Yesus beluh ku perayaen Pondok Daun 7:1-13

Nge mari hal-hal oya, Yesus remalan i daerah Galilea; sebeb Wé gere mera tetap taring i Yudea, kerna i oné urang Yahudi berusaha kin mununuh Wé.

2 Arapé reraya urang Yahudi, reraya Pondok Daun nge rap.

3 Oya kati iperin serinen-serinen ni Yesus ku Wé : “Berangkat renyel ari sien den beluh ku Yudea, gelah murid-murid-Mu pé nguk munèngon pebueten si ibueten Ko;

4 sebeb gere sara jema pé mubueten sanah pé urum temuni-temuni, ike wé ménét mujadi meshur. Ko nge mubueten hal-hal si lagu oya, turuhen renyel diri-Mu ku denie.”

5 Sebeb serinen-serinen ni Yesus pé gere percaya ku Wé.

6 Kerna oya iperin Yesus ku pakéa : “Waktu-Ku gere ilen sawah, tapé ni kam dor ara waktu.

7 Denie gere lepas begeli até ku kam, tapé wé begeli até ku Aku, sebeb Aku bersaksi tentang wé, bahwa perbueten-perbuetenné jahat.

8 Beluh renyel kam ku perayaen a; Aku gere beluh ku oné, kerna waktu-Ku gere ilen genap.”

9 Nge mari mumerinen hal-hal ni, Yesus pé taring i Galilea.

10 Ketike serinen-serinen-Né nge beluh ku perayaen oya, Yesus pé beluh ku oné gere terang-terangen tapé temuni-temuni.

11 Urang Yahudi mungenal Wé i perayaen a nye mumerin : “I sihen ke Wé?”

12 Delé sisu-sisu tentang Yesus i antara jema delé; ara si mumerin : “Wé jema jeroh.” Tapé si lèné a mumerin : “Enggéh, iseruken-Né jema delé.”

13 Tapé gere sara jema pé becerak terang-terangen tentang Yesus entap ni terih kin urang Yahudi.

Yesusle si iutus Allah 7:14-24

14 Ketike nge setengah perayaen a berlangsung, Yesus mayo ku Bait ni Allah nye munejer.

15 Jadi héranle urang Yahudi mumengé penejeren-Né nye mumerin : “Ari sihen ke pemetihen-Né pedahal Wé gere pernah belejer?”

16 Jeweb Yesus ku pakéa, ken-É : “Ejeren-Ku nume ari Aku kendiri, tetapé ari Allah si nge munutus Aku;

17 ike ara jema ménét mubueten kenak ni Allah, wé mubetihi ejeren-Ku ni asalé ari Allah atawa Aku becerak ari diring-Ku kendiri.

18 Sahan si becerak ari dirié kendiri, wé mungenal hormat kin dirié kendiri, tapé sahan si mungenal hormat kin si munutusé, wé ni benar den gere ara si pelsu i was ni wé.

19 Gere ke Musa nge munosanen hukum Taurat ku kam? Tapé gere ara sara jema pé ari antara ni kam si mubueten hukum Taurat a. Hana kati kam berusaha mununuh Aku?”

20 Jeweb jema delé a : “Ko kerasuken setan; sahan si berusaha mununuh Ko?”

21 Jeweb Yesus ku pakéa, ken-É : “Sara pebueten si nge Kubueten den kam bèwèné héran.

22 Kerna Musa munetapen kati kam bersunet – sebenaré sunet oya nume ari Musa, tapé ari muyang datunte – den kam munyunet jema tar lo Sabat!

23 Ike kin munuruti undang-undang ni Musa, kam munyunet jema tar lo Sabat, hana kati kam bengis ku Aku ike Aku mujegeren jema si sakiten tar lo Sabat?

24 Enti muhakimi menurut si teridah, tapé hakimile urum adil.”

Pertentangen tentang asal ni Yesus 7:25-36

25 Renyel pepien ni urang Yerusalem mumerin : “Gere ke Jema ni si malé iunuh pakéa?

26 Nye èngonle, Wé becerak terang-terangen den pakéa gere mumerinen sanah pé ku Wé. Mungkin ke pemimpinte betul-betul nge mubetihi bahwa Wéle Kristus?

27 Waktu Kristus gèh, gere sara jema pé si mubetihi ari sihen Wé. Tapé tentang jema ni kite betih ari sihen asal ni Wé.”

28 Waktu Yesus munejer i Bait ni Allah, Wé mumerin urum ling keras : “Asal kam munene Aku nye kam mubetihi ari sihen asal-Ku; tapé Aku gèh nume ari diring-Ku kendiri, melènen Aku iutus Wé si benar, si gere ibetihi kam;

29 Aku mubetihi Wé, sebeb Aku gèh ari Wé den Wéle si nge munutus Aku.”

30 Kerna oya pakéa berusaha munengkam Wé, tapé gere sara jema pé mujontok Wé, sebeb saat-É gere ilen sawah.

31 Tetapé ari antara jema delé a, delé si percaya ku Wé, nye iperin pakéa : “Ketike Kristus gèh, mungkin ke kasé Wé mubueten tene mukjizet lebih delé ari si nge ibueten Jema ni?”

32 Urang Parisi mumengé jema delé munyisunen hal-hal oya tentang Wé, nye imem-imem kepala urum urang Parisi mungini penjege-penjege Bait ni Allah kin munengkam Wé.

33 Renyel iperin Yesus : “Taring sekejep mi we Aku ara urum kam, mari oya Aku beluh ku Wé si nge munutus Aku.

34 Kam kasé mungenal Aku tapé gere mudemunen Aku, sebeb kam gere nguk gèh ku ton ku sihen Aku beluh.”

35 Entap ni oya urang Yahudi a becerak sesabé dirié : “Ku sihen ke Wé malé beluh, sehinge kite gere nguk mudemunen Wé? Arake mekesud-Té Wé malé beluh ku pakéa si taring i perantonen, i antara ni urang Yunani kin munejer urang Yunani?

36 Sana ke mekesud peceraken si iperin-Né ni : Kam kasé mungenal Aku tapé gere mudemunen Aku, den : Kam gere nguk gèh ku ton ku sihen Aku beluh?”

Yesus wih murip 7:37-44

37 I lo pemarin ni perayaen a, lo si paling penting, Yesus sesuk nye mumerin urum ling keras, ken-É : “Barik sahan gerahen, gèh renyel ku Aku nye minum!

38 Sahan si percaya ku Aku, lagu si iperinen wan Kiteb Suci : Ari wan ni atéwé mungalir arul-arul ni wih murip.”

39 Si imekesud Yesus ni oyale tentang Roh Kudus, si iterime jema si percaya ku Wé kasé; sebeb Roh Kudus gere ilen gèh, entap Yesus gere ilen imulienen.

40 Mumengé peceraken Yesus a, pepien ari pakéa mumerin : “Wé ni betul-betul nabi si nge ijanyinen Allah oya.”

41 Si lèn mumerin : “Wé inile Kristus.” Tapé si lèn mien mumerin : “Nume, Kristus gere gèh ari Galilea!

42 Gere ke Kiteb Suci mumerinen bahwa Kristus gèh ari keturunen ni Daud den ari kampung Betlehem, ton ni Daud pudaha taring?” 

43 Renyel timulle perpecahen i antara jema delé entap ni Wé;

44 nye pepien jema ari pakéa malé munengkam Wé, tetapé gere ara sara jema pé si berani mojontok Wé.

Urang Parisi gere percaya ku Yesus 7:45-52

45 Renyel penjege-penjege a gèh mien ku imem-imem kepala urum urang Parisi, si mumerinen ku pakéa : “Hana kati kam gere mumai Wé?”

46 Jeweb penjege-penjege a : “Gere ilen pernah ara sara jema pé becerak lagu Wé!”

47 Renyel ijeweb urang Parisi a ku pakéa : “Gere ke kam pé nge iseruken-Né?

48 Ara ke sara ari antara pemimpin-pemimpinte atawa ari urang Parisi si percay  aku  Wé?           

49 Tapé jema delé ni si gere mubetihi hukum Taurat, kona kelsihle pakéa!”

50 Nikodemus, sara ari urang Parisi si pernah gèh ku Yesus, mumerin ku pakéa :

51 “Arake hukum Tauratte muhukum jema sebelem wé ipengé den sebelem jema mubetihi sana si nge iperbuetné?”

52 Jeweb pakéa ku wé, kené : “Ko pé urang Galilea ke? Selidikile Kiteb Suci, tentu ibetihi ko bahwa gere ara nabi si gèh ari Galilea.”