aku enti ara si mosop, tapé Aku kasé mubangkiten wé i akhir jemen.

40 Sebeb inile kenak ni Amang-Ku, kati bèwèné jema si munèngon Anak nye percaya ku Wé munempui murip si kekal, den Aku kasé mubangkiten wé i akhir jemen.”

41 Kerna oya mubotomle urang Yahudi tentang Wé, entap Wé nge mumerinen : “Akule ruti si nge turun ari serge.”

42 Renyel iperin pakéa : “Gere ke Wé ini Yesus anak ni Yusup, si ama urum ine-É kite betih? Kune besilo Wé nguk becerak : Aku nge turun ari serge?”

43 Jeweb Yesus ku pakéa, ken-É : “Enti kam mubotom sesabé diri ni kam.

44 Gere ara sara jema pé si nguk gèh ku Aku, ike wé gere itegu Ama si munutus Aku, den Aku kasé mubangkiten wé i akhir jemen.

45 Ara tertulis wan kiteb nabi-nabi : Den kasé pakéa bèwèné iejeri Allah; nye jep jema si nge mumengé urum munerime penejeren ari Ama, gèh ku Aku.

46 Gere ara sara jema pé si nge munèngon Ama, kecuali Wé si murum urum Allah, Wéle si nge munèngon Ama.

47 Sesunguh-sunguhé Kuperinen ku kam, barik sahan si percaya, wé munempui murip si kekal.

48 Akule ruti murip.

49 Muyang datu ni kam nge mangan manna i padang gurun den pakéa nge benasa.

50 Inile ruti si turun ari serge, kati barik sahan si mumangan ruti ni, gere benasa.

51 Akule ruti murip si nge turun ari serge; ike ara jema mangan ari ruti ni, wé murip selama-lamaé; den ruti si Kuosanen a oyale tubuh-Ku, si malé Kuosanen kin murip denie ni.”

52 Kerna oya urang Yahudi a bedewe sesabé dirié, kené : “Kune jema ni nguk munosahen tubuh-É kin kite pangan?”

53 Renyel iperin Yesus ku pakéa : “Sesunguh-sunguhé Kuperinen ku kam, ike kam gere mangan tubuh Anak ni Manusie urum minum rayoh-É, kam gere munempui murip i was diri ni kam.

54 Barik sahan mangan tubuh-Ku urum minum rayoh-Ku, wé munempui murip si kekal, den Aku kasé mubangkiten wé i akhir jemen.

55 Sebeb tubuh-Ku betul-betul pemanganan den rayoh-Ku betul-betul minumen.

56 Barik sahan mangan tubuh-Ku urum minum rayoh-Ku, wé taring i was ni Aku den Aku i was ni wé.

57 Lagu Ama si murip munutus Aku, den Aku murip entap ni Ama, betapé

barik sahan si mangan Aku, wé pé murip entap ni Aku.

58 Inile ruti si nge turun ari serge, nume lagu si ipangan muyang datu ni kam, den pakéa nge benasa; barik sahan mangan ruti ni, wé murip selama-lamaé.”

59 Bèwèné ni iperinen Yesus i Kapernaum ketike Wé munejer i wan ni umah ibedet.

Murid-murid si mungunuren diri entap ni peceraken Yesus 6:60-67

60 Nge mari mumengé bèwèné oya, delé ari murid-murid-É mumerin : penejeren ni keras, sahan ke si sangup mumengénné?”

61 Tapé Yesus kendiri mubetihi bahwa murid-murid-É  mubotom tentang hal oya, nye iperin-Né ku pakéa : “Arake penejeren a muguncangen imenmu?

62 Kune ike kasé kam munèngon Anak ni Manusie nik ku ton asal-É?

63 Rohle si munosah murip, tubuh gere. Peceraken-peceraken si nge Kuperinen ku kam oyale roh urum murip.

64 Tetapé ara pepien ari antara ni kam si gere percaya.” Sebeb ari mulo mi ibetihi Yesus sahan si gere percaya den sahan si malé muhianati Wé.

65 Renyel iperin-Né : “Oyale sebebpé nge Kuperinen ku kam bahwa gere ara sara jema pé nguk gèh ku Aku, ike Ama gere mungarunienenné ku wé.”

66 Muloi ari waktu oya delé murid-murid-É mungunuren diri, nye gere né mununung Wé.

67 Kerna oya iperin Yesus ku kedue belas murid-É : “Kam pé malé beluh ke?”

Pengakuen ni Petrus 6:68-71

68 Jeweb Simon Petrus ku Wé : “Tuhen, ku sahan kami malé beluh? Peceraken-Mu oya peceraken murip si kekal;

69 den kami nge percaya nye nge mubetihi bahwa Tuhenle si Kudus ari Allah.”

70 Jeweb Yesus ku pakéa : “Gere ke Aku si nge mumilih kam si due belas ni? Tapé sara ari antara ni kam Belis.

71 I sien si imekesud Yesus oyale Yudas, anak ni Simon Iskariot; sebeb wéle si malé munyerahen Yesus, sara ari antara kedue belas murid a.